في بالعالم أراضي ما تتبع أي دولة؟ يصير ناخذها؟

Dec 07

يصير الواحد يروح يحط أغراضه ويقول وخروا عني هذي دولتي؟ وين صايره هالأراضي الغير مملوكة؟

راح أذكر مثالين حلوين عالسريع بعدين أجاوب،

المثال الأول:

قلعة بحرية قريبة من انجلترا، صايرة جزيرة صناعية بنص البحر بنوها أيام الحرب العالمية الثانية سنة 1942م. هذا مكانها عالخريطة مبين بالدائرة الحمرا:

أثناء الحرب العالمية الثانية وبحكم طبيعة انجلترا كجزيرة معرّضة للهجوم؛ قاموا يبنون خطوط دفاع مثل هالقلعة البحرية وينشرونهم في الساحل الشرقي والجنوب شرقي للتصدي لأي هجوم ويترسونهم أسلحة وذخيرة ومؤونة. بعد انتهاء الحرب محد قام يجيك على هالقلاع ولا يدرون عنها، صارت مهجورة إلا من بعض السياح الفاضين يمرون عليهم بس جذي عشان يصورون ويتمشون فيهم شوي.

هذي صورة لإحدى القلاع:

اللهم في إحدى القلاع كان في واحد يشتغل كرائد سابق في الجيش اسمه بادي روي بايتس – Paddy Roy Bates يستخدمها لبث إذاعة راديو غير رسمية (راديو قراصنة – Pirate Radio)، المشكلة الحكومات ما يحبون هالإذاعات لأنها تشوّش وتخرّب وما تتبع جهة رسمية، عاد صكروا قلعته وطلعوه منها عشان يفتكون من إذاعته .

الأخ عصّب ! وقال انا أعلّمهم هالشياطين ،،، راح قلعة بحرية ثانية اسمها HM Fort Roughs وهالمرة هالقلعة مكانها صاير خارج المياه الإقليمية البريطانية، صعد القلعة وقال هذي دولتي الخاصة وإسمها Principality of Sealand وانا أميرها، يقولون أثناء “احتلاله” للجزيرة صارت هوشة شوي وترمّي أسلحة مع ناس كانوا فيها يستخدمونها أيضاً لإذاعة قراصنة. المهم تالي احتلها وبتاريخ 2 سبتمبر 1967 أعلنها دولة رسمية مستقلة !

اليوم سيلاند – Sealand هذي موجودة وتعتبر إحدى الدول المجهرية – micronation وتقريباً الأصغر في العالم، مساحتها 550 متر مربع بس، يعني شوي أكبر من بيت حكومة بالقرين، صورة القلعة اللي فوق هذي لها وهم هذي اللي تحت.

تعداد سكانها 27 شخص حسب سنة 2010 ،

لغتهم الرسمية الإنجليزية،

يتعاملون بالدولار السيلاندي،

نظام الحكم فيها ملكي دستوري،

لا والحبيب مسويله موقع رسمي للدولة على الرابط: http://www.sealandgov.org يعني عايش الدور صح لوووووول!

اللي يضحك أكثر نشيدهم الوطني بس موسيقى من غير كلمات للنشيد !

هذا شكل علم الدولة:

حالة الدولة السياسية الحين مختلفين عليها، عالمياً مو معترفين فيها ككيان سياسي مستقل بس تاركينهم الظاهر لأنهم بنص البحر ومكانهم مو وايد حيوي ولا تحتهم نفط ولا يعترضون ممرات بحرية مهمة ولا أي شي. الحكومة البريطانية مالها سيطرة على القلعة لأنها خارج المياه الإقليمية محد يقدر يكلّمهم قانونياً. مافيها تربة، ولا جبال، ولا هضاب، ولا شوارع، ولا صخور، ولا أي معلم سياحي .

المثال الثاني:

جمهورية مينيرفا – Republic of Minerva، بسنة 1972م ناس فاضية راحوا جزيرة صناعية صغيرة حيل اسمها Minervan في البحر وقالوا هذي دولتنا المستقلة. الجزيرة حوالينها شعب مرجانية ومكانها الظاهر شوي أهم من المثال الأول، موجودة في المحيط الهادي يم أستراليا ضمن مجموعة جزر (أرخبيل) مملكة تونجا، تونجا تعتبر أقرب دولة لهالموقع، بس ما وصلهم خبر عن الميانين يبون يسوون دولة هناك دزوا مجموعة قوات مسلحة وقعدوا بالجزيرة… بس جذي قعدوا ماكو شي ، اللي كانوا يبون يخلونها دولة انحاشوا بس شافوا الجيش ياي لوووووووووول المسخررررةةةةة!

تونجا أكدت امتلاكها للجزيرة وكلمن حاول يحتلها كانوا يدزون له شوية جيش ويطردونه .

الفرق بين المثالين واضح بنسبة اهتمام الناس بإنشاء دولتهم، المثال الأول وايد حاشتهم مشاكل وعرفوا شلون يتصرفون حزتها، حتى جم مرة هجموا عليهم عشان يطردونهم من القلعة بس ماكو فايدة كانوا يرجعون لها ويحاربون بمسدسات وطق ورسايل دبلوماسية ودم …الخ

بالمثال الثاني ما مداهم يشوفون قارب عسكري ياي قبّوا من مكانهم لول.

زين الحين يعني في أرض مو حق أحد في العالم ؟

إي في، يسمونهم no man’s land اللي اهي الأراضي المتنازع عليها سياسياً ويتركونها بسبب هالنزاع، غالباً تكون في المناطق الحدودية بين الدول، يعني ما تقدر تروح تفرش اغراضك وتقعد تقول هالأرض لي، راح اييونك يكسرون راسك وبسيطة يرمونك.

في شي ثاني يسمونه Terra nullius، اللي اهي الأراضي اللي ما عمرها خضعت لسيطرة أو تبعية دولة معينة وامتلاكها يكون عن طريق احتلالها وسكنها.

حلوووو!؟ يعني في أمل أقدر ألقى أرض لي ؟!

غالباً لاع ، امتلاكك لأي أرض من هالنوع راح يخالف القوانين والاتفاقات الدولية.

“غالباً”؟ يعني لي الحين في أمل؟

صراحة لا ، اللي يصير انك إذا قعدت بأحد هالأراضي أول تالي أكيد راح اييك أحد ويطردك منها لسبب أو لآخر.

فكر فيها، مو من مصلحة أي دولة انها تشوف دولة يديدة تطلع وتخرب على نشاطها الاقتصادي أو السياسي أو العسكري أو أي شي ثاني حتى لو كانت الدولة صغيرة حيل، وشلون إذا كانت هالدولة النتفة يمها أو في محيطها، أبسط شي يدزون مجموعة دوريات وحرس يقولون لك يالله عاد يالله، طس من هني أشوف روح بيتكم! كلش كلش حتى لو خارج المياه الإقليمية راح يلعوزونك ويطلعون روحك علما تقول بس ما تسوى علي. عاد انت بروحك محد يهتم لك، محد عنده معاك مصلحة تخليه يساعدك ويدز قوات يدافع عنك مثل الملاعين الإسرائيليين يوم دشوا فلسطين وشلون الغرب دعموهم.

هذا غير العصابات والمافيا والإرهابيين الدوليين والمهربين والمنحاشين اللي إذا شافوا صج أكو دولة مستقلة صغيرة راح اييون ويحطون المسدس براسك ويقعدون يستغلون المكان والوضع السياسي لصالحهم، يهربون أغراض، أو يقعدون بدولتك عشان محد يكلمهم، يعني سوالف من هالطقة يقزرونها على راسك .

تخيل انت ساكن بفريج ومرة وحده تشوف بنص السكّه أكو مكان محد مستخدمه، واحد ايي ويحط اغراضه ويقعد يبني فيه بيت، شنو يكون موقفك؟ بتروح تكلمه؟ راح يقولك انت شكو هالأرض مو لك بيتك هناك! أكيد راح تتنرفز تقول شيبي هذا وتقعد تداحره وتشيطن تأذيه .

بالنهاية محد قدر يسويها، حتى مثالنا الأول عن سيلاند مع انهم موجودين لي اليوم بس ماكو دولة تعترف فيهم رسمي ولي الحين يعانون من المضايقات بين فترة وفترة.

الدولة مو بس أرض وخلاص، لازم يكون عندك عدد واقعي من السكان، قوة عسكرية تقدر تدافع فيها عن “حدودك”، راس مال محترم، عقلية سياسية واقتصادية تقدر تمشّي فيها روحك بين كل هالدول والحكومات اليوم. هالعوامل كلها تخلي فكرة إنشاء دولة يديدة شبه مستحيلة هالأيام.

زين بس قول لنا شنو في أراضي بالعالم محد يملكها اليوم؟

هذي بعض الأمثلة:

1- قلت في موضوعي قبل عن الأراضي القطبية الجنوبية والشمالية انها ما تتبع أي دولة وممنوع أحد ياخذها مني والطريج.

2- منطقة بير طويل بين مصر والسودان، منطقة في الحدود بين الدولتين عليها خلاف وتاركينها.

3- منطقة اسمها Marie Byrd Land صايره في غرب القارة القطبية الجنوبية، من كثر ما اهي معزولة وفاضية محد يبيها أصلاً.

4- المياه الدولية – International sea في المحيطات الواسعة هذي ما تتبع أي دولة بس تخضع لمراقبة القوى الدولية.

5- الأراضي المحايدة بين السعودية والعراق، منطقة توصل مساحتها إلى حوالي 7 آلاف كم مربع مختلفين عليها من سنة 1922م لي اليوم، هذي صورة للمنطقة عالخريطة:

6- الكواكب والأجسام الفضائية بما فيها القمر :) حسب اتفاقية الفضاء الخارجي – Outer Space Treaty الموقعة سنة 1967م محد له حق يقول هالجسم الفضائي لي. تذكرت موضوع كتبته قبل (اللي يبي يشتري أرض عالقمر يرفع إيده) فيه نقطة حلوة عن هالاتفاقية.

أنا مالي خص، على فرض قدرت ألقى أرض وبخليها دولة رسمية وين أروح وشسوي؟ شنو الخطواااات!؟

تروح مركز خدمة المواطن وتقدم طلب مع طابع بو عشرين دينار وانطر ثلاث أيام علما يعطونك الشهادة مصدّقة.

لا أقص عليكم ،

1- أول خطوة لازم تحدد أرضك وتبين حدودها والمساحة بالضبط.

2- حدد نظام الحكم.

3- لازم عندك شعب، بروحك شكلك عبيط وانت تبي تسوي دولة هالمرة تبي تسوي دولة وما فيها غيرك ؟

3- تراسل الدول المجاورة بإعلانك للدولة ومساحتها وكيانها وحكومتها وكل هاللوية وتطلب يعترفون فيك وبدولتك.

4- شوف لك تجارة أو مصدر دخل للدولة، ازرع بطاط مثلاً أو بيع رقي، أسهل شي وحاول تأسس علاقات اقتصادية مع الدول المجاورة، الكل يحب البطاط والرقي راح تشوف سوقك ماشي ان شاء الله .

5- روح مركز الأمم المتحدة وقدم طلب بالاعتراف بدولتك.

وبعدين عاد شوي شوي راح تبدي الخطوات تتوضح أكثر من هناك.

المصادر/

Wikipedia – Prinicipality of Sealand

Wikipedia – Republic of Minerva

Associated Content – How to start your own country

Yahoo Answers

eHow – How to Start a New Country

15 Responses to “في بالعالم أراضي ما تتبع أي دولة؟ يصير ناخذها؟”

  1. كالعااده مبدع ومفيييد :*

  2. المساحة المختلف عليها بين السعودية والعراق هي اللي باللون البني الغامق..؟
    ولا قصدك اللون البرتقالي..!!!!

  3. lool
    “بروحك شكلك عبيط تبي دوله”

    ذكرتني بوحده بالمدرسه الله يذكرها بالخير
    تقول الحكومه شاريه منا ارض اهلنا
    قلتلها من وين شارين الارض اهلكم
    جان تقول بعد مالتنا شنو من وين شارين بس طلعلهم مباااالغ

  4. تبي اسالة عجيبة ؟

    وشو الفرق بين شاشة البلازما وشاشة ال سي دي ؟

  5. عبدالوهاب Reply December 8, 2010 at 7:04 pm

    سيلاند بتعطي جوليان اسانج الجنسية لول.

    https://twitter.com/#!/WikiLeaksArabia/status/12537276730974208

  6. الله يعطيك العافية كميل
    بس خوش سالفة اروح اسوي دولة بروحي
    وعلى طاري الكواكب
    خبر قبل فترة عند بوفلان
    اسبانية تطالب بملكيتها للشمس :S

    واصل اخوي
    متابع بقوة :)

  7. اذا بغيت تسوي دوله خلني وزير عندك اوكي

    و افاا عليك اكون اول السكاان :p

  8. كميل, زين الدولة الأولانية (سيلاند) عندهم موقع يعني عندهم إنترنت, صح؟

    شلون شابكين؟ لايكون يبوقون وايرلس من بريطانيا؟

    • والله سؤال منطجي يا استاذ
      بس اعتقد شارين خط فيفا

      بس من وينلهم كهربا ؟؟

Trackbacks/Pingbacks

  1. Tweets that mention في بالعالم أراضي ما تتبع أي دولة؟ يصير ناخذها؟ | Kumail+ -- Topsy.com - December 7, 2010

    […] This post was mentioned on Twitter by Bu Mira, nasser alqahtani and Abdulaziz Al-Jassar, Ibrahem AlSuhaibani. Ibrahem AlSuhaibani said: في بالعالم أراضي ما تتبع أي دولة؟ يصير ناخذها؟ http://j.mp/glMoon […]

Leave a Reply

 
%d bloggers like this: