ليش يوم تحوشك نشلة يتسكر خشمك؟

Sep 25

منو يحط كلينكس بخشمه مثل هذا يوم ينتشل؟

أكثر شي ينرفز بالنشلة واييب الصداع هالشي هذا! شنو اللي يخلي الخشم يتسكر بالضبط؟ وليش ندوخ ونحس راسنا ثقيل؟ ليش الجسم يتعب؟

ولا تخافون الموضوع ما يلوّع الجبد كثر ما تتوقعون

أول شي لازم تعرفون ان في شي اسمه “دورة أنفيّة” – Nasal cycle، أكثر من 80% من البشر يتنفسون من فتحة وحده بخشومهم بس والفتحة الثانية تكون مسكرة، على طووووول!! يعني مو نفس الفتحة تكون مسكرة دايماً، لا بس يعني تصير بالدور فتحة تتنفس والثانية تتسكر والعكس بعد فترة (الدورة بين ساعتين إلى أربع ساعات).

انت الحين قاعد تقرا الموضوع جرّب تصكّر أحد فتحات خشمك وانفخ هوا (يعني انفخ بالخشم مو تنفخ بحلجك وانت ماسك خشمك تصير عبيط ) وبعدين بدّل مع فتحة الخشم الثانية وراح تشوف، احتمال كبير تلقى مرة كانت سهالات والفتحة تتنفس بسهالة والثانية لأ. إذا الاثنين كانوا عاديين يعني انت من الأقلية المحظوظة ولازم أطقك عين !

سبب الدورة وشرحها بالتفصيل أنقله لكم بهالأسطر:

الدورة الأنفية وهي تحدث بآلية معينة بحيث تتمدد الأوعية الدموية في الغشاء المخاطي بإحدي فتحتي الأنف، فيندفع الدم فيها وينتفخ الغشاء المخاطي، وبالتالى يقل الفراغ المتاح لمجرى النفس فتقل كميته وسرعته، مما يتيح له فرصة أطول لاكتساب كمية أكبر من حرارة الغشاء المخاطي، فترتفع درجة حرارة الهواء الداخل من هذه الفتحة، ويحدث العكس تماما في الفتحة الأخرى، حيث تنقبض الأوعية الدموية فينكمش الغشاء المخاطي فيزيد فراغ مجرى النفس فتندفع كمية كبيرة من الهواء بسرعة وبذلك لا تكتسب نفس الحرارة التي اكتسبتها الجهة الأخرى، وعندما يتقابل الهواء من الناحيتين في البلعوم الأنفي يختلطان بحيث تكون درجة حرارة هذا الخليط ملائمة تماما لدرجة حرارة الجسم، وتحدث هذه الدورة بالتبادل بين الناحيتين، فتتمدد اليمنى وتنقبض اليسرى في وقت معين، ثم ينعكس الوضع في الدورة التالية وهكذا. وهي عملية بالغة التعقيد ويتحكم فيها عدد من العوامل. وحتى نبسط الأمور فيمكن تشبيهها بما يحدث في خلاط صنبور المياه، فإذا أردت ماء ساخنا فإنك تفتح صنبور الماء الساخن بدرجة كبيرة وصنبور الماء البارد بدرجة أقل، وبتحكمك في درجة فتح الصنبورين تستطيع التحكم في درجة حرارة الماء.

البعض يقول الدورة هذي أحد الأسباب اللي تخلي الواحد يتقلب وهو نايم :)

هذي صورة توضيحية، شوفوا جهة اليسار من الصورة الخشم منسد، اليمين عادي:

زين، يعني الحين الوضع الطبيعي عند الأغلب هو التنفس بشكل رئيسي من فتحة أنف وحده طول الوقت. عيل ليش يوم ننتشل السالفة تصير تنرفز وواضحة حيل ؟

يوم تنتشل أو تحوشك حساسية الأوعية الدموية صوب خشمك تنتفخ، ويوم تنتفخ مثل تتورم ذيك الجهة ويبين أثر الدورة الأنفية أكثر بوايد من قبل، يعني تحس بالتجويف المصكر أكثر.

مع شدة الانسداد تلقى الأكسجين اللي يوصل مخك نسبته تقل، من جذي تحس راسك ثقيل مو قادر تجمع  وتحس كله نعسان مو قادر تركز. عشان تخفف من أثر هالانسداد ونقص الأكسجين تبدي تتنفس من حلجك ، وهم لزيادة نسبة الأكسجين يبدي القلب يضخ دم أكثر، ويقعد الحبيب يضخ ويضخ و مو لاحق قاعد يشوف ماكو فايدة الأكسجين ما يزيد ولا قاعد يسوي شغله، عاد جسمك كله يتعب والطاقة كلها تروح. مثل السيارة المغرزة بحفرة وواحد يوس بنزين أكثر وأكثر يبي يطلع بس ماكو فايدة.

حتى لو ما تنتشل أو تحوشك حساسية، شايف يوم تعطس مرتين أو ثلاث مرات ورا بعض؟ هم تحس بالسالفة واضحة كأن أحد الفتحات صكرت والثانية تتنفس طبيعي. الأوعية شوي انتفخت حزتها من العطس المتكرر وبعد شوي ترد طبيعي.

ليش المشكلة تزيد وتبين أكثر وانا منسدح أو نايم؟

لأن الدم يوصل راسك أكثر بهالوضعية من يوم انت واقف على ريلك، يوم الدم يصير أكثر براسك راح تحس بالانسداد أكثر والأوعية تنتفخ أكثر. مثل هوز الماي اللي دايس عليه كلما يزيد ضغط الماي راح تحس فيه بريلك أكثر.

يعني الموضوع ماله خص بـ”المخاط”؟

امبله بس مو بشكل رئيسي، السبب الرئيسي هو تورم الأوعية الدموية جهة الجيوب الأنفية. “المخاط” يزيد الطين بلّة على قولتهم.

زين عيل الأدوية اللي يستخدمونها لعلاج الانسداد شتسوي بالضبط؟

قطرات الأنف أو اللزقات اليديدة بالسوق كلها بس تسهل مرور الدم في الأوعية ويخفف من ورمها، يستخدمون بالأدوية مادة مقبضة لهالغرض.

قريت بأكثر من مكان تحذيرات ينبهون الناس لا تتعود على هالأدوية، يقولون القطرات والرشاش بالذات يريحونك شوي بس بعدها راح تزيد المشكلة أكثر وأكثر والانسداد يشتد!

غير الأدوية، شنو يخفف من هالمشكلة؟

1- اشرب ماي وعصاير وااااااااايددددد!

2- وخر عن الألبان والحليب، يقولون يزيدون من مشكلة الانسداد… حاولت اعرف ليش بس ماقدرت!

3- وخر عن أي شي فيه كافيين، الكافيين يمتص الماي بالجسم وجسمك محتاج ماي وايد.

4- خذ لك حمام ساخن، البخار الساخن يخفف من الانسداد، او تقدر تستخدم أجهزة ترطيب الجو إذا عندك.

وسلامات ان شاء الله ما تشوفون شر

المصادر/

Wikipedia – Nasal Cycle

Wikipedia – Nasal Congestion

جريدة الشرق الأوسط – الأنف والجيوب الأنفية

صحة – انسداد الأنف

, , ,   | 

8 Responses to “ليش يوم تحوشك نشلة يتسكر خشمك؟”

  1. يا حبي لتدويناتك يا كميل.. أسلوبك جدا رائع ورايق في طرح المعلومة المفيدة وتبسيطها.. جالس أقرا في أرشيف المدونة من أول بوست للآخر ,وأتمنى لك مع كل بوست دوام الصحة والعافية وأننا ماننحرم من هالكتابات الجميلة.

    بالنسبة للألبان والحليب يا خيي.. هي على ما أعتقد تزيد إفراز المادة المخاطية بالجسم, ممكن يكون هذا سبب وجيه يخليها مهيب المادة الغذائية المناسبة في حال معك كحة أو زكام.

    توضيح ثاني صغير.. لأني وقفت عند هالجملة شوي:
    (الكافيين يمتص الماي بالجسم وجسمك محتاج ماي وايد.)
    يقصد استاذنا أن الكافيين يأثر -بشكل غير مباشر- على نظام الكلى, ويخليها تمتص السوائل بكميات أكثر من المعتاد لإخراجها خارج الجسم.. بكذا الواحد يفقد نسبة كبيرة من المويه اللي هو محتاجها.

    مشكور ويجزاك خير يا كميل..
    والمعذرة على التطفل اللي ماله سنع هههه

    • حبيييييييب اخوي محمد والله المدونة وراعيها يتشرفون فيك :)

      واسمح لنا على الخطأ الغير مقصود في المعلومات :cry: بالأخير أبقى مجرد قارئ غير متخصص وطرحي بالأسلوب العامي شوي غير دقيق، بس ان شاء الله بتواجدك وباجي الطيبين نرقع بهالأخطاء :D

      واحنا اللي نلتمس المعذرة منك ومن جميع الزوار على هالأخطاء، وتصحيحك لنا يلزمنا شكرك افا عليك ;)

  2. الله يعطيك العافية قبل فترة بسيطة صارت لي هالزكمة وجاني مثل ما قلت بالضبط وبالتمام يعني لما انسدح يزيد الإنسداد ولما أوقف يخف ولما أشرب لبن على بالي بخفف على حلقي لأنه محترق تزيد علي الزكمه بشكل متعب وبرضوا لما اتروش بالماء الحار حسيت اني خفيت واجد وبعد فتره ترجع وارجع اتروش بالماء الحار ويخف فعلاً معلومات مفيدة ورائعة يعطيك العافية خصوصاً النقاط الأخيرة اللي تخفف من الزكمة لأني فعلاً جربتها وكانت مفيده والحمد لله :) شكراً.

  3. ana mn el 20% :D

  4. وانا اقول ليش طول المدة اتنفس من فتحة وحدة
    علبالي عيب خلقي او مرض مزمن
    الحمدلله =) !!

  5. البرنسيسه Reply March 13, 2011 at 12:59 pm

    هيييييه لاه اويييييه تسلم ع الموضوع الحلو وننتظر المزيد

Trackbacks/Pingbacks

  1. يصير الواحد يعطس وهو نايم؟ | Kumail+ - October 10, 2010

    […] بشكل أفقي يوصل الراس كمية أكبر من الدم (مثل ما قلت بموضوعي اللي فات)، عاد تنتفخ الأوعية الدموية أكثر في الأنف والجيوب […]

  2. ليش لما ننتشل ما نحس بطعم الأكل؟ | Kumail+ - February 2, 2011

    […] تترس خشمك مخاط وتنتفخ الأوردة اللي فيه من جذي يتصكر وما يخليك تتنفس عد…. وبنفس الوقت ما راح توصل الريحة اللذيذة إلى مستقبلات […]

Leave a Reply

 
%d bloggers like this: