مكتشف ابتسامات الأنترنت المكتوبة :) و :(

Dec 04

ويهه بشوش يلوق عليه الاكتشاف.

من فترة وصلني سؤال من الأخ رحال بخصوص السمايلز أو الابتسامات وتاريخهم، تذكرت منه موضوع قريته قبل جم سنة.

بتاريخ 19 سبتمبر 1982م في الساعة 11:44 دقيقة صباحاً أرسل سكوت فالمان – Scott Fahlman مشاركة في المنتدى الخاص بعلوم الكمبيوتر بجامعة Carnegie Mellon University، نص الرسالة كان بالضبط كما يلي:

19-Sep-82 11:44 Scott E Fahlman  :-)
From: Scott E Fahlman

I propose that the following character sequence for joke markers:

:-)

Read it sideways. Actually, it is probably more economical to mark things that are NOT jokes, given current trends. For this, use:

:-(

وبعدها بجم شهر انتشرت بالشبكات الالكترونية المستخدمة أيامها، ومع الوقت صار عليهم بعض التعديلات المشهورة اللي نشوفها اليوم وطبعاً الناس ألفوا ابتسامات زيادة بنفس الطريقة.

هالشايب الحين يشتغل عالم كمبيوتر في جامعة Carnegie Mellon University وصار عضو في التجمع الأمريكي للذكاء الصناعي – American Association for Artificial Intelligence. هذي صورة حلوة حقه:

هالصورة ذكرتني بالابتسامة هذي  بس مادري ليش تحسه حابس الضحكة. هذي صور ثانية عجبتني:

يمكن سكوت فالمان كان أول واحد يقترح الابتسامات بهالطريقة بغرضها الإلكتروني، بس ما كان اهو الأول باكتشاف الابتسامات المكتوبة بشكل عام، أول ابتسامة مكتوبة مسجلة تاريخياً ومتأكدين منها ترجع لسنة 1881م في مجلة فكاهية أمريكية اسمها Puck، واحد اسمه أمبروز بييرس – Ambrose Bierce كتب اقتراح لاستخدام ابتسامة مكتوبة على هالطريقة /___\ ،،،، يعني شكل حلج مبتسم كاااك!

نوع ثاني من الابتسامات طلع سنة 1979 كان شكله جذي –) ويسمونه لسان في الخد – tongue-in-cheek يعني بالدول الغربية يقولون يوم واحد يبي يمنع نفسه من الضحك يدز خده بلسانه، وشكل الابتسامة يشبه اللسان والخد.

بعدين مع انتشار المنتديات في التسعينات وبعدها قاموا يستخدمون صور ويوه مليقة مثل اللي نشوفهم هالأيام بالمدونات والمواقع  بس لي الحين موجودة النسخ المكتوبة وطلع منها نسخ آسيوية وغربية وكورية.

الابتسامات الآسيوية مثل:

(^_^) أو 。◕ ‿ ◕。 أو (^o^)

(-.-)Zzz

(-_-;),

(-_-‘)

(-_-*)

(o_O)

(Z.Z)

(?_?)

(<.<)

/(^_^)\

(^_~) أو (^_-)

(;_;), (T_T) or (TT_TT) (T^T) or (Q_Q)

الابتسامات الكورية:

ㅇㅅㅇ

ㅇㅂㅇ

-ㅅ-

ㅡㅡ

ㅡ6ㅡ

‘ㅅ’

“ㅅ”

‘ㅂ’

‘ㅇ’

ㅇㅁㅇ

عاد الغرب استانسوا من الابتسامات الآسيوية وعدلوا عليهم شوي:

<(^.^)>,<(^_^<),<(o_o<),<( -‘.’- )>,<(‘.’-^)

لو مو هالابتسامات كنا نستملق المحادثات بالأنترنت كلها، مرات أكلم واحد مسنجر وعبالي معصب ولا متنرفز ولا زعلان بس بعدين يوم أشوفه يقول لا ماكو شي أصلاً كان يضحك وعادي، جو الأنترنت شوي غريب صعب ينقل مزاج الناس من جذي ماكو على السوالف ويه بويه. حتى بالمسجات مرات تصير فيك تكتب شي عادي بس تحس إذا ما حطيت ابتسامة أو ما كتبت “لول” راح يفهمها صاحبك كأنك زعلان ولا مالك خلقه عاد تنجبر فيها، بعدين تكره نفسك تحس مليق دمك ثقيل مو عارف تستخدم الابتسامات مثل الناس.

مشكلة هالناس

المصادر/

Wired

Wikipedia – Emoticons

Wikipedia – Scott Fahlman

,   | 

15 Responses to “مكتشف ابتسامات الأنترنت المكتوبة :) و :(”

  1. هذا عيب برامج المحادثة إنها ما تنقل المشاعر وتعابير الويه

    والله معلومات حلوة
    وتستاهل

  2. خوش كلام :)))
    حلوة هالمواضيع ومادري من وين تييبها ماشالله!

    أحلى شيء آخر جزء، صج صج إذا ماحظيت شيء حسبالهم معصبة ؛)

  3. لول وانت صادق
    لازم الواحد يعبر الحين بسمايلز
    ولا راح يفكرون غلط >_<

    ابدعت في الطرح

    thankx alot kumail =)

  4. اكثر شئ عجبني -(
    ههههههههههههه لسان بالخد

  5. عاد هذي ابتسامة عربية

    ر” <<شفتها مرة في منتدى

    احلى سمايل ذا < (:P)

  6. هههههه
    فعلاً نفس احساسي لما اكتب مسج خفيف ومستعجل ، شوي احس نفسي ثقيلة دم عشان ماحطيت فيس ولا ضحكه

    توثيق ممتع
    شكراً لك

  7. معلومات حلوة والله :)

    وعجبتني صورته وهو حاطها بالعرض حركة :D

    و سجل عندك ابتسامة عربية برضو

    ت

  8. Mohammed Al-Hassan Reply January 10, 2011 at 8:12 pm

    تصدق والله قبل كم يوم أقول مين أول شخص كتبها O_o
    مع إنه مو مبيّن عليه إنه راعي فيسات وسمايلات خخخ
    —> بالمناسبة ممكن تعرفلنا مين مكتشف الـ ( خخخ ) لو سمحت (هبالة أحط خخخ بعد السؤال ^_^ ) ..
    عطاك ربي العافية =)

  9. ^__^

    ^^^^^

    هذا اكثر وجه استخدمه حتى اكثر من الوجوه المليقة على قولتك ههههههه

  10. معلومات جميلة جداًً ومفيدة

    بالنسبة للمحادثات بالمسن وذا , كذا مرا يصير سوء تفاهم بسبب انو ماحطيت سمايلي للشخص اللي كنت احاكيه وفكرني كنت زعلانه

    كييب قوينق كميل , مواضيعك جداً جميلة ومفيدة

Trackbacks/Pingbacks

  1. Tweets that mention مكتشف ابتسامات الأنترنت المكتوبة :) و :( | Kumail+ -- Topsy.com - December 4, 2010

    […] This post was mentioned on Twitter by Ghadeer, Saja Abdullah and Ahmed Al Osaimi, Hajar Abdullah. Hajar Abdullah said: مكتشف ابتسامات الأنترنت المكتوبة :) و :( – http://bit.ly/e4yfKL […]

Leave a Reply

 
%d bloggers like this: