شسالفة كيبل الأنترنت بالكويت؟

Apr 28

و هالكيبل من وين ياي وموصل بشنو؟

قلت اشرح لكم موضوع الأنترنت والكيبل بأبسط لغة ممكنة.

قبل يومين لاحظت النت فجأة صار بطيء، بطيء بدرجة تخليك تكره حيااااتك. قلت يمكن صيانة بالشبكة أو مشكلة مؤقتة بوساعة ولا كلش ساعتين. شوي ولا يوصلني مسج عالتلفون انه كيبل بحري انقطع والمشكلة بتطول 3 أيام… الكلمة الوحيدة اللي ظلت ببالي من حزتها هي “تبــًــا!” .

عشان نعرف سالفة الكيبل لازم تعرفون شغلة أول.

الأنترنت من وين ايي؟

الأنترنت مو مخزّن كله بمبنى واحد ومكتوب عليه “أنترنت” وتطلع منه وايرات ممتدة حق الشركات وبيوت خلق الله بالعالم كله،

الأنترنت مجموعة شبكات متصلة ببعض مثل حلقات داخلة ببعضها البعض، ومتصلة بهذي الشبكات سيرفرات فيها بيانات المواقع، في سيرفرات بأمريكا وبأوروبا وحتى في بالكويت حسب ما أعرف حق شركة كواليتي نت. كل هذي السيرفرات المختلفة فيها أجــــزاااااء من الأنترنت.

المستخدم يوم يبي يدش موقع ويكتب عنوانه بالمتصفح عنده يصير عليه مثل بحث بالشبكات المتداخلة علما يتحول المستخدم إلى السيرفر اللي مخزن فيه بيانات الموقع ويقدر يشوف الكلام والصور وملفات الموقع مثل ما تشوفونه عندكم.

مثل واحد بالكويت يكتب اسم موقعي بالمتصفح يطلبه من مزود خدمة الأنترنت (مثل بالكويت شركة كواليتي نت أو كيمز أو قلوبل الخ)، مزود الخدمة راح يشوف وين محتوى موقعي، يوم ما يلقاه بالكويت راح يدوره بالشبكة القريبة بالخليج، ومن الخليج يدور بأوروبا، ومن أوروبا يدور بأمريكا … علما يلقى بيانات موقعي مخزنة بسيرفرات شركة موجودة في أمريكا يسحبها وتنعرض بالمتصفح للمستخدم بالكويت.

يعني الأنترنت مــــــوزّع ومنتشر، مو موجود كله بمكان واحد.

تتوصل هذي الشبكات العالمية المتداخلة بينها وبين بعض عن طريق كيبلات بحرية تمر عبر المحيطات والقارات، وداخل القارات مثل امريكا والمكسيك عن طريق كيبلات فوق الأرض.

يسمون هذي الشبكات Internet Backbone أو العمود الفقري حق الأنترنت لأنها توصل المناطق وشبكاتها وتنقل الأنترنت بينهم.

هذي خريطة الكيبلات المشهورة بالمنطقة:

SEA-ME-WE-3-Route

امتداد خط SEA-ME-WE-3

الشبكة هذي اسمها SEA-ME-WE-3 سووها بأواخر سنة 2000م بمشاركة عدة شركات اتصالات عالمية. الشبكة هذي الأطول عالمياً وطولها 39 ألف كيلو متر. تم تطويرها أكثر من مرة لزيادة سعة النقل فيها، حالياً مكونة من كيبلين فايبر كل واحد يشيل 48 موجة فيها 10 قيقا بايت بالثانية!

الشبكة تمر بـ 39 نقطة حول العالم، منها نقطتين بمصر (السويس والاسكندرية)، وبالسعودية تمر بجدة، بعدين لي جيبوتي، بعدين توصل عمان، من عمان تنزل بالامارات (الفجيرة)،

ومن الفجيرة بالامارات يوصلنا الكويت! طاطاااااااااااااااط!

و اذا نقطة الفجيرة طاحت أو تعطلت لسبب من الأسباب تتحول شبكاتنا على خط السعودية (جدة) نفس ما صار كذا مرة سنة 2009م و بالجرايد قالوا تحولنا على خطوط احتياطية من السعودية.

سنة 2008 يوم صار الانقطاع المشهور كان الخلل قريب من النقطة رقم 9 عالصورة.

في شبكات ثانية مثل SEA-ME-WE 4 أو FALCON وغيرها.

و الخريطة كاملة حق كل الشبكات البحرية بالعالم هذا شكلها:

SeaCableHi

شبكات الأنترنت البحرية في العالم

وهذا خوش فيديو لقيته عن الشبكات وشرح سريع عنها:

زين الكيبل ليش ينقطع كل شوي؟

باختصار مرات ينقطع بسبب مرساة سفينة (مثل ما صار سنة 2008 بمصر) .

أو مرات بسبب تلف الغلاف الخارجي حق الكيبل نظراً لكونه تحت البحر.

أو مرات بسبب هزات أرضية.

تقدرون تشوفون هني تفاصيل الانقطاعات اللي صارت حق الشبكة المذكورة فوق.

شيصير يوم ينقطع الكيبل؟

في كيبل احتياطي إمكانيته ضعيفة مقارنة بالكيبل الرئيسي يلف بالصوب الثاني صوب المحيط الهادي والصين، يعني ما يمر بالبحر المتوسط واوروبا. الخط الاحتياطي للأسف مو مبين بالخريطة اللي فوق.

يوم نطلب بيانات والكيبل يقطع الاتصال بالشبكات القريبة نتحول على الشبكة البعيدة من الصوب الثاني.

يعني تخيل الشبكة مثلاً دائرة و احنا بنقطة وانقطع النت بنقطة قريبة منا عاليمين، راح نطق دوره كاملة من الصوب الثاني عاليسار علما نوصل المكان اللي فيه بيانات الأنترنت اللي نبيه.

من جذي يصير النت مليق و بطييييييءءءءءءءءءء ، أول شي لأنه النقطة المطلوبة بعيدة حيل، و ثانياً لأنه إمكانية الكيبل ضعيفة مو قوية، و ثالثاً يصير ضغط كبير على الكيبل لأنه واااااايد ناس تستخدمه أثناء فترة القطع.

وإذا كان الموقع مخزن بسيرفر بالكويت أثناء مشكلة قطع الكيبل؟ هل راح يكون الاتصال فيه بطيء هم؟

لا أبد، بيطلع لك الموقع سريع بدون أي مشاكل ولا راح تحس ببشي. المشكلة بس يوم تبي تفتح ايميلك أو مواقع أجنبية أو حتى عربية مخزنة أو مُستضافة في سيرفرات أجنبية بعيدة -وهو الوضع الأغلب حق أكثر المواقع-.

زين ليش يطولون علما يصلحون الكيبل؟

أول شي مشكلة انهم يقعدون يدورون وين صاير القطع بالضبط بالكيبل، ويوم يلقونه مرات ما يتصلح بسرعة نفس سنة 2008 الشركات تتهاوش التصليح يكون على منو.

انزين ليش ما نستخدم الستلايت والأقمار الصناعية حق الأنترنت بدال الكيبلات ونفتك؟

لأن الأقمار الصناعية والستلايت تتأثر حيل بالطقس وبمكان القمر الصناعي مقارنة مع الأرض والدولة اللي تتصل فيه. الاتصال راح يبوّش ليما تكره حياتك أكثر من ايام الكيبلات البحرية.

الكيبل البحري أضمن حق نقل البيانات وأقوى فعالية حق الغرض بوايد.

شلون شكل الكيبل؟

Under Sea Cable

كيبل الأنترنت البحري

Under Sea Cable 2

شكل الكيبل تحت الماي

Under Sea Cable 3

السفينة اللي تمد الكيبل

Under Sea Cable 4

طريقة تمديد الكيبل

Under Sea Cable 5

من أسباب تعطيل الكيبل

Under Sea Cable 6

شكل الكيبل وهو معطل

____________________________

هذا اللي طرا ببالي وقدرت أبسطه كثررررر ما اقدر بدون استخدام أي مفردات فنية عشان الكل يفهم.

إذا في شي تبوني أوضحه أكثر لا تترددون قولوا لي وان شاء الله أضيفه عالموضوع :)

كل الشكر حق أستاذي العزيز (بوعلي) على مساعدته وإضافاته القيّمة بخصوص الموضوع، واعتذر جداً ما قدرت أحط كل شي علّمني اياه ما شاء الله عليه

المصادر:

موقع ويكيبيديا

اللي يبي تفصيل أكثر حق حركة الأنترنت يقدر يراجع هذا الرابط فيه ملخص مصور وخفيف

موقع Technize

  | 

12 Responses to “شسالفة كيبل الأنترنت بالكويت؟”

  1. الف الف شكر ويعطيك العافيه على الشرح الوافي بس عندي سوال اذا تكرمات متي يصلحون الكيبل

    • والله علمي علمك :( هالشغلة ماعرفها صراحة بس بالمسج كان مكتوب الشغلة تاخذ ثلاث أيام

      يعني المفروض لي باجر ان شاء الله كل شي يرد طبيعي! ياااارببببببببب!

  2. الف الف شكر لك على هالموضوع الطيب وانا بصراحه استفت منه بشكل كبييييييير

    شكرا على الكوبي والبيست :)

    • حرام عليك اخوي والله كتبت الموضوع من روحي وبصياغتي واذا مو مصدق دور شوف اذا بالنت في مثله :( ثلاث ارباع المحتوى استفدته من خبرة صاحبي بو علي و باجي المقالات و الصور و الفيديو انا بحثت عنهم وترجمتهم و ذكرت المصادر، شسوي اكثر عشان تصدق؟

  3. يعطيك العافيه
    ليلحين النت بطييييييء يرفع الضغط
    :/

  4. حيل حيل حيل نفعتنا بهالمعلومات القيمه
    يعطيك العافية

  5. مشكور حبيبي على المعلومات القيمه

  6. يعطيك العافيةوالله
    افدتني كثير مو شوي
    ربي يجزاك كل خير

Trackbacks/Pingbacks

  1. حقائق عن أكبر شركات الاستضافة | Kumail+ - May 6, 2010

    […] شفت وين محل الشركات تذكرت موضوع (شسالفة كيبل الأنترنت بالكويت؟) وشلون سيرفرات الشركة -على الأغلب- تكون أيضاً في نفس […]

  2. هذا شكل كيبل الأنترنت اللي يمتد بالبحر عبر الدول والقارات | Kumail+ - October 11, 2011

    […] اللي يبي يعرف أكثر عن كيبل الأنترنت خل يراجع هالموضوع القديم على هالرابط. […]

Leave a Reply

 
%d bloggers like this: