اليوم مدونتي صار عمرها سنة!
General+
17. Feb, 2011 @ 1:59 pm
45 Comments
وششششكررربووووونة 
!
چنه أمس متردد أفتح الموقع ولا لأ، چك بم صارلي سنة 
!
*هف هففففففففففففففففففف هوووفففففففف* طفّيت أول شمعة 
ما كنت متوقع كلش اني اكمّل سنة، وكلش ما كنت متوقع بيصير زحمة بالموقع نفس الحين قلت الناس ما تحب هالمواضيع بس مادري شالسالفة 
بعد الزحمة صرت استحي اضحك واستعبط بالمواضيع نفس اول 
بس ان شاء الله أتعوّد شوي شوي.
زين الحمد لله لي الحين مستانس على سوالف التدوين وقازره معاي 
بس شوي تعبت والمواضيع قامت تاكل وايد من وقتي 
، حالياً احاول أكتب موضوع بشكل شبه يومي ونادراً يمر يومين من غير موضوع حتى لو كان خفيف، بس الحين مع اكتمال سنة قررت اخلي الجدول موضوع بكل يوم وترك بشكل رسمي بدال ما اخليها كل يوم، إذا قدرت اكثر كان بها، بس بشكل عام كل يوم وترك ان شاء الله، منها عشان جودة المواضيع تصير أحسن ومنها ألحق ارتاح شوي وأقدر أتنفس 
.
سويت الموقع بكل بساطة عشان استانس، من جذي ما كنت اقبل عروض الدعايات اللي وصلتني طول الفترة اللي فاتت. كنت اقول مابي أربح من الموقع أنا مسويه بس عشان أستانس واقزّر وقت الفراغ، بس الحين قمت اشوف السببين ما يتعارضون، يعني ما يضر هم استانس وهم اربح جم بيزة، مادري يمكن يكون عامل تشجيع عشان اكتب اكثر، بس اخذوها مني ولا تحاتون ما راح اجامل أحد ولا راح اكتب شي غير اللي اشوفه صج وبالطقاق الفلوس والدعايات كلها 
أعتذر حق كل اللي يدزون لي اقتراحات أو رسايل شكر بس ما أرد عليهم، مو لاحق أجيك على الايميل أول بأول ولا ألحق أرد عالكل عاد يا ريت تعذروني يا جماعة.
بمناسبة مرور سنة راح اقعد اهذر شوي سوالف ما منها فايدة، مثل موضوع الشخابيط اللي حطيته من فترة.
1- مرات لما يصير ملل وماكو شغل أقعد أعاند روحي واسوي دقات، أخرّب شغله مهمة عندي ولا أضيّعها عمداً، المشكلة دقاتي بروحي أكثر شي ينرفزني لأنه محد يعرف ينرفزني أكثر مني إلا أنا 
.
2- بالكويت يبيلك مزاج من حديد علما تتعود تسوق السيارة بالشوارع، كله نرفزه وتطالع يمين يسار تخاف واحد دفش يدش فيك ولا مطفوقين عبالهم الشارع شارع ابوهم والكل لازم يوخر، ذاك اليوم قاعد أفكر ليش ما تصير سياراتنا العادية مثل سيارات التصادم، يركبون حوالينها مثل درع مطاطي وتروح، والناس تستانس تطب الشارع كلمن يضحك ويدعم بالثاني مثل حلبة سيارات التصادم بس على أكبر 
3- الدعايات بكل مكان دايما يمصخونها على زيادة، يحطون واحد ياكل ككاو ومرة وحده الدنيا كلها تتحول طيور ونجوم وغيوم واهو يقعد ياكل الككاو عالبطيء ويعيش اللحظة وويهه حده مستمتع بالككاو يذوب بحلجه، تعال اكل نفس الككاو واذا سمعت صوت عتوي هذا ويهي 
دعاية شاي واحد تعبان قاعد بالشغل بس يشرب شوي من الشاي تشوفه يغمّض عينه ويرفع راسه يعني دش المزاج السحري والشاي ياب راسه، بعدين تشرب نفس الشاي وتقعد تطالع الكوب تنطر يحوشك هالمزاج نفسه، وتنطر، وتنطر، وتنطر.. ماكو شي 
دعاية مطعم وخدمة توصيل يحطون واحد يدق ويشيله موظف حده مستانس عالاتصال عشان ياخذ الطلب، ولما تدق زين ما يكفخون التلفون بويهك!
4- تخيل العطسة بدال ما تكون قصيرة تصير طويـــــــــــللللةةةةة! يعني بدال ما تكون *هاتشو* بو ثانية تصير العطسة بو 30 ثانية أو أكثر 
هاااااااعتتتتششششوووووووووووووووووووووووووووووووووووووووووووووووو…….
تلقى بعد ما تخلص العطسة ويهك يصير أزرق وتقعد تشاهق تبي ترد نفسك، والكلينيكس ما يكفي حق العطسة لازم فوطه!
أتوقع اذا كانت العطسة جذي راح يصير عيب واحد يعطس جدام الناس، لازم يروح تكرمون الحمام ويصكر الباب يعطس بعدين يسحب السيفون ويغسل ايده ويطلع 
واذا واحد عطس عطسه خفيفة جدام الناس الكل راح يخزه يقولون شفيه هذا ما يستحي شلون عطس جذي جدامنا 
5- ذاك اليوم رحت الجمعية شريت عصير ولما رديت البيت كنت مشتهي أشربه بارد، بس ما كان عندي ثلج وعلما أحطه بالثلاجة وتعال انطر يبيله وقت 
قعدت أفكر ليش ماكو مايكروويف تبريد؟ يعني مثل المايكروويف العادي بس يعكس شغله بدال ما يسخّن يبرّد، احط داخله عصير واطق 30 ثانية واقعد انطره بس يخلص يطلع بااااردددد!
6- شايف شلون لما تعيد كلمة وتقولها وايد تحس معناها يروح وتصير الكلمة عبيطة مالها معنى؟ اقعد الحين وقول بصوت مسموع “ليمون” “ليمون” “ليمون” “ليمون” “ليمون” “ليمون”…الخ بعد شوي تحس الكلمة تفككت بمخك وصارت ماصخه مالها معنى، حتى بمخك ما تكون مربوطة بصورة فاكهة الليمون. هالشغلة يسمونها علمياً Semantic satiation وبعضهم يستخدمونها في التمارين الروحية عشان يطلعون من القالب الدنيوي، تقدر تستخدم هالشغلة ببعض الأمور اللي تبي تنساها أو تطلّعها من راسك.
7- مرات اسمع الناس يقولون عن الكتاب أو الموقع اللي يسوونه مثل عيالهم، بس انا اقول خسي الموقع مثل عيالي! العيال وين والموقع ولا الكتاب ولا أي شي ثاني وين 
أحب مدونتي بس ماكو مقارنة أصلاً! العايلة والبيت والأهل وايد أكبر من مقارنتهم بشي مثل موقع!
وكل عام ومدونتي بخير 
ومشكورين كلكم
من أعمال الفنان تيم فلاك - Tim Flach
شسالفة مدينة Sparta والحرب اللي بالفيلم عنها؟
صور: لندن مهجورة
حقائق عن ... الفوفوزيلااااااععع
ليش دايما يبيعون حلويات وخفايف عند الكاشير؟
wooow
wallah ana ymkn lya 6 months atab3k B shkl shbh ywmi
w 3la baly almdwnh lha akthr mn snh
ma sh2 allah wallah arw3 blog tab3th
mwa9′e3k mara 7maas
finally Happy bearth day
w lazeem tstmr
تك تك تك >> تصفيق يوم طفيت الشمعه
كل عام وهالمدونه تستمر بنبض حروفك المميزه
وعقبال تشوف احفادها >> وش دخله
فعلآ مدونه مميزه تجبر الواحد يشكرك عليها
بطل يااستاذ كميل
ربي يوفقك واحتـــرااامي لشخصك ولعايلتك الكريمه ~
مبروووك كميل
انا بصراحه حبيت المدونه لانها علميه وممتعه -يعني استانس ومااشيل هم تضيع الوقت-هذا اكثر شي عجبني بالمدونه
” قلت الناس ما تحب هالمواضيع بس مادري شالسالفة بعد الزحمة صرت استحي اضحك واستعبط بالمواضيع نفس اول ”
احنا حبينها لان انت جمعت في المدونه بين المتعه
والعلم
نصيحه:
لاتستحي فكر زي ماكنت تفكر قبل انه انت فاتح المدونه عشان نفسك اولا وعشان تفيد الناس وبس -
لاتفكر بسطحيه انه الناس صاروا اكثر وماادري
ايش
مممم وبس
والله احلى مدونه عندي لي الحين
وكل يوم متابعه
والله يا كميل عليك اسلوب عجيب ههههه. يذكرني بأفلام الكرتون
و كل سنه وانت طيب
Bel Tawfeech inshallah.
*تصفيق قوي مع وجه فيه دموع وميت من الضحك*
عاش كميل وعاشت مدونته العجيبة, الصندوق السحري اللي ماتدري وش فيه وتنتظر كل يوم وأنت متحمس, يفاجئك ويسليك ويفيدك ويوسع صدرك, وكذا تحس انه عالم متكامل, لو يحط بس حلاق بالصفحة الرئيسية تقدر تسكن بمدونته ههههه.. كميل+ ليست مجرد مدونة
أحب أأكد على النقطة الثالثة اللي تفضلت فيها لأني للأسف انخدعت من دعاية شاي ليبتون بالفواكه الاسترالية وصار لي بالضبط زي اللي أنت كتبته
العطسة ههههههههههههههه
*هنا وجه منتهي من الضحك وعلى وشك يسوي دحرجة على قولتك*
5- فيه هذي الطريقة, مدري شايفها بمدونتك أو مكان ثاني
http://www.youtube.com/watch?v=dc9BHiQUpWU
وشكرا على المعلومة البطلة رقم 6
ماكنت أدري أن هالشيء له اسم علمي..
يعطيك العافية اخوي كميل
كل عام وأنت ومدونتك بخير ومن حسن إلى أحسن انشالله
وعقبال المية سنة يارب
ألف ألف مبروووك وسنة حلوة يا كميل ( مو جميل )
بصراحة مدونتك كنز من المعلومات وفتحت مخي على شغلات ما كنت أعرفها
وعودتني إني أتساؤل أحياناً عن الأشياء اللي تدور حولي
ليش وكيف ولماذا تعمل بهذا الشكل
أشكرك وإن شاء الله نبارك لك بـ سنين طويلة
كلها فايده وخير وعمل صالح
كل عام و انت و المدونه بخير
و عقبال ال 100 سنه
مدونتك من المواقع الي اتابعها يوميا
و الصراحه مواضيعك تجذب القارء و اسلوبك بالكتابه اهو الي حببني بالمدونه
و اتمناك دوام التقدم
سنة حلوااااه ياكمييييل
مضبوطه صار الوزن نفس سنة حلوه ياجميل
المهم مواضيعك جميله والزين يفرض نفسه ومبروك مرور سنة
وعقبال عشرين سنة تدوين
الف مبروك
وكل سنه وانت طيب
مدونه كامله ومكمله ماشاءالله
الله يعطيك العافية كميل على هذي المدونة الخارقة
سنه ماشاء الله عمر قصير و شغل كبير
مدونه حلوهو كثير
اعتبرها من افضل المدونات العربيه
عقبال ١٠٠ سنه
موفق
كل عام ومدونتك بخير
وعقبال الـ 100 سنة لووول
شنو متردد ما متردد أشوى انك سويتها يا ريال
.. صج صج ونستنا بهالسنة يا كُميل , وأفدتنا وايد بعد , باختصار مدونتك شغل عدل 
وأحسن شي انه أسلوبك يحمس ويحبب فيك
يلا عقبال عشرطعشر سنة
CONGRATULATIONS KUMAIL+
I am one of your fans and really
liked your blog its unique and
got pretty nice information so
keep up the good work …
Regards
marron
كل عام وانت ومدونتك بخير
واصل
مبروك يا كميل
وعقبال ١٠٠٠ سنه
مبروك كميل
صراحه -وبدون مجاملة- أنا دشيت مدونات وايد بس مثل مدونتك مااااافي
العبره مو جم سنة لك بالتدوين لإنه في ناس تدش وتطلع من مدونتها وما تاخذ شي مفيد !
بمواضيعك اللي تحطها تخلي الواحد دايما يفكر ويسأل نفسه ليش
وشحقه صار جذي غصباً عنه
يعني باختصار المتعة والفايدة بـ مدونة كميل < جنه صارت دعاية؟
والله الواحد يستانس يدش مدونتك , جنها استراحة
الواحد ياخذها حق نفسه .. ويستانس همن إنه في شباب كويتين جذي تفكيرهم , وتكفى لا تستغنى عن العبط بتدويناتك
ويعطيك العافية أخوي على مجهودك طول هالسنة
ولا يوقـف
كل عاااام والمدوونه وصاحب المدونه بألف خير وعقبال الف سنه وان شاء الله نشووف عياالك يكتبون ..
من جدك بس سنه ما اصدق والله فكرتك 3 ولا رابع سنه
وانا قاعد امدح فيك عند ربعي على مواضيعك واذا سالوني اقولهم واضح من المواضيع في خبره في التدووين
يالله وين وجهي الحين بعد موضوعك <<<< اقول في مجال تمسحه خخخخ
المهم كل سنه وانت والمدون وعيالك واهلك الي هم اهم من الموقع بخير واحنا بخير بعد خخخ
كان في بالي سوال قلت ماله الاه كميل بس نسيته بس بذكر بدزه في تويتر
وصحيح استمر وحط مواضيع على كيفك بس اهم شيء تستمر
الف مبروووووووووك
وعقبال مانبارك لك كل عام
>> آخر من يعلم
بالبركة وإن شاء الله كل سنة إنجاز أكثر وأكثر
وعموماً المدونة بمحتواها واسلوبك ممتعة ما شاء الله
هي تجمع الفايدة و المتعة
وموفق بكل خطوة من خطواتك
كل عام ومدونة كميل بخير
وسالفةانك تضحك وتستعبط الصراحة هاذا الشي اللي يجذبنا للمدونة لأنها تكسر الجدية في الموضوع اللي يخليه ممل
١٠٠٠ مبروك ياكميل..اي والله الايام تركض..يطري علي لويتك على الاسم وشكثر كنت تحن وتسالني شرايك و شرايك…لين ماشاءالله عليك انشأت هذة المدونه “الخارقه” ومرت سنه من النجاح
انتمى لك كل الخير..ومن هالنجاح لأعلى انشاءالله
مبرووووووووووووك ألف ألف مبروووووك
الصراحة مدونة ولا أروع
ماشاء الله مواضيع فنتك
من مدة وانا أتابعها
صراحة إبداع في الطرح والإنتقاء والتعليقات
Go On…
الف مبروووووووووك
ألف مبروووووووووووووووك كميل
ماشاء الله كانت سنة مليانة معلومات ومواضيع
كثيييير حلوووووة
الله يكتب أجرك ولا يحرمك من فضله ماشا الله عليك
وان شاء الله السنة الجاية
احلى وامتع واكثرمعلومات ومواضييييع
مدونتك صرت لازم افتحها كل يوم
زي لما افتح الفيس والمنتدى إلخ
الله يوفقك لكل خير
^-^
1 year of 3aba6 gone… 999 years left.. YES!!
:P
i usually see your name around kuwaiti blogs, i don’t know why but i didn’t imagine you reading my posts
thank you for dropping by!
مشكورين وايد يا جماعة، لو تدرون شكثر افتشل من هالسوالف وشكثر متحير شنو أرد عليكم كنتوا تضحكون علي
kumail happy birthday for you and your blog
really one year past !!!
ma sha2 allah mnha ela ala3la
مدونتك رائعة استمر ..
انا متابعك من حوالي 5 شهور , بالتوفيق
أدري تو الناااااااس
بس بصراحة مستحيل أطوف أرد بموضوع مثل جذي
أول شي كل عام و مدونتك بخير لوول
بصراحة جد أبدعت
أهلي إللي ما يعرفون بالمدونات
عرفتهم على مدونتك و حبوها حيل لووول
مواضيعك تووووب غير عن الكل
كنت كل ما أفضى أشوف تدويناتك القديمة أقراها و أقعد بالساعات و ما أمل
بس حسافة الحين خلصوا قريتهم كلهم لوول!
مالي إلا التدوينات اليديدة
بس جد يعني مدونتك غييير عن الكل .. طريقة اختيارك للمواضيع مو صج!!
و أسلوبك خطييييير و ممتع حيل
منها للأعلى إن شاء الله
الف الف مبروك وعقبال 25 سنه يارب
وان شالله يكون كل حرف شاهد لك مو عليك =)
kumailoooooooo
wallah ennek wa7sh
mashalah 6aaf sena
atthakar kent tegool betsawey blog o etnaggey esem o she3aaar o mowatheee3 hehehehe
mashalah now u have a big fans including me !!!
menha lela3la o dont stop we all love u
الله يعطيك العافية
ألف مبروك , ” وكل سنه وأنت ومدونتك أفضل واجمل واحلى” وأنا للأمانه من أشد المعجبين بطرحك (الغريب الجميل) عساك على القوه والله يسعدك بدنياك ويرحمك بآخرتك
كل عام ومدونتك الى الامام
ألف ألف مبروك أخ كميل
ماشاءالله تبارك الله مدونتك تقريباً الوحييدة اللي أتابعها كل ما سنحتلي الفرصة .. وأحياناً والله كل ما أدخل عالإنترنت
بصراحة أعتبرها مرجع ماشاءالله تبارك الله
مدونة كميل = المتعة والفائدة معاً
بنسويلكم دعاية و إعلان كل فترة
الله يوفقكم ويزيدكم تألقاً ونجاحاً ويفتح عليكم في الدنيا والآخرة يارب
كل عام وانت بخير اخوي ..
وان شاءالله كل سنة نحتفل معاك ..
وعسى الله يوفقك ياربي
كلمات الشكرً قليله
الله يعطيك العافيه