ليش تتعفس أصابع الإيد إذا طوّلت بالماي؟

Aug 06

وانا صغير كنت استانس يوم اشوفهم يتعفسون، الحين قمت اتنرفز واقول ليش ليشششش!؟

يسمونها بالانجليزي pruney fingers أو water aging، حالة مؤقتة تحوش راحة الايد أو بطن الريل.

كلما تقعد بالماي أكثر كلما تروح من بشرتك الخارجية مادة دهنية تحميها، إذا راحت هالمادة يبدي نوع معين من الخلايا الميتة ببشرتك بامتصاص الماي (هالخلايا اللي أتكلم عنها أكثر شي موجوده بالطبقة الخارجية من إيدك وريلك)، الطبقة الخارجية من الجلد تنتفخ وتتمدد كلما تمتص الماي مثل اسفنجه، بس الطبقة الداخلية تبقى بحالها، هذا الفرق يسبب التعفّس لأن الطبقتين متصلين ببعض.

بعد فترة من تطلع من الماي راح ترد المادة الدهنية مرة ثانية، وينشف الماي اللي بإيدك، وترد البشرة الخارجية بحجمها الطبيعي.

تخيّل مثلا انت حجم جسمك Medium عاد اكيد تلبس قياس Medium ويكون مضبوط عليك، هذا حال ايدك والبشرة عليها وهي ناشفة.

بس يوم تطب بالماي وتطوّل يصير وضعك مثل اللي لي الحين حجم جسمه Medium بس ملابسه قياس XXL!! راح تضطر تلم ملابسك وترفعها عن الأرض وانت ماشي وحالتك معفّسه تكسر الخاطر، هذا حال بشرة ايدك بعد امتصاص الماي والتمغّط اللي يحوشها…

عسى ما عقّدت الموضوع بهالمثال؟!

مثال ثاني: إذا كان عندك تي شيرت ومخيطين عليه شي من خامه ثانية (مثلاً رقم أو شعار فريق)، بعد غسيل هالتي شيرت كذا مره راح يصير شكله مليق ملخبط ومتعفس أكثر شي على أطراف الخياط بين الخامتين، تلقى خامه مثلاً كشّت بالماي وصغرت، والخامه الثانية تظل بحالها أو تكش بنسبة أقل، مما يسبب الشكل المتعفس بمنطقة الالتقاء.

لا يكون عقّدت السالفة أكثر!

مثال ثالث…

لا خلاص

المصادر/

Today I found out – Why Fingers Wrinkle in Water

Wikipedia – Pruny Fingers

  | 

28 Responses to “ليش تتعفس أصابع الإيد إذا طوّلت بالماي؟”

  1. هههههههههههههههههههههههه والله ذبحتني من الضحك الله يقطع ابليسك

  2. يعني العلاقة عكسية؟؟ هذا الى فهمت من خلال المثال لكن ماقصرت موضوع حلووغريب

    • لا مو عكسية، الطبقة الخارجية تكبر بس داخل لا، يعني الزيادة من طرف واحد والآخر ثابت :)

  3. شكرا لك معلومات مهمه ، ومدونه ثريه

  4. هههههه والله اسلوبك اللي محلي الموضوع ياكميل

  5. هههههههههههههه والله امثلتك حاااستني حوووس ما عرفت السالفه ججد

  6. رائع جدًا حقيقة كنت أتساءل عن هذا الموضوع

    تدويناتك جميلة شكرًا لك

  7. يووو جزاك الله كل خير على هالمعلومه القيمه
    من زمان وانا اتعجب من هالشي! سبحان الخالق..
    بس مافكرت ابحث عن اجابه له، مثل حظرتك ماشاء الله عليك


    دمت بخير ومبارك عليك الشهر.

  8. سبحان الله، معلومة مفيدة
    شكرا على المشاركة

  9. ويييي الحين انا اللي فهمته ان في طبقتين !!!! والله سبحان الله غريبه يعني اذا شلعنا الطبقه اللي متعفسه نلقى طبقه زينه ؟ وي جني انا حست بعد :)

    • وشكو نشلع الجلد؟ لووول
      البشرة طبقتين بطبعها، الخارجية اللي نشوفها والداخلية قريبة من اللحم، الخارجية تتمدد مؤقتاً إذا راحت المادة الدهنية منها بسبب الماي.
      بس تنشف وترجع المادة الدهنية كل شي يرد طبيعي.

  10. أول مرى اعرف هالمعلومه و لا قد سألت عنها
    بس الشرح واضح مدري ليه ربعنا مو راضين يفهموون

    تسلم ايدك و الله

  11. أشكرك أخ كميل +

    الحمدلله انك مو مدرس

  12. معلومة جميلة ^^
    بس الصورة مو حلوة =×

  13. ههههههههه .. XD

    ما شاء الله عليك كميل ما خليت شي
    صرت كل ما اشوف شي أسأل نفسي ليييش !

  14. الطبقتين ملزقين ببعض .. اللي تحت ماتتغير واللي فوق تمددت ، سبحان الله
    شي يخوف والله .. ماراح اجلس بالماي واجد هههههههه

  15. يعنـي مآلهـآ اضرآر !؟
    =/

  16. موضوع جميل
    بنتي الصغيرة عمرهاسنة ونص ومن تطلع من الحمام تطالع إيدها وتستغرب
    الحين بس تتكلموتسألني بعرف أجاوبها
    شكرا أخ كميل

  17. شكرا شكرااا عالمعلومات القيمه
    القيّمه مو قيمه مطعم هندي
    ههههههه

    تشكرات كميل افندم

Leave a Reply

 
%d bloggers like this: