معنى حركة اليد اللي يقولون عنها علامة الشيطان

Nov 08

واحد من الشباب بالدوام -أول حرف من اسمه بوعدنان- قال هالحركة يعني شعار الماسونية، قلت خلاص يبيله موضوع ومعاه بالمرة معنى حركة ايد رونالدينيو اللي يسويها بعد ما اييب قول.

دوّرت بالنت ولا ألقى موضوع بمنتدى يحذر من الماسونية طويل عريض وحاطين هالحركة انها علامة الشيطان ومصورين شخصيات مشهورة مسوينها يعني كلهم يتبعون الماسونية ويعني ديروا بالكم يا جماعة ترى رحنا وطي خلاص

من الأخير يسمونها (ILY Sign) ماخذينها من لغة الإشارات الأمريكية – American Sign Language وانتشرت في الوسط الاجتماعي والعالمي عبر السنين وقاموا يستخدمونها بشكل أوسع كتعبير عن التشجيع أوالتفاؤل.

ILY اختصار حق I love You

يقولون تاريخ الحركة يرجع للغة الإشارات من 1905م! اشتهرت الحركة بصورة قوية في السبعينات أثناء الانتخابات الأمريكية لما استخدمها المرشح وقتها جيمي كارتر بعد ما شافها من مجموعة من الصم يشجعونه يعني يقولون له نحبك. عاد بعد ما فاز بالانتخابات وشاف مجموعة منهم مرة ثانية بالشارع ولا يسوي لهم الحركة وصوروه ونشروا الصورة في الصحف.

تقدرون تشوفون هالكلام في الويكيبيديا وعشان تصدقون أكثر شوفوا نتايج البحث في قوقل عن “ILY Sign”.

ابتلشت بالموضوع خلصته بسرعة، قلت أحط عن حركة رونالدينيو اللي يسويها بإيده:

مسكين هم قالوا عن حركته علامة الشيطان بس يوم دورت أثاري اسمها إشارة الشاكا – Shaka Sign ويربطون الحركة بجزر هاواي و روح الألوها – Aloha اللي هي الروح الاجتماعية الطيبة (مو روح آلهة ياحظي والله تعقدنا مع هالعالم )، معناها الأساسي يرمز للصداقة والتفاهم بين مختلف الشعوب والثقافات اللي يعيشون بهاواي. يختلف المعنى على حسب الاستخدام والموضوع، يعني يقدرون يستخدمونها عشان يقول الواحد “كولوه تمام”، أو “كوول”، أو “يااااعيني”، أو “نشوفك بعدين”، أو “هلا”، أو “مع السلامة”، أو “كُميل بس ذبحتنا”:

a gesture of friendship and understanding between the various ethnic cultures that reside within Hawai’i, and thus it does not have a direct semantic to literal translation. Depending on context it can also be used to communicate notions such as “all right,” “cool,” “smooth,” and the like.

عاد مسلكين لزقوها فيه بالمنتدى الريّال ماسوني ويسوي علامة الشيطان التفصيل كامل مع معلومات إضافية تحصلونه في ويكيبيديا.

, ,   | 

28 Responses to “معنى حركة اليد اللي يقولون عنها علامة الشيطان”

  1. السلام عليكم

    كميل، ياليت ماتطري امور الماسونيه مره ثانيه لان اخوك يمكن اكثر واحد بحث عنهم بلكويت

    المهم الماسونيه ياخوي منتشره انتشار مايعلم فيه الا رب العالمين، ولهم اشاراتهم الخاصه

    الله العالم هذي منهم او لا، بس هم اصلا شهرتهم اساسها من الاشارات وطريقه تعارفهم على بعض

    وطبعا الحين شنو وصلوله، الله اعلم

    • ابحث عن سلسله the arrivals
      وراح تعرف كل شي عنها
      كميل انت احد افضل مدونات عندي :)
      ياليت تكتب موضوع عن الماسونيه و شنو هدفهم علشان الناس تنتبه

    • بذمتك عبدالعزيز ، إنت مصدق كلامك ؟!!

      مبين إن إنغسل المخ :)

  2. السلام عليكم

    يعطيك العافية كميل، ليش ماذكرت علامةالشيطان لأنها قريبة منها الإختلاف في الإبهام.

    وهذا رابط ويكبيديا

    http://en.wikipedia.org/wiki/Sign_of_the_horns

    وتستخدم (علامة الشيطان) لإبعاد العين أو الشر، ولها دلالات أخرى

    • وعليكم السلام والرحمة والله يعافيكم،

      ما طرا ببالي علامة الشيطان صراحة بس مشكورين عالتنبيه والرابط، جذي يكتمل الموضوع ويبين الفرق بين الإشارات.

      كل الشكر

  3. على فكرة يا كميل موقع “Wikipedia” محتواه قابل للتغيير من أي شخص فلا يعتبر مصدر موثوق فيه.

  4. بالضبط.. هاذي حركة الحب اللي حتى بنتي الصغيرة تسويها و مستانسه عليها

    حركة قرون الشيطان اهي اللي قالت عنها علياء ، تستخدم حركة قرون الشيطان أكثر شي في حفلات الروك على شكل رقصة بحيث تلقى الجمهور رافعين إيدهم بهالحركة و يسوون الـ
    head bang
    و فيها يتم هز الرأس فوق و تحت كأن الواحد قاعد يرقع راسه بالطوفة

    يعني جذي :

  5. 3ajiiib al mw’9o3 =D .. KEEP IT UP ;]

  6. هذه الحركة هي حركة يستخدما عبدة الشياطين . وانتها الموضوع

  7. Anton LaVey من مشجعي هذه الحركة

  8. لوووووووول انتهى الموضوعي ا كُميل وراك تجادل..قلنا انتهىىى ..ههههههه ..

    موضوع حلو ولفته حلوه..وصج علامة الشيطان بدون الإبهام..وهذره الناس ماتخلص وكل شي صار عندهم ماسونيه وكفر وسب للإسلام..مادري من وين يفكرون..يمكن من ركبهم؟؟شيدرييك!!!


  9. هل انت ماسوني

  10. هالحركة اللي أعرفه عنها إنها علامة الشيطان عند ضم الإبهام مع الوسطى مع البنصر (الاصبع الرابع)، ويقال بأنه الشيطان يشبه رأس التيس وهالحركة يشابهون فيها رأي التيس. الثلاث أصابع المضمومة (خشة التيس) والإصبعين اللي فوق قرونه أو أذونه.

    رمز الماسونية هي النجمة الخماسية اللي طرفيها اللي فوق يمثلون قرنين وطرفيها اللي بالوسط يمثلون أذون التيس وطرف النجمة اللي تحت يمثل لحية التيس أو ذقنه أو حنجه، وهالحركة البعض يعتبرها محاكاة لوجه الشيطان.

    هالحركة تمثل الصليب النصراني لمن يتم إنزال الوسطى مع البنصر (الاصبع الرابع) ومد اصبع السبابة والإبهام والخنصر (الاصبع الخامس) ولو تسوي هالحركة مع مد السبابة للأعلى تلاحظ إنها فعلاً شكل صليب.

    الغرب يعتبرون المسلمين مفرطين بالحساسية ضدهم ويعتبرون أي حركة أو كلمة استهداف لهم ويصبون في قالب نظرية المؤامرة، قد يستخدم هذي الحركة فعلاً عبدة الشيطان أو النصارى ليرمزوا بها على معتقدات وأشياء تخصهم، لكن يمكن أن يستخدمها ناس آخرين لأغراض ثانية.

    أنا عن نفسي أعتبرها حركة الحب، أذكر كان يسويها المصارع سنوكه لجمهوره عشان يعبر عن حبه وتقديره لهم، يعني بالله سنوكه كان يسويها لأنه يعبد الشيطان أو عشان يقول ترى أنا نصراني، قطعاً لا.

    في ناس حتى علامة النصر قالوا هذي رمز للنصارى لا تسوونها وبأحد المواضيع واحد مجتهد ومجمع رموز الماسونية لقيت حتى علامة التوحيد وهي رفع السبابة لأعلى من ضمن رموز الماسونية؟!

    أعتقد ماله داعي نكون مفرطين بالحساسية لمثل هالرموز، عن نفسي لمن أشرح لأحد درس معين أو نقطة معينة كانت من عادتي أن أشير باصبع الوسطى ومتعود على هالأمر الين ما اكتشفت إن بعض الناس وصغار السن بالذات يفهم هالحركة بطريقة تعرفونها، طبعاً هذي مشكلتهم مو مشكلتي.

  11. هلا أخوي ، مو الصورة الأساسية اللي رافع السبابة والخنصر شعار حق فرقة heavy metal
    اللي يسوون كليبات وأغاني بمعادن ثقيلة وإقاء بطيئ يخليك تحس بالرعب وطبعا أفكارهم كلها مرعبة !!! ؟؟؟

  12. azeedik min il shi3ir bait bil kuwait il bikers use it 3ashan kil 2 yamshoon yam ba3ath eseer taboor 2 ib 2 7ag tal3at il group
    http://www.motorcycletouringusa.net/motorcycle-riding-clubs/group-riding-hand-signals/

  13. صراححه وصلوا الشباب الى مرحله تحتاج علاج نفسي وبالزياده السعوديين يقلدوا اي شى حاله عن جد

  14. هذي حركة بافويت اللي رأسه جدي وجسمه انثى عريانه وعنده اجنحه وذيل طويل وهو يجلس القرفصاء وهو شيطان الماسونية الذي يسظهر لهم الدجااال

  15. شكرا على التنبيه

  16. شكرا جبايبي والله افدتونا

  17. يا اخي من تدور مرة اخرى ركز شوية الصورة اللي مخليها فوك شكل و حركة رونالدينيو شكل و اللي تقصدها بالاصل غيرهم اثنيناتهم…. اللي انت مخليي رفع ثلاث اصابع.. مالت رونالدينيو الاول والاخير… و اللي تقصدها هي رفع السبابة و الاصبع الاخير و ضم بقية الاصابع بما فيها الابهام … مو مثل اللي انت مخليها.. و هاي هية الحركة الماسونية…ابحث من جديد اخوية…

  18. يا اخواني حركة الشيطان هي اللي تكون الابهام والخنصر لفوق والابهام مربوط مع الوسطى والبنصر
    بس هدي الحركة تعني الحب وهي موجودة عند الصم البكم وكمان عندهم بالعربية هي حرف ياء
    وبالنسبة لموضوع الماسونية اظن انه غرضهم من نشر هده الاشرطة اللي تشهر فيهم وهده العلامات ليشوشوا افكارنا مو اكثر لدى ارجو بااخواني انكم ماتغوصون كثير في هده المواضيع
    “ويقال للفائدة “الاسرائليات لاتصدقوها ولاتكذبوها يعني يكفي انك تاخد عنها فكرة وبس
    والله المستعان والسلام عليكم
    اخوكم الجزائري

Trackbacks/Pingbacks

  1. Tweets that mention معنى حركة اليد اللي يقولون عنها علامة الشيطان | Kumail+ -- Topsy.com - November 8, 2010

    [...] This post was mentioned on Twitter by Abdulaziz Saud, Kumail+. Kumail+ said: معنى حركة اليد اللي يقولون عنها علامة الشيطان http://bit.ly/9jxray [...]

  2. واحد يقول لي انت ماسوني | Kumail+ - February 26, 2011

    [...] Gallery+ 26. Feb, 2011 @ 10:30 pm 0 Comments Feb 26 الأخ شعيب مادري شفيه افتلت علي بهالتعليق الغريب في موضوع معنى حركة اليد اللي يقولون عنها علامة الشيطان، [...]

Leave a Reply

 
%d bloggers like this: