صج هذا علم القراصنة المشهور؟

Jan 17

العلم هذا صار أشهر من نار على علم… ها؟

تصميم العلم باللون الأسود وعليه جمجمة وعظمتين مسوين X، شنو تاريخه وواقعيته؟

تاريخياً أول وصف للعلم بتصميم العظمتين يرجع لسنة 1687 واستخدموه في البر، مو البحر.

معروف بإسم جولي روجر – Jolly Roger واذا نبي نترجمه حرفياً بالعربي يصير معناه “روجر المستانس ” أو “روجر المْكيّف ” بس منو روجر هذا؟ وليش يقولون مستانس؟ الله أعلم محد يدري وفي نظريات وايد بس مو أكيده عن أصل المسمى.

أكثر نظرية شفتها معقولة كانت في الجانب اللغوي من التسمية، ببريطانيا يسمون الشيطان Old Roger، وبطبيعة القراصنة الشيطونية والعبيطة نوعاً ما سموا علمهم Jolly Roger يعني الشيطان المستانس ، وهو اللي يمثل انعكاس حق طريقتهم وحياتهم اليومية من الشطانة والعبط.

منو سمّى العلم بهالاسم؟

الـتــســمية (مو الشكل) ترجع للكابتن تشارلز جونسون – Charles Johnson في كتابه التاريخ الشامل للقراصنة – A General History of the Pyrates اللي كتبه سنة 1724م، الكابتن هذا غريب مادري شسالفته محد يعرف منو هو بالضبط ولا قادرين يلقون اسمه ضمن الكباتن المشهورين أيامها بس المهم كتابه أقشر.

المفهوم من كتابه ان التسمية كانت حق أي علم للقراصنة، مو بس اللي بوجمجمة وعظمتين.

يعني القراصنة كانوا يستخدمون أعلام مختلفة؟

عشّون عيل!  نفس النوادي الرياضية مثل العربي والقادسية كل واحد له شعار يميزه.

هذي مجموعة من تصاميم أعلام القراصنة اللي مسجلين استخدموها خلال الفترة ما بين 1693 إلى 1724:

زين عيل كانوا يستخدمون هالعلم وتصاميمه الثانية صج؟

الظاهر اي، بس هااااا! ما كانوا رافعين أعلامهم طول الوقت  الشباب ما كانوا يبون العالم يدري انهم حرامية 24 ساعة! دايماً يرفعون أعلام مزيفة بس وقت اللزوم والهجوم يرفعون علم القراصنة الرسمي مالهم.

أحد الأسباب عشان يقتربون من السفن الثانية بدون ما يخرعونهم ويصيدونهم بسرعة، والأسباب الثانية طبعاً أمنية.

بس ما يقربون من السفينة الضحية يرفعون العلم الرسمي لهم مع طلقة تحذير لتخويف الركاب والاستسلام بسرعة، كانوا يفضلون احتلال السفن من غير حرب وخساير، جذي أوفر عليهم وأريح .

واللي ما يستسلم؟

سفينة القراصنة ترفع العلم الأحمر، يعني راح يهاجمون ويذبحون الأوّلي والتالي يقولون معنى العلم الأحمر حرفياً:

“the pirates would give no quarter to resisters”

إذا السفينة الضحية ما ميّزتهم انهم قراصنة راح يكون عبالهم هذي سفينة حكومية أو عسكرية وعندهم قوانين يتعاملون فيها مع الأسرى ويقولون عادي ما عليه خل يمسكونا عالأقل ما نداوم جم يوم وناكل ببلاش

بس إذا ميّزوهم انهم قراصنة راح يقولون لا يبه هذيل ناس ما يتفاهمون يذبحون مثل شرب الماي ويسلمون روحهم يمه ارحميني.

شكو تصميم الجمجمة والعظام اللي اشتهر بين كل هذيل؟

هوليووود مالت على هوليووود اقوووول التصميم ياز لهم وقزروها علينا.

وشنو معنى الجمجمة والعظمتين؟

رمز للموت والشدة في الحرب.

اليوم في أحد يستخدم هالعلم بصورة فعلية؟

اي في الجانب العسكري وخصوصاً الغواصات بسبب طبيعتها الجاسوسية وعملها السري الغير قانوني في المهام الرسمية.

معلومات سريعة قرصانية:

1- القراصنة تاريخياً ما كانوا همج وخبول يدورون بالبحر، كانوا عاقلين وعندهم نظام ديمقراطي في الحكم والترشيح والتصويت والتفاصيل عجيبة في هالجانب وغالباً لما يستولون على سفينة قراصنة ثانية يحبون يصير انضمام بينهم عشان يصيرون أقوى.

2- يقولون ربطة العين هذي اشتهرت عند البحّارة أيام أول مو لأنهم كلهم مبطوطة عيونهم كانوا يحطونها حتى لو عيونهم سليمة بس عشان كل شوي ينزلون بطن السفينة والمكان ظلمة يرفعون الربطة وعيونهم تقدر تشوف عدل، يعني عينهم المصكرة بالربطة تكون متعودة عالظلام وما تاخذ وقت علما تتعود وتشوف الدرب.

3- تاريخ 19 سبتمبر يعتبرونه “يوم الكلام مثل القراصنة” – Talk Like A Pirate Day، هار هار هار هااارررر

4- ثلاث أرباع سوالف القراصنة اللي متعودين نشوفها بالأفلام أو نقراها بالقصص ماخذينها من القصة المشهورة جزيرة الكنز لكاتبها روبرت لويس ستيفنسون – Robert Louis Stevenson بما فيها طريقة كلام القراصنة ولبسهم والببغاء على الكتف والقدم الخشبية والخريطة … الخ، يعني معظم هالحركات والسوالف مالها دليل تاريخي قوي.

وسلامتكم

المصادر/

Wise Geek

Wikipedia

Wikipedia – International Talk Like a Pirate Day

Wikipedia – Eye patch

, ,   | 

15 Responses to “صج هذا علم القراصنة المشهور؟”

  1. يه يه يه شغل عدل وايد منهم معلومات ما كنت اعرفها

    طلع عشان جذي اب ون بيس مسمين ملك القراصنه
    Gold Roger
    الظاهر بيقلدون
    Old Roger
    كاااك صج يابانيين

  2. ماشاء الله معلومات حلوه
    اول مره نعرفها
    واسلوبك روعه
    صارلي جم يوم مغرز بمدونتك

    واصل ابداعاتك والله يوفقك

  3. صراحة معلومات قيمة وجديدة علي …

    يعطيك العافية


  4. موضوعك ١٠ / ١٠
    ذاك اليوم خطر لي سؤال
    وخشيته لك …قلت هذاالسؤال فصلووه خصيصا لكميل
    تبيني أذكر الحين ؟؟؟مالك أمل
    looooool

    • عاد تصدق والله ما كان عاجبني الموضوع :hmm:

      كتبت نصه من جم يوم بعدين قطيته قلت مو حلو ما ينفع

      بعدين كلمت ربع الدوام بوحمّود وبوعدنان ولا يقولون لي لا زين ما فيه شي

      قلت ياللههههه بروحي مالي خلق اكتب شي ثاني :) ورديت كمّلته و*طابووووف* كاهو :omg:

  5. الله يعطيك الف عافية على الموضوع

  6. ما شاء الله
    وااايد حلو الموضوع
    والمعلومات جداً رائعة

    يعطيك العافية أخوي
    وكثر من هالسوالف

  7. شكرا كميل للمعلومة

    بس مو تقعد تطالعني بريبة وشك

  8. الموضوع عجييييب والله

    هاااررر هااااار

    سؤال: في نقاش وايد يدور بين الأجانب يقولون فيه هل تفضل تكون قرصان ولا نينجا؟

    لشسالفة هالسؤال؟!

  9. مدونتك خطيرة! يعطيك العافية عالمجهود الرائع

    اللي يبي يعرف أكثر عن جولي روجر يشوف فيلم كونان “جولي روجر في أعماق المحيط”بيوتيوب

  10. صح صح صح
    بسبتمبر كنت ببريطانيا – برايتون
    عندهم يوم استهبال فيه
    الكل يلبس قبطان و يتكلمون سيم سيم قبطان

    توني عرفت ليش

    تشكرات كميل باشا

Trackbacks/Pingbacks

  1. Tweets that mention صج هذا علم القراصنة المشهور؟ | Kumail+ -- Topsy.com - January 17, 2011

    […] This post was mentioned on Twitter by Badr Ali and others. Badr Ali said: RT @To0o0ona: صج هذا علم القراصنة المشهور؟ http://j.mp/dQEjjJ فجأة أبغا أتفرج ون بيس :") […]

  2. Anonymous - October 20, 2011

    […] […]

Leave a Reply

 
%d bloggers like this: