جدول غرائب كأس العالم

Jul 05

أمس حطيت موضوع سريع عن الحسبة الغريبة في كأس العالم والرقم 3964، دق علي صاحبي بوصالح وكلّمني عن الموضوع أكثر شوي… السالفة طلعت أغرب واكبر من رقم!

اللي يعرفني شخصياً يدري إلمامي بالكرة سطحي حيل، لو مو السوني3 والدوري الياباني ما كنت اعرف اللاعبين ولا المنتخبات والأفرقة. من جذي موضوعي اللي فات كان عبالي اني صايد شي كبير واخرتها طلع خرطي!

بعد ما سديت التلفون من صاحبي واخوي وجاري العزيز بوصالح وصلني منه ايميل بهالجدول العجيب يوضّح فيه النقاط اللي ذكرها لي بالتلفون.

من النقاط اللي نستخلصها من الجدول:

* الكاس يفوز فيه مرة دولة من أوروبا ومرة دولة من الأمريكتين، كأنها بالدور.

* إذا حسبنا دول آسيا على أمريكا الجنوبية، و دول أفريقيا على أوروبا؛ راح نشوف دايما يفوز بالكاس منتخب من القارة المضيفة للمونديال.

* حسبة الرقم 3964 بشكل عام ماشية صح ما عدا الثغرات اللي تكلمت عنها بموضوعي اللي حطيته أمس، بس يوم تبوّش مع هالرقم تضبط مع حسبة ثانية!

* من أحد ثغرات حسبة الرقم 3964 بالجدول الصفين باللون الأحمر، السنة اللي فازت فيها إنجلترا سنة 1966، والسنة اللي فازت فيها فرنسا 1998، الغريب انهم كسروا الحسبة بس كانوا اثنينهم مستضيفين المونديال بديرتهم ذيك السنوات. والغريب أكثر انها المرة الوحيدة لكلا الدولتين فازوا فيها بالكأس.

* الثغرة الثانية فاز فيها البرازيل سنة 1958 وفاز بمقابلها إيطاليا 2006، الغريب انها ثغرة وبنفس الوقت البرازيل فازت بالكأس وهو في ضيافة دولة أوروبية، يعني فاز بالكأس دولة خارج القارة المضيفة. كأنهم عاقبوها ويوم صار دور البرازيل مرة ثانية بحسبة 3964 فازت بالكأس إيطاليا بدالهم، كأنهم يبون يصفّون حساب معادلة فوز دول القارة المضيفة.

كل هذا ولي الحين ما تكلمت عن سالفة المثلث، وحسبة الـ24 سنة، وباجي النقاط اللي دخت منها في كلامي مع بوصالح 

مع اني حالياً أشجع ألمانيا بين المؤهلين للنهائي،،،

بس ودي ودي ودي ياااااا رببببببب يخسرون عشان تنكسر كل هالمعادلات واطلع غلطاااان!

إذا السالفة ارقام محسوبة لا يبه ما تسوه علينا وبالطقاق اللي يطقهم كلهم

4 Responses to “جدول غرائب كأس العالم”

  1. دوختني

  2. ما فهمت شي الصراحة بس على العموم سالفت الحسابات هذي كلش ما لها على بالواقع او كلها ارقام يت عن طريق الصدفة او من الحسبة الأولى يبين ان اللي قام بالحسابات قاعد يختار بطولات على كيفه موعلى حسب الترتيب الصحيح بس عشان تضبط الارقام وياه . بس مع هذا راح تفوز المانيا انشاله مو عشان الحسبة . عشان المانيا اهي الفريق الأفضل . او مارح تتحقق امانيك يا بوحسن او بوصالح ماراح ينفعك لأن توقعاته كلها غلط في غلط.

  3. الحمدلله ان الحسبة مالتنا و نظرية كاس العالم طلعت غلط

Leave a Reply

 
%d bloggers like this: