قائد الاوركسترا شنو يسوي بالضبط؟

Nov 27

هاللي يوقف جدام الفرقة ويهوّش بالعصا مثل المينون فوق تحت ويمين يسار وينفعل ويعيش الدور،،، ليش موجود أصلاً؟

هالسؤال وصلني من الأخ العزيز مساعد، يسأل عن حركات قائد الأوركسترا هل لها معنى ولا بس جذي خرابيط على روسنا، عجبني سؤاله ورحت اشوف الجواب.

تذكرت حلقة توم وجيري يوم يتهاوشون و اهم يقودون الفرقة ونشوفهم أثناء النجرة يحاولون يحركون العصا على طول، ويوم يتنرفز واحد منهم ويحرك العصا بسرعة الفرقة كلها تعزف معاه بنفس الطريقة. طلع هالشغلات صج تلعب دور.

أثاري القائد له معنى ووجوده مهم للمجموعة، يعني مو حاطينه زينة جدام العالم . معظم شغله يكون أثناء التدريب عشان يضبّط شغل الفرقة كلها ويدرّبهم على مستوى السرعة والدور ودرجة الصوت والإيقاع والتداخل وكل هاللوية، بعدين حزة العرض يكون شغله أكثر شي إشرافي ورابط بين مجاميع الأدوات الموسيقية المختلفة لضبط التوقيت. يمكن أحسن تشبيه لدور قائد الأوركسترا هو المخرج في الأفلام اللي يختار المشاهد وترتيبها ودور كل ممثل والتناسق العام للمشاهد وترتيبها في الفيلم النهائي .

إذا كان العازف شخص واحد تصير السالفة سهلة اهو ينسّق عزفه بروحه محد داش بالموضوع معاه، بس يوم يصير مجموعة كبيرة هني تصير مشكلة، أيام أول كان العزف أكثر شي انفرادي بس بعد التطور (خاصة بعد زمن بيتهوفن) صاروا يقعدون فرق كبيرة وقاموا يعتمدون على عازف أساسي بينهم وغالباً كانوا يختارون عازف الكمان عشان يطالعون حركة عصايته أثناء العزف لغرض التنسيق بين الجميع. بعدين قالوا لا يبه يبيلنا واحد متفرغ يركز على هالشغلة ويجابلنا، عاد بدوا بهالشغلة خلال القرن السابع عشر مع العصا، شافوا العصا أوضح وأسهل من استخدام الايادي أو حتى كانوا قبلها يستخدمون أوراق ملفوفة ويحركونها.

كلما يزيد عدد العازفين وأنواع أدواتهم كلما يصير شغل القائد أصعب، وإذا كانوا يعزفون بحفل أوبرا يكون هذا أصعب شي، القائد لازم ينسق مع الفرقة والمغني والمسرحية بعد.

بس ما اشوف الفرقة يطالعون القائد و اهم يعزفون عشان نقول قاعد ينسق بينهم!

أكيد ما يطالعونه طول الوقت، بس الأوقات اللي تستلزم التنسيق مثل يوم مجموعة أداة معينة لازم يدشون بالعزف أو يوقفون، أو يوم واحد منهم يبي يتأكد من سرعة عزفه أو ترتيبه مع الباجي. غير هذا تلقاهم يطالعون أوراق المقطوعة عشان يتابعون مع القطوعة بالضبط.

زين والحركات بالعصا يعني لها معنى أصلاً؟

إي، حركاتهم بالهوا مثل لغة إشارة يفهمونها أعضاء الفرقة، في شرح مفصل بالمصادر لبعض الحركات العامة المشهورة ما أقدر أشرحهم بالتفصيل وايد دوخه وانا مو صوب الموسيقى ذاك الزود، هم مرات كل قائد يقدر يسوي حركات يديدة يفهمها ربعه حسب الحاجة. هذي بعض الحركات عالسريع:

يعني ما ينفع أستعبط واقلد حركاتهم جدام فرقة عشان أمشّي حال مقطوعة؟

إنسى  ! إذا صرت جدامهم وقعدت تحرك ايدك بس جذي الكل راح يعزف بصوب وراح يبين انك عبيط.

المصادر/

Wikipedia – Conducting

The Horn

, ,   | 

12 Responses to “قائد الاوركسترا شنو يسوي بالضبط؟”

  1. mmmmmmm
    oo ana 6ool 3mre afakr shno ga3ed yswe :)

  2. أنا كنت أقول هذي ما يسوي شي
    الفرقة هي اللي تعزف ويطالعون بالاوراق
    وهو ما منه فايدة

    بس طلع منه فايدة مو لنا للفرقة
    ويعطيك العافية عالتوضيح
    ^_^

  3. حبيت المعلومة وايد :)

  4. مشكور كُميل على الموضوع

    وهذا توضيح للموضوع بفيديو

    لأحد قيادي الأوركسترا

    :)

  5. Wallah w 6l3 dora kbeer w7na 3balna ywst3bi6 ;Pp

  6. اذكر احد من حفلات محمد عبده, نسو إيبوون اوراق الألحان, فاظطر انه يلحنها بنفسه, وظبطت معاه.

  7. مدري ليش كنت أحس كل ما أشوف مايسترو أحس أنه داخل جو لا أكثر و لا أقل < تقيس على نفسها
    xD
    يعطيك العافية
    :D

  8. يعني القائد زي الأم من غيرها البيت ينهدّ
    الله يخلي لنا امهاتنا ويرحم الميت منهم

    ويعطيك العافيه شرحك جميل ورائع

  9. نايس والله من زمان نفسي اعرف هالشي يسلمووو

Trackbacks/Pingbacks

  1. Tweets that mention قائد الاوركسترا شنو يسوي بالضبط؟ | Kumail+ -- Topsy.com - November 27, 2010

    […] This post was mentioned on Twitter by Abdulaziz Saud, Kumail+. Kumail+ said: قائد الاوركسترا شنو يسوي بالضبط؟ http://bit.ly/fUlzBO […]

Leave a Reply

 
%d bloggers like this: