يوغا الضحك :)

Jul 07

شوفوا هالفيديو حق واحد يسمونه Laughing Yogi، الفيديو غريب، تحس يكسر الخاطر على يخرّع شوي.

استانس وموت ضحك بعدين يقولون لك سويت يوغا، شتبي بعد؟

نرفزني المقطع، تشوف واحد الشيب براسه يصرخ بصورة غبية I’m Happy I’m Relaxed, I’m Happy I’m Relaxed, I’m Happy I’m Relaxed…؟!

وبعدين يفصل بوبوبو بوبووبو بوووو

رحت اقرا عن يوغا الضحك بشوف شالسالفة، طبعاً رحت ويكيبيديا ولا يقولون ان هاليوغا اخترعها دكتور هندي اسمه جيتين كوهي – Jiten Kohi. يقولون الضحك مفيد حق الجسم سواءاً كان الواحد يضحك من صجه عشان شي صج يضحك أو بس جذي من غير سبب، بالحالتين الجسم راح يستفيد.

بعدين يشرحون شلون تصير تجمعات يوغا الضحك هذي، مجموعة يقعدون يخزون بعض ومرات يستعبطون عالخفيف عشان يساعدون الكل يبدون الضحك، ومع الضحك يتنفسون شوي بطريقة منظمة عشان الأكسجين يدش بأكبر كمية داخل الجسم والمخ يرتاح. شوي شوي كلهم يضحكون لما تلقاهم مسدّحين عالأرض

واللي يساعدهم اكثر طبيعة الضحك المعدية، حتى اللي مستملق الوضع بيضحك. الواحد اذا قعد شاف مجموعة كبيرة تضحك يشوف نفسه يضحك معاهم، أو عالأقل يبتسم يستانس من داخل. والعكس هم يوم يروح مكان كلهم زعلانين ضايق خلقهم، مثل يوم تروح عزا ناس.

شايفين بالمسلسلات الكوميدية شلون يحطون صوت ناس تضحك أثناء المشاهد طول الحلقة؟

فكر لو شالوا أصوات الضحك هذي شلون الحلقات بتصير سخيفة والنكت مليقة هذي طريقتهم عشان يمشّون سوق مسلسلاتهم غصباً عليك. وتحس فيها يوم تروح تبي تقول المشهد حق واحد من الربع وتلقى روحك مليق وصاحبك يستملقك هم، بعدين تستغرب ليش كان المشهد يضحّك بالتلفزيون!

صايرين حتى مالنا خلق نضحك، أو نفكر عشان نضحك، قاموا بطريقتهم الخاصة يقولون لنا متى نضحك جدام التلفزيون. هالكثر صايرين كساله هالأيام

وتلومون أمهاتنا وآباءنا لي قالوا التلفزيون مو زين؟ حتى لو ما كانوا يستوعبون هالكلام بأبعاده وتفاصيله، بس بالنهاية كلامهم عدل

:modest:ش
,   | 

3 Responses to “يوغا الضحك :)”

  1. أشكرك أخ كميل +

    :)))))))))))))))))))))))))))))))))))))))))))

    إي هذي المواضيع القشره

    انزين إنت جربتها؟ شصار معاك؟

  2. هههههههههههههههه وانا قاعده اقرا مبتسمممه

    ..يسلمووووووووووووا

  3. اغلب المسلاسلات يكون فيها جمهور صدقي هم اللي يضحكون حتى بعض الحلقات لو تركز تلقى بعض الناس ضحكاتهم غبيه تسمعها طول الحلقه

Leave a Reply

 
%d bloggers like this: