ليش الشمال اهي الجهة الأساسية بين الجهات الأربع؟

Sep 21

ليش مو الجنوب؟ ليش مو الشرق أو الغرب؟

سؤال وصلني من الأخ ميثم الحسيني عن الموضوع وحبيت أجاوبه مع شرح بسيط.

قبل لا أبدي الموضوع أشكر كل اللي يراسلون وما لحقت أرد عليهم سواءا لاقتراح مواضيع أو شكر وتشجيع، قلت هالكلام قبل واقوله مرة ثانية للتأكيد اعذروني حيل بس الله يشهد بالموت الحق اكتب بالمدونة وحتى التعقيبات صعب حيل ارد عليهم كلهم. دايما أحاول ابحث بالاقتراحات اللي توصلني واذا شفت الموضوع اجابته بسيطة وسريعه استصعب انزله موضوع بروحه اجاوبه بسطرين بس، أستانس أكثر بالمواضيع اللي شوي يبيلها عبالة ويطلع فيها معلومات يديدة حلوة.

أما سؤال الأخ العزيز ميثم الحسيني في الايميل وصلني كالتالي:

“بالنسبة لاقتراح مواضيع .. لاحظت فيك حب البحث و المعرفة وما تخلي شي يطوف عليك .. اليوم فيه سؤال طراا على بالي كنت طارحه عالشباب قبل جم شهر و اجابتهم كانت (الناس تعودت على هالشي) .. لكني دورت و عرفت جزء من الاجابه .. و السؤال هو: ليش الخريطة ترسم أن الشمال فوق و الجنوب تحت ؟ ليش مو العكس ؟ ليش الشمال موجب و الجنوب سالب ؟ ليش مو العكس ؟ ليش ما كان الجنوب سالب ؟ من ابتدع هالشي؟
وهالموقع http://flourish.org/upsidedownmap/
جاوب على جزء من سؤالي .. و أدري فيك اخوي مشالله عليك تعطي البحث حقه لما تبحث فيه.”

السؤال عجبني وقعدت أفكر الكرة الأرضية شبه دائرية مو مسطحه عشان نقول الفوق هني وتحت هني، يعني كل الجهات عليها تسميتها نسبية ما نقدر نقول هني فوق وهني تحت إلا لسبب معقول. الجاذبية تسحب كل شي على سطح الأرض إلى المركز. ما عمرنا شفنا واحد معصب يقول ليش حاطين “الكرة” مقلوبة فوق تحت !

قلت يمكن السبب المجال المغناطيسي للكرة الأرضية يلعب دور بالموضوع، بس بعدين يوم دورت لقيت يقولون حتى هالشي مو دقيق ودرجة المغناطيسية تتغير على مدار السنة مع تحرك المعادن السائلة تحت الأرض.

قمت وسألت واحد متخصص وقال عبر التاريخ أغلب الحضارات والدول اللي اشتهرت بالعلوم كانت بالجهة الشمالية من الكرة الأرضية. واحتاجوا نقطة مشتركة للاستدلال، اختاروا الشمال بسبب “دوران السما حول هالنقطة من الأرض” بالنسبة لهم طبعاً ومن اللي يشوفونه بالليل. هذا بالتعبير البسيط اللي كانوا يفهمونه أيام أول بس اليوم نعبّر عن هالفكرة بـ “الشمال هو أحد القطبين لمحور دوران الأرض”. إذا اختاروا الشرق أو الغرب تصير مشكلة لتغير طول النهار خلال السنة وأيضاً تغير نقطة الشروق والغروب بسبب دوران الأرض حول محورها وحول الشمس بنفس الوقت .

يعني الاختيار لعلامة الاستدلال انحصرت بين أحد قطبي محور دوران الأرض لثباتها بالنسبة لجميع (أو أغلب)سكان الكوكب. بالأخير فضلوا الشمال على الجنوب بسبب نجم الشمال اللي اهو أوضح وأدق لجميع الرحالة والمسافرين ومكانه مثالي في السما لقربه من محور دوران الأرض.

قال على الرغم من عدم دقة المجال المغناطيسي وتغيره خلال السنة يبقى التغيير حيل بسيط ما يغير الاتجاه العام وايد، ومقارنة ببقية الأسباب الموجودة هالشي نقدر نتجاهله ببساطة.

كلامه أقنعني ورحت دورت بويكيبيديا ولا ألقى هالعبارة:

Up is a metaphor for north. The notion that north should always be up and east at the right was established by the Greek astronomer Ptolemy. The historian Daniel Boorstin suggests that perhaps this was because the better-known places in his world were in the northern hemisphere, and on a flat map these were most convenient for study if they were in the upper right-hand corner.

يعني اختيار الشمال كالجهة العلوية من الكرة الأرضية يرجع تاريخه إلى أيام أفلاطون – Ptolemy! واللي قريته يزيد التأكيد لكلام اللي سألته والأسباب المنطقية والعلمية للاستدلال.

هذا اللي جيكت عليه قـــبـــل لا أرجع حق الرابط اللي حطه الأخ ميثم في رسالته، يوم دشيت الموقع اللي قال عنه وقريت استغربت حيل وشفت في معلومات متضاربة وغريبة شوي.

الموقع المنقول يتكلم عن الخرايط المقلوبة وان استخدام الشمال كجهة علوية من الكوكب مفهوم حديث صارله بس جم قرن! يقول قبلها الشرق كانت اهي الجهة الرئيسة !

الكلام اللي شفته أول الموضوع يتعارض مع المكتوب في الموقع ومن اللي شفته عالسريع في الأنترنت الكلام غلط تاريخيا (يمكن انا غلطان وفي معلومات ما مريت عليها بس هذا اللي طلع معاي)، واللي يتعارض مع الموضوع أكثر مو بس الناحية التاريخية كثر ما اهي الناحية العلمية المنطقية البسيطة بالنسبة لنجم الشمال ومحور دوران الأرض.

بالموقع بعدين يعرض مجموعة خرايط مقلوبة قديمة وحديثة كنوع من الاستدلال على كلامه حسب ما فهمت، واللي لاحظته أغلب الخرايط المعروضة ترجع لسكان أو علماء أستراليين، الخرايط المقلوبة شي مشهور عند الأستراليين أكثر من أي شعب آخر لي يومنا هذا، والشي طبيعي إذا عرفنا مكان أستراليا في الكوكب وبعدها عن الشمال، بس يظل هالاستخدام شاذ مو كافي للاستدلال على صحة هالمفهوم بصورة عامة، وهالشي يمشي حتى لو كان في خرايط تاريخية لعلماء غير أستراليين. محد يقدر ينكر العدد الهائل والأكبر من الخرايط اللي اعتمدت الشمال عبر التاريخ مقارنة بعدد باللي استخدموا الجنوب أو أي جهة أخرى.

نقطة ثانية يمكن مفهومة خطأ ان استخدام الخرايط المقلوبة مشهور هالأيام كنوع من التدريب لحفظ جغرافية الكوكب وأماكن الدول بصورة أقوى، يعني مجرد حركة، مو انهم يبون يقولون ترى الشمال مو الجهة الأساسية يالله حطوا الجنوب واحنا بنحط الجنوب غصباً عليكم !

بعدين طوّفت بالموقع ولا اشوف تحت كاتب معلومات سريعة وفي جزء يتكلم عن الجزيرة العربية، يقول كانوا يستخدمون الجنوب كجهة أساسية ومن اعتيادهم على استخدام اليمين لكل شي محبب صار تسمية اليمن نسبة لليمين اللي تكون بجهة الجنوب يعني من الجزيرة.رحت جيكت المعاجم العربية وما لقيت شي يدعم هالكلام، كل اللي لقيته ان اليمن من اليُمن أو أسباب أخرى غير هذي.

بعد ما شفت جذي قمت اشكك بكل المكتوب بالموقع وقلت خلاص ماله داعي اجيك الباجي، اللي مريت عليه ما دش راسي ليش اكمل بعد

بس لي هني وخلاص مافيني اكتب اكثر  إذا في تصحيح أو شي غاب عني يا ريت تنبهوني يا جماعة، هالسوالف مو تخصصي ومطالعتي فيها سطحية اللي يقدر يفيدنا أكثر ما راح نقول له لأ :)

, , ,   | 

5 Responses to “ليش الشمال اهي الجهة الأساسية بين الجهات الأربع؟”

  1. أشكرك أخ كميل +

    كميل ضايع مني ربع دينار
    مو طايح بسيارتك؟

  2. مافهمت شي, لعبت في خي لعب :S

  3. العرب أول كانوا يعتبرون ويسمون الجنوب ما نسميه بالشمال حاليا وبالعكس, يعني اللي نقول عنه الجنوب كانوا يسمونه الشِمال(بكسر الشين)
    ويقال بأن السبب, ان الأعراب كانوا اذا نصبوا خيماهم كانوا يخلون باب الخيمة حهة الغرب – القبله- لأن الشمس تدخل الخيمه وتكون أشعتهابارده
    وطبعا ما يكون اتجاه الباب للشمال او الجنوب, لأن الهواء يكون غالبا يا شمالي يا جنوبي
    وكانوا دايما يجلسون باتجاه الباب فيصير الجنوب حاليا هو اتجاه اليد الشمال (اليسرى) فسموه شمال

  4. Ptolemy بطليموس العالم الجغرافي و ليس أفلاطون

Leave a Reply

 
%d bloggers like this: