حقيقة قصة نيوتن والتفاحة

Oct 30

من أكثر القصص شهرة، خاصة بالمدارس عشان يشجعون الطلبة يعني. وسمعنا بهارات القصة يوم قالوا كان طاق الطوفة منحاش من المدرسة ولا يرتاح تحت الشجرة وصار اللي صار بعدين طلع بفكرة الجاذبية.

الناس تقول نيوتن كان قاعد تحت الشجرة يفكر ويتأمل شلون القمر والكواكب متعلقه بالسما، شوي ولا طابااااح ،،، تفاحة كفخت راسه فقير . بعدين مخه دق سلف وطلع بنظرية الجاذبية . وسمعت بعض البهارات عالقصة يقولون كان طاق الطوفة منحاش من احد المدرّسين ولا يرتاح تحت الشجرة وصار اللي صار.

شفتوا هالقصة؟ هالقصة يا جماعة فيلم هندي قصير. السالفة وما فيها ان نيوتن كان يتمخطر في مزرعة امه سنة 1666م ومر يم شجرة التفاح ولا يشوف تفاحة تطيح عالأرض، بعدين قعد يفكر ويقول شنو اللي خلاها تطيح ؟ لا يكون هالقوة هذي نفسها اللي تخلي القمر والكواكب تدور بمسارها في الفضاء؟ وشوي شوي قامت تنطبخ نظرية الجاذبية براسه علما طلع بالقوانين المشهورة ! هذا كله حسب الموجود في الرسائل المتبادلة بين أقاربه وأصدقاءه أيامها والرسائل موجودة لي اليوم، بالخصوص مذكرات جون كونديت – John Conduitt المساعد الخاص لنيوتن.

غير هالكلام ماكو شي ثابت، حتى انه فاشل بالدراسة محد يقدر يتأكد من الموضوع قبل أيام الجامعة، أقصى ما يقولونه كان واحد عادي ما يهتم وايد بدروسه بسبب انشغاله بالعمل حق الطلبة الأغنياء ودفع مصاريف الدراسة. بعدين بالصدفة انتبه عليه أحد الدكاترة اسمه إسحاق بارو – Isaac Barrow وشاف الولد مفتّح ومخه نظيف عاد استلمه وقعد يعلّم فيه ليما برز وصار مشهور. وأثناء دراسته وبداية شهرته انتشر الوباء في منطقة جامعته ولا يقررون إيقاف الدراسة عاد رجع المزرعة بين سنة 1665 إلى 1667 وأخذ له فترة نقاهة، يقولون هالفترة اللي قعد فيها طلع فيها بأقوى اكتشافاته، منها اكتشف طبيعة الشعاع الضوئي وتكوينه من الألوان السبعة، ومنها شاف التفاحة تطيح وطلع بالنظرية ومبادئ الحساب وغيره، من كثر ما بدّع الحبيب وهو يفكر خلال هالسنة سموها “سنة المعجزات”.

بالأول أمه حاولت تخليه فلاّح يشتغل بمزرعتها قبل لا يدش الجامعة بس ما ترقّع كلش ، كان حده فاشل بالزراعة ولا تقول خلاص يبه روح شوف إذا الدراسة تنفعك، عاد بعدها راح جامعة كامبريدج على حسابه ومن جذي كان يشتغل ويعتمد على روحه في دفع المصاريف.

يمكن قليل يذكرون هالشي بس ترا نيوتن ما اشتهر بس عشان نظرية الجاذبية وخلاص، نيوتن كان عــجـــيب في استعماله للتجارب العلمية وتسجيله للملاحظات بدقة رهيبة تميّز فيها بين العلماء بأيامه وصار يضربون فيه المثل بهالمجال. هذا بالإضافة إلى إلمامه بالعلوم المختلفة مثل الرياضيات، الفيزياء، الفلك، الفلسفة، الخيميا، الطب وغيره.

اللي شجّعني أكتب كل هالموضوع هو مروري على هالمعلومة:

شجرة التفاح الأسطورية اللي نيوتن شاف التفاحة تطيح منها موجودة لي اليوم وعمرها أكثر من 350 سنة! الشجرة صايرة بمزرعة أمه في لينكولنشير، إنجلترا – بالتحديد في Woolsthorpe Manor، ولي الحين تعطي محصول تفاح بكميات جيدة سنوياً في موسم الصيف. هذي بعض الصور للشجرة في أوقات وزوايا مختلفة:

وهذا البيت اللي انولد فيه نيوتن واليوم صار معلم سياحي للزوار:

هذي صورة لرسم الشجرة ومكانها بالمزرعة رسمها أخو نيوتن تشارلز ترنر – Charles Turnor سنة 1820، تقدرون تلاحظون الشبه الكبير بين الرسمة و الصورة الأولى للشجرة فوق:

من سنة 1750 تقريباً ومزرعة أم نيوتن مؤجرة على عايلة وولرتون – Woolerton اللي اعتنوا بالشجرة واهتموا فيها حيل. في إحدى العواصف سنة 1816 صارت عاصفة قوية وشلعت الشجرة من الأرض وانكسر بعض أغصانها، بس قدروا يردونها بالأرض مرة ثانية وسلمت. في سنة 1976 عطوا زرعوا فرع من الشجرة في حديقة قسم الفيزيا بجامعة يورك – University of York وكبرت طبيعي والناس تشوفها كمصدر إلهام ورمز علمي، هذي صورتها في الجامعة:

وهم في أفرع ثانية لنفس الشجرة بجامعات ثانية مثل جامعة ترينيتي في كامبريدج وتفتز وغيره.

قول زين نيوتن ما لحق علي ولا كان الحين متحبط وهو مو قادر يوصل مواصيلي بس يالله ما عليه أهم شي الأخلاق يا جماعة!

المصادر/

University of York

How Stuff Works

Atlas Obscura

,   | 

9 Responses to “حقيقة قصة نيوتن والتفاحة”

  1. شكرا ﻛﻤﻴﻞ

  2. وأخيــرا شفت الشجرة قبــل بـس نسمـع عنهـا الحيـن نقدر نقتنع بالمـوضوع ..

    تسلم كميـل ..

  3. كميل شلون اخو نيوتن اصغر منه بميتين سنه
    يعطيك العافيه توني ادري عن تحصيله العلمي
    مو احنا كنا ماخذين فكره ان كل عالم او مكتشف اهو فاشل اكاديميا او ناط الطوفه

    • اف اي والله أشكركم عالملاحظة، انا نقلت المعلومة بالضبط من موقع الجامعة ورحت تأكدت شفتها صح 1820!!

      مادري ليش كاتبين اخوه أكيد في غلط!

      His brother the, Rev. Charles Turnor, drew the accompanying picture of the tree in 1820 showing its position with respect to the manor house.

  4. مادري ليش كاتبين اخوه أكيد في غلط!

    يمكن أخوه في الأسلام

  5. ههههههههههه كهكهكه مرة شاد حيله لو أحنا ذحين كان لفينى على الفصول وأنطقينىhttp://www.kumailplus.com/wp-content/plugins/wp-monalisa/icons/kml_cry.gifhttp://www.kumailplus.com/wp-content/plugins/wp-monalisa/icons/kml_thumbs_up.gifhttp://www.kumailplus.com/wp-content/plugins/wp-monalisa/icons/kml_smile.gifhttp://www.kumailplus.com/wp-content/plugins/wp-monalisa/icons/kml_happy.gif

Trackbacks/Pingbacks

  1. خوش سؤال بس ما طاحت على راسه بالأساس | Kumail+ - February 12, 2011

    [...] 12. Feb, 2011 @ 1:00 pm 0 Comments Feb 12 تكلمت عن قصة نيوتن والتفاحة كاملة هني عرض الحجم الأصلي للصورة   Tweet apple, history, [...]

Leave a Reply

 
%d bloggers like this: