شنو يعني AM و PM بالساعة؟

Jun 16

من احنا صغار نشوف بالتوقيت والساعات يكتبون AM و PM، هالأحرف شسالفتهم؟

وبعض المعلومات السريعة عن التوقيت بو 12 و24 ساعة والترقيم الروماني بالساعات.

الكلام طبعاً كله بنظام توقيت الـ12 ساعة مو 24 ساعة الكريه .

في ناس يقولون اختصار حق “After Midnight” يعطيك AM و “Past Midnight” يعطيك PM، بس هالكلااااام غللللطططط !!

الأحرف هذي اختصار لكلمات لاتينية كالتالي:

AM يعني باللاتيني Ante Meridiem يعني بالانجليزي Before Midday يعني بالعربي قبل منتصف اليوم.

PM يعني باللاتيني Post Meridiem يعني بالانجليزي After Midday يعني بالعربي بعد منتصف اليوم.

أحب أضيف انه ماكو طريقة رسمية صحيحة معتمدة لكتابة هالأحرف، يعني تقدر تكتبها أحرف صغيرة am أو كبيرة AM أو بينهم نقط P.M. كله يصير وماكو مشكلة، بس إذا كلش بتصير دقيق استخدم النقط عشان تبين انهم اختصار

نظام التوقيت بو 12 ساعة هذا يرجع تاريخه إلى المصريين القدماء وحضارة بلاد الرافدين باستخدامهم الساعات الشمسية والمائية، هالكلام يعني قبل 1500 سنة قبل الميلاد

خلال القرن الرابع عشر قاموا يستخدمون الساعات بترقيم كامل لـ24 ساعة وكانت الساعة زحمة حق اللي يشوفها، شوفوا هالصورة كمثال:

24 Hour Analog Watch

من جذي خلال القرن الخامس والسادس عشر قاموا يتعودون عالـ12 ساعة وفكوا روحهم وفكونا مرة وحده، صارت السالفة أبسط يمعود. بس ظلوا يستخدمون نظام الـ24 حق الساعات الفلكية والساعات شديدة الدقة اللي يسمونها كرونوميترز – chronometers.

أختم الموضوع بالترقيم الروماني حق الساعات الأوروبية القديمة:

الـI يعني واحد

الـV يعني خمسة

الـX يعني عشرة

وأول عشر أرقام ينكتبون كالتالي: I, II, III, IV, V, VI, VII, VIII, IX, and X.

إذا لاحظتوا الأربعة يكتبونها IV مع ان قلنا الـV يعني خمسة، بس هني إذا حطوا الـI قبل الحرف يصير يعني كأنه ناقص، واذا صار بعده يصير كأنه زائد.

مثل VI يعني ستة.

يكتبونه بهالطريقة كنوع من التبسيط، يعني أحسن من انهم يكتبون IIII العين تضيع ما يبين عددهم بوضوح،

من جذي ماكو حرف بالترقيم الروماني ينكتب أكثر من ثلاث مرات ورا بعض.

وبس خلصت يالله شتبون بعد موضوع سريع وخفيف

المصادر:

Today I Found out – What A.M. and P.M. Stand For

Wikipedia – 12-hour clock

Wikipedia – Roman Numerals

, ,   | 

16 Responses to “شنو يعني AM و PM بالساعة؟”

  1. معلومات جديدة وحلوه ..

    شكراً :)

  2. قواك الله على المعلومة
    :)

  3. عاد هذي اعرفها من المدرسه
    lol
    thanx

  4. الصراحة معلومات رائعة و خاصة الترقيم الروماني، تعجبني مواضيعك، الله يوفقك

    • مشكور وما تقصر اخوي وادعيلي اتوفق عشان ما اوقف ;)

      وعسى الله يوفق الجميع يا رب

  5. و أحب أضيف بعد انه نظام ال 24 ساعة يستخدمونه في الجيش و خاصة الجيش الأمريكي :)

    • كلامك الحين خلاني اتذكر الجيش الأمريكي بالأفلام صح دايما يقولون التوقيت بنظام الـ24 ساعة :) تباً للجيش الأمريكي!

  6. عاد قبل جم يوم كنت أفكر بهالحروف اللي بالساعه وكنت ناوي اسوي سيرج عنهم بس صبقتني و ريحتني بعد لول
    يعطيك الف عافيه
    استمر
    ;)

  7. يعطيك العافية
    بس ليش نظام ال24 كريه وايد احسن

  8. تصدق سألت واحد من الربع مدرس انجليزي وما عرفها :)

  9. يعطيك العافية ومشكور ، وعلى طاري الوقت يقولون يزيدون عدد ساعات اليوم يعني بخلونه اكثر من ٢٤ ساعة يعني اذا عندك معلومات عن الموضوع وتقدر اتفيدنا
    شكرًا

  10. كنت اعتقد AM اختصار لـ At morning

  11. معلومات رائعه ومفيد
    لكن لو انك تستخدم اللغه الفصحى
    بيصير الموضع راقي اكثرhttp://www.kumailplus.com/wp-content/plugins/wp-monalisa/icons/kml_grin.gif

Leave a Reply

 
%d bloggers like this: