افتتاح قسم مشاركات الزوار – Wall+

Jan 05

Surprise!الحين تقدرون تسجلون بالموقع وتضيفون مقالات وسوالف في القسم الخاص بمشاركات الزوار.

وقبل لا أحد يقول مشاركات الزوار ترى ما تبين إلا داخل قسم المشاركات بس، مثل قسم الصور، يعني الصفحة الرئيسية راح تظل بحالها وبس يبين فيها مواضيعي الخاصة.

تمر علي فترات ما أقدر أضيف مواضيع بصورة منتظمة ويضيق خلقي لما يشوفني واحد ويقول ها ما شفنا شي من جم يوم. عاد تذكرت يوسفوه -يوسفوه ما غيره- مرة قال لي اذا ما لقى مواضيع يديده يقعد يقرا التعليقات والناس شقاعدين يسولفون فيه بالموقع، ولما يخلص يروح قسم الصور.

قلت خل ازيدها حبّه واضيف قسم حق المشاركات، واااااايد توصلني إيميلات باقتراحات حق مواضيع بس ما ألحق أرد عليهم ولا أكتب عنهم كلهم، بهالقسم الحين حلو تقدرون تحطون المواضيع اللي تعجبكم مع مراعاة الشروط المذكورة تحت.

طبعاً قبل عرضها راح تمر علي ولازم أوافق عليها عشان لا تصير خبصه ماله خص ويه القرصان بس مقهور ودي احطه من زمان.

مالي خلق أحط قوانين وافكر بالاحتمالات والشروط وهالخرابيط، بس اقول بشكل عام:

تقدرون تحطون مقالات سواءا انتوا تكتبونها أو منقولة مع ذكر المصدر رجاءاً.

اللي عنده سالفة ووده يهذر ومقهور من شي أو زعلان من أحد، لا يستحي خل يفتح قلبه

اللي راح مطعم وجربه ويبي يسولف عنه.

اللي عنده نكتة أو مشتهي يستملق ما أوصيه بعد

مقاطع يوتيوب أو صور حلوة.

الأكيد ممنوع هو:

أي موضوع يخدش الحياء أو يمس بالأعراف الاجتماعية.

المواضيع المذهبية والطائفية.

بعض المواضيع السياسية الشخصية، يعني واحد يدز موضوع بس يشرشح بنائب أو مسؤول أو شخصية معينة.

الإعلانات والدعايات بشكل عام، بس في حالات خاصة أقبلها وكل شي راح يبين بوقته.

ورجاءاً مو تحطون لي دقدقه وكليبات أغاني واخبار وصور الفنانين والفنانات، هالسوالف ماحبها ولا أبيها تخرب صورة الموقع  إتعب عالصورة

إذا شفت سبب آخر لرفض أي مشاركة أكيد راح أبلغ صاحب الموضوع بالسبب، وان شاء الله ما راح أحتاج أرفض أي مشاركة

شلون ووين التسجيل؟

تدشون قسم المشاركات Wall+ وراح تلقون عاليمين فوق فورمة تسجيل الدخول،

عاد طق Register للتسجيل،

وبنفس المكان تسجل دخولك، تحط اليوزر والباسوورد وتدش راح يوديك على صفحة إضافة الموضوع

واذا ناسي الباسوورد lost your password.

وين أرفع الصور والملفات؟

ليش شقالوا لك فاتح موقع استضافة مثلاً ؟

لا أتقشمر

بس صج ماكو رفع ملفات وصور أولاً لأسباب أمنية وثانياً راح يثقّل على مساحة الموقع.

اللي يبي يحط صورة يقدر يحطها من موقع ثاني، يعني الرابط يصير من موقع ثاني، أبسط شي بس سوي نسخ على الصورة وبمربع إضافة الموضوع طق لصق وراح تنحط.

زين ومقاطع اليوتيوب شلون أحطهم؟

انسخ رابط المقطع وحطه في الموضوع عادي، بس زيده حرف v بعد أحرف http،

يعني مثلاً بدال ما ينكتب الرابط جذي: http://www.youtube.com/watch?v….

اكتبه httpv://www.youtu..الخ.

واللي عنده بعد أسئلة أو استفسارات خل يقول في التعليقات :)

يالله قوم سجل انت وياه وحطوا شي

,   | 

11 Responses to “افتتاح قسم مشاركات الزوار – Wall+”

  1. انشالله ما اسجل و يعطيني باسورد معقد جذي

  2. انزين الحين اذا بحط بس صوره عادي

    يعني نفس ال gallery+

  3. أنزين نقدر نقرأ تدوينات الزوار من الخلاصات Rss ?

  4. عاد لاتتكبر علينا وتغيب عن التدوين

Leave a Reply

 
%d bloggers like this: