تقييم أفلام السينما (G, PG, PG-13 ..الخ)

Sep 17

بعضهم معروفين وتعودنا عليهم، بس شنو يعني كل تقييم؟ ومنو يقيّم بالضبط؟ وعلى أي أساس يحددون هالفيلم تقييمه كذا؟

طبعاً أكثر الأفلام بالسينما حول العالم تكون أمريكية من هوليوود، وأشهر نظام تقييم للأفلام بأمريكا يسمونه MPAA (اختصار حق Motion Picture Association of America’s) وفي أنظمة ثانية تهتم بتقييم ألعاب الفيديو والمسلسلات التلفزيونية وبرامجها، بس هالنظام محدد بالأفلام السينمائية لا غير. منظمات التقييم ككل تكون تحت إدارة منظمة يسمونها Classification & Ratings Administration والقواعد المستخدمة لكل نظام تختلف على حسب نوع العمل ومجاله.

اللي احتمال ما تعرفونه هو ان هالنظام اختيــــاري مو إجباري – ماكو قانون يجبر على تقييم الفيلم قبل عرضه أو بيعه. هالنظام بس يقيّم الأفلام اللي الاستديو يـطــلــب منهم تقييمها، يعني استديو يصور فيلم بعدين يطلب منهم تعالوا شوفوا شنو تقييم هالفيلم عشان نحطه عليه، عاد هم يقيمونه ويحطون التقييم بــنـــــاءاً عـــلــــى الــطــــلــــب بس. مع هذا نقدر نقول الحين الكل متعود يقيّم الفيلم قبل نشره كنوع من العرف الدارج في هالمجال والاستديوهات صار من مصلحتها استخدامهى كنوع من التأقلم مع المشاهدين اللي تعودوا عليه.

حتى صارت درجة التقييم نوع من التسويق للأفلام ويحاولون كثر ما يقدرون يخلون أفلامهم في إطار تقييم معين عشان يربحون فيه أكثر من التقييمات الثانية، يعني مثلاً أفلام ديزني من صالحهم تقييم G و PG عشان يستقطبون الشريحة المعنية اللي تناسب صورة شركتهم العائلية. والعكس حق أفلام الأكشن والدراما، تخيل إذا مثلاً نزلوا فيلم باتمان اليديد وكان تقييمه G!! الناس تقول شنو هالعبط!!! راح تقل صورة الفيلم قبل لا ينزل بالسينما وحتى الشخصية (باتمان) راح يطيح سوقه عند المشاهدين .

النظام هدفه مساعدة الآباء والمشاهدين بشكل عام لمعرفة الجمهور المناسب لكل فيلم قبل مشاهدته أو شراء نسخة منه.

شنو التقييمات الموجودة ومعناهم بالضبط ؟

هذا جدول يوضح معنى كل تقييم بالضبط:

أحرف التقييم تغيرت عبر التاريخ ودمجوا بعضهم لسبب أو لآخر بس مو هذا موضوعنا، موضوعنا بس التقييم اللي عندنا الحين وهاليوم.

هذا بخصوص الأحرف بس في التقييم، وبالمستطيل تقدرون تشوفون مرات يحطون عبارات توضيحية لسبب التقييم تساعد المشاهد أكثر عشان ينتبه أثناء مطالعة الفيلم.

زين منو اللي يقيم الأفلام بالضبط ؟

مجموعة مختلفة من الآباء الموظفين في إدارة Classification & Ratings Administration، هالمجموعة ما تتبع أي استديو وأي سينما عشان لا يكون لهم مصلحة في تغيير التقييم. المجموعة -الظاهر من اللي قريته- انها تتغير لكل فيلم ويقولون لهم يكتبون التقييم مو بس حسب الراي الشخصي، يكتبونه بالنسبة حق رايهم الشخصي و الراي اللي يتوقعونه يناسب أي عائلة ثانية.

شنو العوامل اللي يراجعونها في كل فيلم ؟

الموضوع العام والمحتوى بشكل خاص من اللغة، العنف، العري، الجنس، وتعاطي الممنوعات. في العبارات التوضيحية اللي تكلمت عنها فوق مرات يحددون إذا كان بالفيلم Thematic Elements اللي هي مواضيع أخرى مثل سوالف الإجهاض، أو مناقشة فكرة الموت، أو الأمراض، العنف الأسري، أو أي موضوع ثاني مرات يشوفون ضروري ينبهون عليه المشاهدين المهتمين حتى لو بهالعبارة الصغيرة.

معلومة حلوة !

شايفين شلون التقييم اللي يحطونه قبل كل دعاية فيلم تكون الخلفية لونها أخضر؟ أثاري هذا اللون الأخضر له معنى وحتى في ألوان غيره.

الأخضر – يعني مناسب لجميع أو بعض الجمهور المحدد بالفيلم اللي يبي ينعرض بالسينما. يستخدمونه لأي عرض بصالة السينما بأي تقييم كان. يعني مثلاً إذا رحتوا فيلم كارتون بالسينما وتقييمه يكون G المفروض تكون كل الدعايات قبل الفيلم بهالإطار.

الأصفر – يستخدمونه حق الدعايات اللي يعروضونها بالأنترنت بس وللعمر المعني والمحدد.

الأحمر – يستخدمونه حق الأفلام الخاصة بالبالغين فقط سواءاً الإباحية أو الشديدة العنف والمحتوى.

أعيد واقول هالنظام بس بأمريكا وهو النظام المشهور. اللي يبي يشوف نظم تقييم الأفلام المختلفة حول العالم يقدر يراجع هالصفحة في ويكيبيديا، أخذت منها هالجدول عالطاير:

للعلم بس ترى نسبيا نظام التقييم الأمريكي وايد محافظ مقارنة بالدول الأوروبية وايد أشياء بأوروبا محسوبة عادية بأمريكا يرفضونها في الأفلام ويحددونها للكبار، اللي يبي يعرف شلون عملية التقييم بالضبط والتفصيل خل يراجع صفحة ويكيبيديا بالمصادر تحت فيه معلومات أكثر عن هالموضوع. وبالمصدر الثاني حتى تقدرون تشوفون أسئلة تفصيلية أكثر مثل شنو يصير إذا استديو اعترض على تقييم عطوهم اياه حق فيلم وسوالف ثانية ما عجبني أتطرق لها للاختصار.

المصادر/

Filmratings.com

Wikipedia – Motion Picture Association of America’s

,   | 

2 Responses to “تقييم أفلام السينما (G, PG, PG-13 ..الخ)”

  1. معلومات جديدة بالنسبة لي شكرا لك

Leave a Reply

 
%d bloggers like this: