ليش ما نقدر ندلدغ روحنا؟
Science+
15. Sep, 2010 @ 4:42 pm
13 Comments
يعني على فرض انك طفشان ومتملل وتبي تضحك بس ما تدري شلون، ليش ما يصير تدلدغ روحك وتضحك؟
يمكن الجواب سهل بس في تفاصيل حلوة زيادة ما توقعتها.
بشكل العام المخ يتنبأ بالأجواء المحيطة ويجهز جسمك حق ردود الفعل المناسبة لكل احتمال. المخيخ بالتحديد يراقب حركات الجسم ويفرّق بين الأحاسيس المتوقعة والغير متوقعة، الأحاسيس المتوقعة يهملها وما يركز عليها في إصدار ردة فعل لها والعكس حق الأحاسيس الغير متوقعة.
من جذي يوم تنخش وتروح حق واحد من الربع وهو ما يدري وتنغزه مرة وحده ينقز حيـــل، بس إذا رحت له وهو يدري ردة فعله تكون أخف، بس يوخر شوي أو يوخر ايدك وهو مستملقك مو أكثر 
لووول.
مثال ثاني وانت الحين قاعد عالكمبيوتر وتحرّك الماوس وتطبع عالكيبورد، بهالوضعية تلقى نفسك ما تحس أو ما تركز على ملمس الكيبورد والماوس شلون صايرين على اصابعك وايدك. تلقى نفسك تقعد ساعات عالكمبيوتر وتكتب وتحرك الماوس بس مو مهتم ولا تدري عن ملمس هالأشياء اللي انت تسويها عمداً وفترات متكررة كل يوم.
بهالطريقة سووا تجربة سهلة في University College of London شافوا صور حراررية لمخ الناس وهم يلامسون ايدهم بنفسهم أو من ناس ثانيين. طبعاً يوم يلمسهم الناس كانت الصور نشطة أكثر في مخوخ الأوادم.
الحلو بعدين جربوا يخلون الناس يحركون روبوت وهالروبوت يحرك روبوت ثاني بعدين يلمسهم (يعني يملس الشخص نفسه اللي يتحكم بالروبوت). والنتيجة كانت وحده، يعني ما يتدلدغون وكانوا متوقعين لمسة الروبوت.
هالشي صار لأن الروبوت كان يتحرك حركة مباشرة بنفس الوقت، بس توديه يمين يروح يمين، توديه يسار يروح يسار وحده بوحده. يوم جربوا يكون في تأخير في تزامن الحركة حتى لو بدرجة خمس الثانية شافوا ردة الفعل أقوى حيل في مخ المشاركين في التجربة. التأخير البسيط في الحركة يقص عالمخ ويخليه يترجم الحركة هذي كأنها خارجية غير متوقعة بدال ما تكون داخلية.
باختصار السالفة كلها تعتمد على عنصر المفاجأة، يوم تدلدغ روحك تكون عارف الطبخة وتدري انك راح تدلدغ وشلون ومتى بالضبط ودرجة الضغط على جسمك وحركة اصابعك كلها معروفة وما تقدر تقص على روحك وتضحك. والعكس يوم يدلدغك واحد من الربع وكل هالعوامل مجهولة وتسبب مفاجأة لمخك وتعطي ردة فعل عنيفة شوي. نفس الشي يوم تخترع بالظلمة إذا واحد نط مرة وحده أو سمعت صوت قوي وراك.
سبحان الله احساس الدلدغة يعتبر مزيج من الخرعه والقلق ويشتغل كنظام دفاعي للجسم ضد الأجسام الخارجية. من جذي تلقى روحك تفز من غير تفكير، المخ يكون مفكر عنك وخالص. واذا كان اللي دلدغك واحد تعرفه وتعزه راح تلقى نفسك تضحك لأنك تدري نيته مو شينه، بس إذا كان واحد ما تعرفه أو ما تشتهيه راح تتنرفز وتعصب. مخك يقولك عصب أو تنرفز لأن هالشي مثل تهديد لسلامة جسمك ولو بدرجة خفيفة.
من جذي يقولك الرومانيين كانوا يستخدمون دلدغة الريول كنوع من التعذيب 
(تذكرت حلقة من حلقات كارتون باباي القديمة فيها هالشي).
وسلامتكم 
المصدر/ Today I found out
درجة قوة الباسوورد
تصويت: إذا حذفت 100 فلس من فوق أبراج الكويت..
عطلة نهاية الأسبوع
الطاقة المستهلكة في عمليات البحث في قوقل
Cold Stone الكويت
تسلم على هالمعلومات الطيبه
انا بصراحه من فتره قصيرة كنت اتابع المدونه
وقلت اول شي اقرا المواضيع كلها
وعقب ارد على شغله
الصراحه الصراحه
استفدت استفاده كبيره ما تتصورها
يعطيك العافية وإلى الأمام دائما
الله يعافيكم ومشكورين حيل عالتشجيع!
دايما أقول أستانس يوم اشوف الناس يقرون هالسوالف ما كنت متوقع أبد هالعدد يهتمون بهالأمور أو حتى يمرون عليها
أشكرك أخ كميل +
سؤال… تسمح لي أدلدغك؟
روح دلدغ روحك يالمليييييق!
خوش موضوع يعطيك العافيه بس سؤال
الي ما يغارون لما احد يدلدغهم هذولا شنو بالضبط
نقطة حلوة نسيت ادور عنها،
قريت عالسريع بكذا موقع ويقولون غالبا اللي طبعه ما يهتم وايد هذا ما يغار، حتى اللي يغار يوم يكون معصب أو حده زعلان تلقونه إذا واحد نغزه ما يتفاعل وايد. ونفس الشي مع بعض الناس على طول مو مهتمين واعصابهم باردة باللي حوالينهم
حسب معلوماتي المتواضعة
شرح هالنقطة وايد حلو ومنطقي
الجسم يقسمونه إلى اقسام مقطعية
يعني ناخذ الانسان ونقصصه بالعرض الى مناطق محددة
وتعتمد هالتقسيمة على الاعصاب اللي طالعة من العمود الفقري (عن طريق الحبل الشوكي) ..
وكل عصب طالع من كل فقرة على اليمين واليسار يغذون منطقة معينة بالجسم
…
فالغيرة عبارة عن تحفيز حق هالمناطق اللي قلت عنها أول شي
وهي عبارة عن تقلصات عضلية في منطقة البطن .. ” )
سؤال وايد حلووو .. ” )
أحب أزيد على كلامك أنه هالحركة يسمونها Adaptation
وتختلف حسب المستقبل الموجود على الجلد ..
في مستقبلات حق الحرارة او البرودة
في حق الضغط (افضل مثال اللي ذكرته الكيبورد)
في مستقبلات حق الاهتزاز
وفي حق الالم .. وغيرهم
ونسبة التعوّد تختلف حسب نوع العصب اللي يغذي المنطقة ومكانه (بالحجم وسرعة انتقال النبضات العصبية).
وكلهم قابلين للتعود بنسب متفاوتة ما عدا الألم لأنه صعب إنك تتعود على الألم فتحس كل مرة بالعوار !!
مشكوور وااايد .. ” )
يعطيك العافيه على المدونه الرائعه
أضيف أن مرضى الشيزوفرينيا يضحكون اذا دغدغو انفسهم
الله يكفيكم الشر
وااو تصدق هالسؤال كثير مر بحياتي
من جد ليش ما اقدر ادلدغ نفسي على قولتك
(عندنا بالسعودية نقول أدغدغ من دون حرف اللام لول )
بس الان عرفت التفسير المنطقي .
يعافيك ربي
اوف طفشت من كتابة نكي مليون مره وكمان هالايميل الخايس
جيب لي حل
ما عندي خبرة بالمدونات كثير
انزين هالدلدغه المفاجآه ما تآثر بالقلب او المخ ؟؟
تآثسر سلبي ؟
لى يسير جربوا دلدغوا ريولكم (تكرمون ) طبعنا اذا كنتوا ما تتدلدغون من ريولكم ماراح يسير بس اذا تتدلدغ را تتدلدغ