علاقة الفيتامين ج (vitamin C) بالنشلة

Nov 14

نصابين!

كعلاقة البطاط المدور بالفول.

حتى انا كنت مصدق هالمعلومة وماخذ عليها سنين، كلما انتشلت أو حاشتني انفلونزا أو حتى صخونة كنت آخذ كل يوم فيتامين سي أو (بالعربي فيتامين ج) فوّار. من اللي شفته خلال السنوات اللي فاتت وايد ناس يشاركوني بهالإجراء الاحترازي، وببالنا الفيتامين يقلل من أثر الانفلونزا أو يشفينا منها –بإذن الله سبحانه طبعاً- خلال فترة أقل من المعتاد. لا ومرات إذا حسيت أبي أنتشل كنت أطيح له بالفيتامين عشان يوخر النشلة قبل لا تحوشني.

شنو الفيتامين سي (ج) أصلاً؟

من الفيتامينات المهمة اللي تساعد الجسم على منع التأكسد، تحافظ على الصحة والعظام والعضلات والعروق والسعابيل تصير تلمع مثل قطع شوارفسكي. هالفيتامين يساعد على تكوين شغلة اسمها كولاجين تساعد على امتصاص الحديد…

المهم يعني الفتامين أقشر وزقرتي وكل هالكلام الحلو .

على كل هذا وما ينفع مع النشلة؟

الأدلة الأخيرة المتوفرة تقول العلاقة حيل ضعيفة إلى معدومة بين دور الفتامين سي مع النشلة. خاصة بالكمية اللي ناخذها بحبة الفوّار اللي تعتبر كمية شبه كبيرة عن النسبة الطبيعية اللي نحصلها بالفواكه (الفواكه المشهورة بتركيز الفتامين سي (ج) يقولون أكثر شي الفراولة، بعدين البرتقال والكيوي والبطيخ وباجي الشلة). يعني الكمية القليلة المعتادة اللي نحصلها من الفواكه كافية لتأدية الغرض المحدود للفيتامين وماكو دليل للحاجة إلى كمية أكبر، وماكو شي يثبت إذا خذينا كمية أكبر راح ينفعنا الفيتامين أكثر، بالعكس مرات يضر أكثر مما يفيد، على قولة المثل اللي ألفته وانا اكتب هالموضوع: “كل شي زاد عن حده انقلب ضده” .

بدراسة صارت سنة 2007 شافوا إذا الناس خذوا 200 ملغم من الفيتامين بعد إصابتهم بالنشلة ما يقلل من قوة النشلة ولا يقصّر من مدتها، وإذا خذيتوا الفيتامين يومياً التأثير ما يزيد عن 8% حق البالغين و 14% حق الأطفال. الكمية هذي من الفيتامين تساعد أكثر شي الناس اللي يمرون بظروف شديدة مثل الرياضيين بسباقات الماراثون عشان يعوضون عن الضعف الجسدي والمناعي بعد إنهاء السباقات الطويلة. التأثير عندهم يقلل فرصة الإصابة بالنشلة بالنص!

يعني الحين الفيتامين اللي ناخذه يضر؟

ان شاء الله ما فيه ضرر إذا كان بالكمية اللي ينصح فيها الطبيب، مابي أنقل رقم يبين الكمية عشان ما أحط بذمتي، شفت اختلافات بين بعض المصادر، ديروا بالكم إذا زادت الكمية عن المسموح احتمال يسبب أحجار بالكلية، إسهال، ولوعة جبد.

من وين خذوا الناس هالمعلومة الغلط عن الفيتامين؟

من كتاب انطبع سنة 1970 اسمه (Vitamin C and the Common Cold) لعالم الكيمياء لاينوس بولنغ – Linus Pauling اللي فاز بجائزة نوبل للسلام. الكتاب يشجع أخذ كميات كبيرة من الفيتامين للحد من أثر النشلة وتقليل مدتها. الكلام في الكتاب غير مدعوم بأدلة قوية ومخالف للمعلومات والتجارب الثابتة عن الفيتامين في الوسط الطبي والعلمي.

بس الناس عباقرة ما يهمهم كلام أحد، ما صدقوا واحد قال عن حل بسيط لمرض قثيث مثل النشلة، تشققوا عالكتاب وقام سوقه حيل! والشركات تشققوا أكثر قاموا ويبيعون الفيتامين بكل مكان ويربحون من الناس اللي قزرت عليهم السالفة لول.

هذي صورة الكتاب:

ليش قلت أول الموضوع “كعلاقة البطاط المدوّر بالفول”؟

البطاط المدور والفول مو متعودين نشوفهم بصمونة وحده، بس ينباعون يم بعض ومتعودين نشوفهم بمنيو المطاعم، واذا سويناها وكليناهم مع بعض ما راح يضرنا بشي ولا راح نستانس عليه ذاك الزود،،،

شرايكم فيني وانا أقص البلاغة قص

المصادر/

WebMD – Vitamin C for the Common Cold

NPR – The Vitamin C Myth

Lifetwo – Vitamin C and the Common Cold; Dispelling Myths

Wikipedia – Viatamin C and the Common Cold

, ,   | 

8 Responses to “علاقة الفيتامين ج (vitamin C) بالنشلة”

  1. Lool vitamine agshar ha
    ana marra we9folee l fawwar hatha lamma 7ashtny flu
    l thaher 7atta l dr kan gary hal ktab

  2. الي ادري عنه هل فيتامين يسوييلك وقاية من الانفلونزا و وايد من الامراض بس لما تكون بحالة المرض, ماراح ينفع تاخذه وثاني شغلة اهو يساعد على هضم اللحم والكلام ان وقاية من الامراض هل كلام صحيح لان انا يومياً مضطر اخذ فيتامين سي (عصير فراولة ) لان عندي مشاكل بالهضم والتغذية و المعدة والقولون هههههه و سوء التغذية تقلل المناعة

    • تأثيره في الوقاية من الانفلونزا والأمراض محدود جداً سواءاً قبل أو بعد الإصابة بالمرض، وطبعاً الحالات الخاصة ما تدخل ضمن هالكلام ولكل قاعدة أحكام ;)

  3. مو جنها لكل قاعدة شواذ؟؟؟؟
    فيلسوووووف كبير
    يا كبير

  4. والله عاد قاري هالدراسة و أدري إنه الفيتامين سي ما يسوي شي بس الناس وايد مصدقة

    حتى لما أروح صيدلية أسمعهم يطلبون فيتامين سي و أتحسر بقلبي على الناس اللي ما تقرى

  5. انا سمعت ان اخذ كميات كبيره من فيتامين سي
    مضر ويمكن يسبب نزيف بالمخ الله يكافينه الشر

    ابي اقول شي عن فيتامين سي بس مستحي
    سنه من السنين تكرمون البول صار لونه قريب من الاخضر انا عبالي البروتين زايد او التهاب
    ولما عملت فحص قال لي المختص انتا سليم بس فيه شيء واحد عندك مرتفع وهو فيتامين سي!!ـ

    فكرت وقلت من شنو يت هالزياده؟
    جان اقول اي انا من ايام هديت البيبسي وبديت اشرب عصير تانك والتانك مدعم بفيتامين سي

    ومن يومها قاطعت التانك
    وصار لونه طبيعي!ـ

  6. مرحبا استاذ كوميل ..عندي ملاحظه
    يقول المثل اسأل مجرب و ا تسأل طبيب
    انا و غيري واااايد اخذ فيتامين سي يقلل نسبة الاصابة بالنشله والانفلونزا بشكل كبير
    و اذا كنت متأذي من النشله و الكحة اخذ فيتامين سي يوميا و كلها من يومين لي ثلاث و المرض يطيييير و هالكلام عن تجارب لي و ليغري كثير
    فما ردك
    و ازيدك مره تأذيت من اعراض مجالسه المدخنين الشرهين بالدوام الي اهي كحه و حكة خشم و سييييل سناسييين ما يوقف و صدقني ادويه المستوصف ما سوت اي شي بس فيتامين سي ما شاء الله وحده بوحده
    و هلم للعلم غيري مجربها وايد و انفعت بجداره
    ؟؟؟؟؟؟؟؟؟؟؟

    • يعطيك العافية اخوي بوجمال،

      كلامي بالموضوع انه يقلل من تأثير النشلة بنسبة بسيطة حيل أما الفترة مثل ما قلت يومين وثلاثة وتطير فهذا كان مع ولا بدون الفيتامينات راح تطير تطير، كله حسب الإحصائيات وكلام المختصين وشافوه واقعي. حتى انا مجرب وصج كل مرة اطيح مريض يومين ولا ثلاثة اصحى، وبعد ما قمت اخذ الفيتامينات هم نفس الشي، يعني ماكو فرق ما صارت مدة المرض أقل ولا أخف إلا إذا كنت من ضمن المجموعة اللي تكلمت عنهم من الرياضيين وأصحاب الماراثونات اللي يبذلون جهد كبير.

      أما تأثير التدخين عليك هذا شي منفصل، هالموضوع بس عن ظاهرة انتشار استخدام فيتامين سي للنشلة والانفلونزا فقط

      تحياتي

Leave a Reply

 
%d bloggers like this: