صورة أبيض و أسود تتحول ملونة

Apr 09

شوفوا هالخداع البصري و خل اقول لكم شنو شرح سالفته من الناحية العلمية.

أول شي خل أنبّه انه هالصورة مو خدعة من الخدع اللي مرة وحده تطلع صورة رعب و لا هي نكتة،

أنا ضد هالسوالف و ماحب انشرهم. صارلي كذا موقف جدامي و كرهت هالنوع من النكت.

اللي مو مصدق لا يطالع الصورة و ما راح الومه.

جدامكم بتشوفون صورة غير ملونة (أبيض و أسود) تركزون فيها على النقطة اللي بالنص 15 ثانية و مرة وحده راح تشوفونها تصير ملونة علما توخرون عيونكم عن الصورة، وقتها بس بترد الصورة أبيض و أسود.

في عداد فوق عاليسار حق الصورة ، بس حاولوا تركزون عالنقطة أحسن و لا تطالعون العدد ينزل عشان تشوفون الألوان أوضح.

Color To B&W
إضغط على الصورة

الحين الشرح، باختصار السالفة مثل يوم الواحد يطالع لمبة أو الشمس فترة قصيرة بعدين يوخر عينه يشوف انه الإضاءة تبقى بالنظر فترة.

السالفة علمياً اسمها (Afterimage) بالعربي يعني شي قريب من (ما بعد الصورة).

بالمثال اللي حطيته فوق بتشوفون عاليسار فوق عداد ، و كلما ينزل العداد بتلاحظون الصورة تتغير ألوانها تصير غريبة (برتقالي على أخضر على رمادي) بين كل جم ثانية.

اللي قاعد يصير انه مثل يزرعون بعينك الألوان المطلوبة بكل جم ثانية علما ترد الصورة أسود و أبيض بتشوف نفس الصورة (يعني حدود الصورة و معالمها) بس زيادة عليها الألوان الباجية المزروعة بعينك قبلها، يعني الألوان المزروعة تندمج كلها و تعطيك اللون النهائي خلال الفترة اللي بعد التركيز.

مرات مو بس الألوان و الإضاءة ، مرات حتى الشكل أو المجسم إذا خزيته فترة طويلة و وخرت عينك بتشوف شي مثل شبح الشكل فترة قصيرة موجود بالنظر.

أكو مرض اسمه (palinopsia) يخلي صاحبه حساس حق الحالة هذي و ما يحتاج يركز على شي عشان يشوف (ما بعد الصورة) ، يعني تخيل النظر العادي بس كلما تطالع صوب راح تشوف شبح أو إيحاء الصورة اللي قبلها و إضاءات! العلماء يقولون الظاهر المشكلة بهالمرض من المخ مو من العين و الله أعلم.

و اللي يبي شرح مفصل أكثر خل يراجع صفحة الموضوع بويكيبيديا.

,   | 

5 Responses to “صورة أبيض و أسود تتحول ملونة”

  1. Nice article .. thanks :)

  2. الصورة هذي بصيغة gif

    يعني ملعوب فيها ..

    سهلة السالفة ..

    يخلونها ملونة جم ثانية

    بعدين يردون يخلونها ابيض واسود

    يعني الصورة تتحرك مو ثابتة

  3. الصورة ماهو ملعوب فيها لانك لو ماركزت عالقطة السوداء اللي في الصورة بتشوفها كماهي ابيض اسود … وبعدين جرب شوف كربون

    الصورة على هالرابط http://www.sodfah.com/vb/storeimg/img_1313010679_311.jpg وركز على النقط اللي فيها لمدة 30 ثانية وبعدين شوفها عالجدار وانته ترمش عيونك (يعني تغمض وتفتح عيونك ) راح تشوف الصورة ملونة

Trackbacks/Pingbacks

  1. صورة تتحول ملونة (الجزء الثاني) | Kumail+ - April 16, 2010

    […] اللي يبي يشوف الموضوع الأول و شرح السالفة علمياً خل يضغط على الرابط هني. […]

Leave a Reply

 
%d bloggers like this: