منجم ملح في أوكرانيا لعلاج المشاكل التنفسية

Nov 19

تحت الأرض بمئات الأمتار، مع الصور.

اسمه منجم سولوتفينو – Solotvyno Salt Mine ويعتبرونه موطن للنقاهة الجوفية، أي مريض يعاني من مشاكل في الشعب الهوائية أو الربو يدزونه هناك عن طريق مستشفى سولوتفينو المتخصص بأمراض الحساسية عشان يشم هوا مخلل بالأملاح.

المكان بروحه صخة هدووووووووءءء حتى المتعافي يتعافى أكثر من السكون، بس المشكلة من ناحية الأمن والسلامة المكان قنبلة موقوتة، بالضبط مثل حال أسطول الخطوط الجوية الكويتية عندنا لول. يقولون تشوف يهال قاعدين أو يلعبون ولابسين خوذات أو حاطين قطع بلاستيكية فوقهم عشان تحميهم من الماي اللي يقطر من السقف، المنظر -زيادة على الهدوء وشكل المكان- يخليك تحس كأنك بحلم غريب .

يسمون هالنوع من العلاج سبيليوثيرابي – Speleotherapy أو العلاج بالملح – Salt Therapy عن طريق استخدام الكهوف أو المناجم لأجواءها الملحية، بالعربي أعتقد يسمونه العلاج بالمغاور. مشهور بشرق ووسط أوروبا من الخمسينات وانتشر عن طريق بولندا بعد ما لاحظوا ندرة إصابة عمال المناجم الملحية بمشاكل رئوية وأمراض الربو والسل. الدكاترة عندهم يقولون الأملاح في الهوا تقضي على البلغم والكائنات المجهرية المسببة للمرض بس بباجي دول العالم قليل يوافقون هالراي ويقولون الأدلة قليلة بخصوص هالفوائد. حتى بعضهم يقول أثر العلاج يكون من التجربة وشكل المكان أكثر من الفائدة الحقيقية للأملاح في الهوا.

هالمنجم يُعتبر الأعمق تحت الأرض ومخصص لهالنوع من العلاج في العالم. يستضيف حوالي 5 آلاف مريض سنوياً، في أي وقت يكون عندهم حوالي 200 مريض قاعد عندهم، ثلثهم من الأطفال، يزورون المكان لجلسات بعد الظهر او يقضون ليلة كاملة لمدة 24 يوم على التوالي.

اللي يحير الواحد إذا كان هذا صج منجم لعلاج المشاكل التنفسية وأمراض الرئة عيل شكو حاطين غرفة للتدخين؟ شوفوا الصور:

1- أحد الممرات في المنجم

2- كراسي بجانب سكة حديدية قديمة

3- الجناح الرئيسي

4- أرفف، شكله محد مأمن عليها الكل يخاف تطيح باللي فيها.

5- المرضى خامدين

6- منطقة خاصة للتدخين!

7- كافتيريا المستشفى.

8- مكتب الطبيب، مادري شكو حاط جهازين أوتي يمكن فاتح مصبغة بنفس المكتب.

9- جهاز طبي مادري شنو يسوي، يمكن يحك الظهر، الله أعلم.

10- في أحد غرف العلاج

المصدر/

Wired – Eerie Ukrainian Salt Mines House Convalescing Asthmatics

4 Responses to “منجم ملح في أوكرانيا لعلاج المشاكل التنفسية”

  1. لووووووووول مت ضحك عالمصبغه
    يعطيك العافيه كميل والله افضل مدونه بالكويت

  2. أنا لو أروح هالمكان بصيدني ضيق تنفس
    المكان كتمة وضيج ويخرع مع هالإنارة

    يعطيك العافية عالمعلومات

Trackbacks/Pingbacks

  1. Tweets that mention منجم ملح في أوكرانيا لعلاج المشاكل التنفسية | Kumail+ -- Topsy.com - November 19, 2010

    […] This post was mentioned on Twitter by Ibrahem AlSuhaibani and Saad Alkhudairy, Kumail+. Kumail+ said: منجم ملح في أوكرانيا لعلاج المشاكل التنفسية http://bit.ly/aWub6c […]

Leave a Reply

 
%d bloggers like this: