صج راحوا القمر ولا كله تمثيل وشغل هوليوود؟
Science+
21. Feb, 2011 @ 9:26 pm
29 Comments
راح اعرض أقوى دليل على حقيقة حصول رحلات القمر،
مع رد سريع على الإشكالات المشهورة بخصوص هالموضوع.
ربعي في الدوام -وبالخصوص نوافوه وفهد- دايما يناشبوني على سالفة رحلات القمر وانها أي شي وكلام فاضي وكلها فيلم هندي، وانا اقول لهم يا جماعة ذكروا ربكم وحتى لو كانت صج ولا فيلم هندي ليش مكبرين الموضوع شفيكم متفاعلين هالكثر؟ 
مادري شفيهم العالم قايمين على رحلات القمر ومسوينها سالفة مصيرية شبه عقائدية، ويعصبووون إذا سمعوا واحد يختلف معاهم بالموضوع ولا مو مصدقهم، والله زين ما يطقون بعض! بالحالتين انت شهامّك؟ 
المهم ما راح اطول بالموضوع ولا بطرح مقدمات أطول، راح ادرعم بالكلام سيده:
أقوى دليل ان امريكا راحت القمر سنة 1969 برحلة أبولو 11 هو انهم لما نزلوا القمر حطوا مثل مرايا ضوئية عاكسة اسمها Retroreflector، هذي المرايا يستخدمونها لي يومكم هذا لقياس المسافة بين الأرض والقمر عن طريق الليزر – عملية يسمونها بالضبط Lunar Laser Ranging Experiment.
باختصار يمسكون ليزر من سطح الأرض ويوجهونه بالضبط على المرايا العاكسة اللي في القمر وينطرون الليزر يرجع عليهم عشان يحسبون فرق الوقت ومنه المسافة.
المعادلة المستخدمة لحساب المسافة كما يلي:
Distance = (Speed of light × Time taken for light to reflect) / 2
المسافة = (سرعة الضوء × الوقت المستغرق لانعكاس الضوء) / 2
شكل المرايا العاكسة الوحده مثل هذا اللي بالصورة:
إذا أبي أبسّط الموضوع راح اقول المرايا هذي شغلها مثل شغل الزجاج التحذيري اللي يحطونه حق القواري، مثل زجاج أو مرايا صغيرة حمرا أو صفرا بس يحوشها ليت راح تعكسه وتبين لك كأنها ليتات شغالة.
محد،
وأنا أكرر واقول مـــحـــــد!!
يقدر ينكر وجود هالمرايا على سطح القمر اليوم لأنهم من أول رحلة قمر سنة 1969 (أبولو 11) لي اليوم وهم يستخدمونهم ويستدلون عليهم ويشوفون صحة البيانات ودقتها في الحسابات العلمية والفلكية. والرحلات اللي وراها (أبولو 14 وأبولو 15) هم تركوا مرايا نفسها زيادة عشان يزيدون من دقة الحسابات ومقارنة النتايج ببعض.
هذي صورة لوحة المرايا اللي عالقمر، مثل ما تشوفون اهي لوحة كبيرة فيها مجموعة مرايا مو بس وحده:
وهذي صورة المركز اللي يطلقون منه الليزر:
وهذي صورة المركز وهو يطلق الليزر بالصج:
وشكثر بالله هالمسافة من القمر لي الأرض؟
تقريباً 384,467 كم وتتغير المسافة شوي لعدة أسباب.
شكثر يطول الليزر علما ينطلق من الأرض لي القمر وينعكس راجع؟
2.5 ثانية بس! 
دليل ثاني:
استخدموا جهاز ستلايت متطور اسمه Lunar Reconnaissance Orbiter أو اختصاره LRO في أيامنا هذي وقدروا يشوفون على سطح القمر بقايا الأجهزة اللي تركوها في رحلات القمر اللي بدت من سنة 1969 وأحلى شي انهم صوروهم ونشروا الصور ومحد قدر يثبت أي تلاعب بصور الستلايت المنشورة.
هذي صور من الستلايت ويستدلون فيها على أماكن المعدات عن طريق الظلال وطولها وموقعها بالنسبة للشمس:
وهذي خريطة توضيحية لمواقع الأجهزة والمعدات الموجودة على سطح القمر حسب رقم الرحلة:
دليل ثالث:
لما ردوا من القمر يابوا معاهم 382 كجم من الصخور، اشترك في تحليل الصخور علماء من كل أنحاء العالم وكلهم قالوا الصخور هذي من القمر بلا خلاف. الصخور على سطح الأرض مختلفة طبعاً عن صخور القمر ومحد يقدر يزوّر معدن ولا حجر يديد مو موجود على سطح الأرض.
بكل بساطة كل الأدلة اللي جمعوها من الرحلات الأمريكية الأولى طابقت الأدلة والبيانات اللي جمعتها كل رحلات الفضاء اللي وراها ولا أحد قدر يصيد أي تناقض أو تلاعب.
أما الرد السريع على الإشكالات المشهورة اللي نسمعها:
شلون العلم متموّج في “الهوا”؟
أعلى العلم ممسوك بعمود أفقي وحركة عمود العلم الأصلي المغروس في القمر تسببت بتحريك العلم بشكل خلا الناس تشتبه بوجود هوا.
يعني تبون العلم يصير مستوي سيده أول ما يغرسونه بالأرض؟ شلون تبون يكون شكله بالضبط عشان تقتنعون؟
متعفس؟ 
منسدح؟ 
مبرطم؟ 
ليش ماكو نجوم مبينه في الفضاء في صور رحلة القمر؟
وقت الهبوط على القمر كان خلال ما يسمونه فترة الصباح القمرية 
، يعني الشمس طالعة عالقمر وتحجب النجوم حالها حال الصبح أو النهار على الأرض.
ماكو آثار هبوط من مركبات الفضاء مثل الحفر واضطرابات على سطح القمر، ليش وشلون؟
أول شي لأنهم هبطوا على منطقة صخرية صلبة مغطاة برمل ناعم، زيد عليها اختلاف نسبة الجاذبية بين الأرض والقمر ما راح يستدعي ترك الآثار القوية اللي تتوقع تشوفها على سطح الأرض.
شلون نشوف آثار حق خطوات الرواد بس ماكو آثار حق هبوط المركبة؟!
طبقة الرمل تحركت من تحت المركبة وتوزعت حواليها، المركبة نزلت على صخر صلب، لما نزلوا الرواد وطلعت آثارهم كانت في الجهات اللي لي الحين عليها طبقة رملية غير متأثرة من الهبوط أو توزع وتجمع الرمل عليها.
شلون آثار خطوات الرواد ما اختربت وشكلها موجود بهالدقة؟
مو توكم تقولون ماكو هوا على القمر ولازم العلم ما يتحرك؟ ما عرفنا لكم 
! جو القمر يختلف حيل عن جو الأرض ولا تتوقع تشوف مطر وهوا ورطوبة تخرب المعالم البسيطة هذي.
لما طارت المركبات من القمر ما شفنا اشتعال أو نار الوقود، شلون؟
نوع البنزين اللي استخدموه في الاقلاع عن سطح القمر كان مزيج من hydrazine و dinitrogen tetroxide اللي يحترقون من غير اشتعال مرئي.
تصوير رحلات القمر مثل فيلم عادي بس يتحركون أو يمكن مصورينه عالبطيء!
إذا تبي تصدق هالكلام كيفك 
، بس انا شخصياً ما استبعد تأثير ارتفاع درجة الحرارة، ورهبة الرواد من المكان، ودقة الأجهزة انهم سبب رئيسي لهالنقطة.
شلون ما تأثروا الرواد من أشعة حزام “فان ألان”؟
المركبة وغطاها يحمي الرواد من هالأشعة، وأصلا الفترة المطلوبة لاجتياز حزام الأشعة هذا قصير ما يحتاج كل هالخبصه.
الأحجار اللي يايبينها من القمر تشبه بعض الأحجار المجموعه من المناطق القطبية الجنوبية
لأ 
، الأحجار اللي لقوها بالمناطق القطبية تكون مؤكسده ومحترقة أثناء دخولها الغلاف الجوي لكوكب الأرض. محد قدر ينكر ان الأحجار اللي يابوها من القمر مختلفة كلياً عن الأرضية بخواصها ومزاياها.
كل رحلات القمر كانت خلال فترة رئاسة ريتشارد نيكسون، ليش ما راحوا القمر مرة ثانية بعد كل هالتطور العلمي؟
وليش يروحون مرة ثانية؟ عشان يلعبون غمّيضة ولا شنو بالضبط ؟ أيام ريتشارد نيكسون كانت الرحلات مهمة حيل لأسباب سياسية وعالمية لإثبات مكانة الولايات المتحدة في العالم، الرحلات كانت تكلف واااايد بس عندهم السبب يسوا، يعني الدافع كان سياسي بحت قبل لا يكون علمي إنساني. الحين ماكو أي سبب قوي مثل ذاك الوقت، حتى عناد الناس اللي تنكر الرحلات ما يسوه يطقون درب ويردون عشانه! راحوا القمر وخذوا العينات المطلوبة وسووا الدراسات وكل شي، وبعدين؟
هذا نفس اللي يقولك انت ما تقدر تروح المدينة الترفيهية 
!
راح تقول له وانت مستغرب امبله أقدر، أصلا رحت من قبل ليش ما اقدر اروح؟!
يرد عليك ويقول لك لو كنت تقدر تروح كنت تروح مرة ثانية بس ما سويتها من زمان 
!!
فهمتوا شلون هالتفكير عبيط؟
هالأيام مصاريف ضخمة وجهد كبير مثل هذا ما يستثمرونه في رحلات القمر إذا ما كان له داعي قوي، أكثر شي يصرفون على الستلايتات والرحلات حول الأرض لأغراض عسكرية وتقنية ودعائية.
خلك من امريكا أصلاً، إذا على هالعقلية عيل ليش الاتحاد السوفييتي ما راح القمر بعد ما راحت امريكا؟ كانوا يقدرون يروحون بعدهم بفترة وتوفرت لهم التكنولوجيا بس ما راحوا لأن السباق خلص وفشله يروحون يقولون شوفوا احنا وصلنا متأخر!
الدول المتقدمة بالسنوات الأخيرة قمنا نشوفها تحب تتشيحط جدام العالم بتخطيطها رحلات فضاء بالمستقبل عشان يثبتون كفاءتهم ومكانتهم، مثل الصين والهند وغيرها، أما امريكا خلصت وريلها والقبر بس بعد ماله داعي كلش.
كلمة أخيرة
إذا شي ما قدرنا نستوعبه بكل تفاصيله مو إلا نكذبه، دايما نلقى الدول الإسلامية تضحك على الغرب لما يتطنزون على الإسلام ويقولون لهم انتوا ما فهمتوا الإسلام ومعناه بس قاعدين تضحكون عالأمور السطحية اللي ما استوعبتوا معناها.
نقاش رحلة القمر وانه مو صج قريب من هالحالة، إذا احنا ما استوعبنا التفاصيل العلمية وشلون شي مثل هذا صار ليش نقول أكيد فيلم هندي؟ ليش ما نفكر احنا ما استوعبنا التفاصيل عدل ويبيله نطالع أكثر؟ ليش ما نقول عالأقل احنا مو متأكدين؟ اللي يضحك 99% من النقاط بس ناس يسمعونها من ناس ويعيدونها على بعض، ولا أحد فكر يتأكد من الكلام.
أنا فاهم الناس هابّين على هالموضوع على بو انه غريب أو شي “مؤامراتي” غامض عليه علامات استفهام 
، بس كل هالغموض وعلامات الاستفهام والتعصب على موقف راحوا القمر ولا ما راحوا والطوالة اهي الفيلم الهندي بحد ذاته.
الله يعينني الحين على اللي يهدون الموضوع كله ويغرزون على نقطة وحده بس ويقولون هاااااااااا كلامك هنييييي مو مضبوووووط فييييه غلططط 
! يا ناس يا عالم حاولوا تقرون الموضوع كامل كله مع بعض دفعة وحده مو نقطه نقطه، إذا نقطه ما عجبتك يمكن تعجبك غيرها وتقتنع، من جذي حطيت كل شي قدرت افكر فيه، وهم راح أظل مقصر لو شكثر أكتب.
أنا مو كاتب هالموضوع عشان أقنع أحد، اللي ما يبي يقتنع لا يقتنع على راحته، كل واحد حر، وانا ما راح يدش بجيبي دينار ولا يطلع منه دينار بالحالتين، كتبت هالموضوع لأن في ناس داخت من الكلام ومو عارفين يدورون عدل،
يالله هاكم كتبت الموضوع وخلصنا، ويا ويلك يالياي! 
المصادر/
Wikipedia – Lunar Laser Ranging Experiment
Wikipedia – Moon Landing Conspiracy Theories
اللي يحب يقرا هذي هم خوش مقالة بس ما لقيت لها مكان بموضوعي: Bad Astronomy
تحديث/
ذكرني الأخ H90 مشكوراً بفيديو برنامج Mythbusters اللي ناقشوا فيه القضية وأثبتوا صحة الهبوط على القمر، اللي يبي يشوف الحلقة موجودة عاليوتيوب:
الفن بالورق
كُميل؟ شنو يعني "كُميل"؟
WDE ... نافذتين بنافذة وحده
حقيقة صور التيوس/الصخول المتسلقين للأشجار
فيديو: طريقة تصفيط الفنايل بترتيب وبسرعة
موضوع جبااااااااااار
عاد انا كنت من اللي ماصدقو سالفت روحة القمر بس الحين صدقت عليك فن بالاقناع
عاد توني مجهز صاروخ بروح للقمر بالعطة مع الاهل حيااااك كميل
اممممم
أنا شايف فلم من قبل .. أظن انه من قناة المانية يثبت ان الرحلة هذي ما تمت و جايبين علماء قاعدين يفسرون الظل اللي من الرواد على سطح القمر المفروض ما يكون موجود و أشياء ثانية ..
بس بصراحة الموضوع فيه اخذ و عطا ولا أحد يقدر يجزم ،، احس يذكرني بالنقاشات بين “س” و “ش” فهمت
موضوع يخليني لازم أكتب اللي ععندي
هذا النقاش سبق اني تحدثت فيه أيضا مع زملائي بالعمل .. عموما أستشف من المصادر اللي يبتها انها مصادر (تؤيد) نظرية السفر الى القمر وللعلم هناك مصادر (تنكر) الوصول الى القمر وفعلا هناك أدلة كثيرة تبثت أن الانسان لم يصل الى سطح القمر .. وللسؤال حول ليش ماراحوا مرة ثانية … ومثال المدينة الترفيهية مثال حلو وحبيته … ماتسمع ان فيه العاب يديدة بالمدينة ؟ ههههه فلازم تروح مرة ثانية
ناخذ الارض على سبيل المثال … ليش العلماء دايما يكتشفون الارض ودايما يقولون الارض والارض ودراسة جديدة وعلم الارض لا ينتهي أبدا .. كذلك علم القمر والكواكب علم لا ينتهي أبدا … لا تقنعني أن القمر لم يتأثر اطلاقا على مدى الخمسين أو الستين عاما الاخيرة كما حدث للارض من تطور مناخي ملحوظ
سبب بسيط يجعلني أعتقد أن المركبة لم تطأ سطح القمر هو اقلاعها مرة أخرى .. عملية اقلاع صاروخ من الارض تحتاج طاقة كبيرة جدا ولاحظ ان الضاروخ لابد له من أن يكون مثبت بقاعدة لضمان صعوده وعدم سقوطه
واذا كانت الجاذبية على القمر 1/6 من جاذبية الارض فلابد من توفر منصة اطلاق للمركبة … مايصير مركبة تطلع من الارض بصاروخ واهي نفسها تطلع من القمر بدون ولا شي الا شوية طاقة خفيفة !!
شي ثاني
العملاء اللي قالوا أن هذه الصخور فعلا من القمر … كيف عالم يثبت شي اهو اصلا ماشافه!!! ولاحظ ان اغلب النظريات العلمية مو مؤكدة مية المية خاصة اللي لها علاقة بهذا العلم بالذات
سالفة السما ليش سودة لان وقت مادري شنو صادف هالرحلة ماشي ماكو مشكلة … تسمع بمثل اللي يقول
لما تشوف نجوم الظهر ؟
تصدق اني شفت النجوم هالحزة
سالفة انعكاس الشمس على خوذة رائد الفضاء والظل وتراب كلها أثبتت انها خاطئة وغير حقيقية
اذا كان الوصول الى القمر كان جدا سهل للامريكان ولم يأخذ سوى أشهر قليلة
ليش حتى الان مافي رائد فضاء وصل الى المريخ ؟
لا تقنعني أن الفلوس اهي السبب لان من 50 سنة الرحلة الى القمةر كانت مكلفة بشكل جنوني أكثر من الحين اللي يعتبرها البعض مجرد نزهة
آه صحيح على طاري النزهة
نسمع ان في رحلات بـ 20 مليون دولار للسفر الى القمر … صار شي ؟
طوّلت عليكم
وللحديث بقية
مابي اخلي الموضوع ردود على بعض بس ليش ما يبت طاري المرايا اللي تكلمت عنهم؟
ههههه
المرايا قد تكون أقماؤ صناعية قريبة من القمر أو أي كوكب ثاني عملية قياس لا أكثر ومثل ما تم تصوير القمر (على انه قمر) يتم تصوير المرايا (على انها مرايا) ويمكن تعليقها على أي قمر صناعي
لوووووووووووووول
الله يهداك يا فرانكوم هالكلام المفروض ما يطلع منك
الحسابات الدقيقة اللي تنتج من عملية حساب المسافة تم تأكيدها بوايد أشياء في حساب مسارات الأقمار الصناعية والأحداث الفلكية وغيرها، كلامك انه من قمر صناعي هذا طقة رصيف قوية
الفرق بين مسافة القمر الصناعي والقمر تودي الحسابات بسبعين ألف داهية!
راح ارد عالسريع على نقاطك وبعدها عاد كل واحد وكيفه مابي أطول الموضوع واخليه نقاش ساخن:
- كلامك عن علم القمر والأرض اللي ما ينتهي مثل ما تقول ما يغير من الموضوع شي، إذا ما لعبت كل الألعاب بالمدينة الترفيهية محد راح يقول هذا ما راح المدينة الترفيهية ولا يقدر يروحها مرة ثانية! يعني لازم أخلص كل شي عالآخر ولا كل اللي سويته ما ينحسب؟
- انت بنفسك قلت جاذبية القمر 1/6 من جاذبية الأرض، يعني الطاقة المطلوبة للإقلاع عن سطح القمر راح تقل 1/6 يعني ماله داعي منصة نفس الأرض.
- نقطة الصخور هذي استغربت منها، بالضبط اللي صار العلماء قالوا هذا شي ما شفناه أصلاً ومستحيل يكون من الأرض! كلم أي عالم أو طالب جيولوجيا وراح يشرح لك النقطة ببساطة، مزايا الصخور اللي يابوها مو بس تختلف عن الصخور الأرضية، خصائصها وصورتها الجيولوجية مستحيل تكون أرضية أصلاً، وكلامك ان النظريات العلمية مو مؤكدة ماله دخل، هالشغلة بالذات متأكدين منها مثل ما اهم متأكدين الأرض غير مسطحة.
- نجوم الظهر هذي نعم نشوفها مرات بس بشكل عام ما تطلع بالنهار، القمر نفس الشي بصورة عامة خلال هالوقت ما تشوف نجوم.
- ماكو مقارنة ولا علاقة بين الهبوط على سطح القمر والمريخ، اذا واحد راح المدينة الترفيهية مو يعني لازم يروح المنطقة اللي وراها بعد فترة ولا يقولون له خلاص عيل ما رحت المدينة الترفيهية!
- رحلات الفضاء ان شاء الله قريبة خاصة مع شركة virgin وطيارتهم اللي اعلنوا عنها قبل جم سنة.
إذا تراجع تعليقك واشكالاتك كلها قايمه على التشكيك والافتراض و”اذا ما صار هذا ليش ما صار هذا” و”هني الشكل مو عاجبني”،
هذا مو منطق علمي ولا عقلي، ولا يصير تبني راي في قضية علمية بهالطريقة،
أقل شي الأرقام والحسابات الفلكية وصور الأقمار الصناعية ورحلات الفضاء اللي صارت بعدها كلهم أكدوا الهبوط على القمر ومحد قدر يناقض البيانات اللي يابوها سواءاً البصرية أو العلمية أو المادية أو غيرها.
بس
يا أخوان لو هناك شيء سيجزم أن رحلات القمر حقيقة وليست خدعه ،،
فهو برنامج
Mythbusters للثنائي المشهور آدم وجيمي
http://www.youtube.com/watch?v=mefEKqzq8cg
(شاهدوا جميع الأجزاء)
فهناك إجابة شافية لكثير من اللغط الحاصل على موضوع الرحلة وهناك تجاربه حيه وردود وافية لكل الشكوك ..
الرجاء منك يا كميل تضيف الوصلات لكي يكتمل موضوعك تماما ويكون مرجع عربي لكل الناس إلي صدقت نفسها وبدت تتكلم وتتفلسف وإهيا عمرها ما قرت ولا كتاب واحد ..
إحتراميـ،،
شكرا كميل
والإيموتيكونز اللي بجملة المدينة الترفيهية مسوية شغل
موضووع من احلى المواضيع اللي قرأتها
بس للاسف فيه ناس مخربيني قبل ما اجي عندك خخخخ
امممم ماشاء الله فيه رد قبلي مبهر بصراحه
بس ماتكلم عن المرايات على قولتك
ياخي اسمح لي باشطح
بس ماتلاحظ في الصورة الاولى
فيه وجود لعلامات ارجل جمب المرايات اللي مفترض انها تكون كبيرة
وفي الصورة الثالثة…. القاعده المستخدمة
هل هي موضوعة على القمر بهذه التجويفات فيها
وووو وبس…
هذا اللي عندي
على فكرة ترا من المعجبين بمدونتك انا
ومن المعجبين باسلوب طرحك المبدع
اسسسسسستممر
اهم شيء لا توقف
للإضطلاع على كل الافلام الرجاء غوغل
Chronology of space exploration
Or visit
http://Www.solarviews.com/eng/craft2.htm
لو ماراحوا في ١٩٦٩ فهم راحوا بعدين اكثر من مرة.
المشكلة اننا نصدق كثير من الخرافات اما على هذه فاننا أعملنا تفكيرنا النقدي بشكل غريب وخاطئ.
تحياتي
اوووووووو كميييلووووو
والله لمن قريت موضوعك سكتني وماكان عندي شي اقوله …
بس لمن قعدت اقرى الردود قلت في نفسي صح ليش مو جذي او جذي
وحتى الحين مااجزم انه امريكا رايحين او لا لانهم جذبوا علينا اب وايد شغلات (اللي وده يعرف اب شنو يطالع القادمون عاليوتيوب) فا ماستبعد سالفه القمر من قبل 60 سنه
بس كنت شبه راح تقنعني هههه والحين انا ياي اطقك ههههه
بس لأن نوافوه التعبان ما قدر يشوف جوابي على تعليق فرانكوم قلت اعيده هني عشان يبين للمتابعين لا غير:
الله يهداك يا فرانكوم هالكلام المفروض ما يطلع منك
الحسابات الدقيقة اللي تنتج من عملية حساب المسافة تم تأكيدها بوايد أشياء في حساب مسارات الأقمار الصناعية والأحداث الفلكية وغيرها، كلامك انه من قمر صناعي هذا طقة رصيف قوية
الفرق بين مسافة القمر الصناعي والقمر تودي الحسابات بسبعين ألف داهية!
راح ارد عالسريع على نقاطك وبعدها عاد كل واحد وكيفه مابي أطول الموضوع واخليه نقاش ساخن:
- كلامك عن علم القمر والأرض اللي ما ينتهي مثل ما تقول ما يغير من الموضوع شي، إذا ما لعبت كل الألعاب بالمدينة الترفيهية محد راح يقول هذا ما راح المدينة الترفيهية ولا يقدر يروحها مرة ثانية! يعني لازم أخلص كل شي عالآخر ولا كل اللي سويته ما ينحسب؟
- انت بنفسك قلت جاذبية القمر 1/6 من جاذبية الأرض، يعني الطاقة المطلوبة للإقلاع عن سطح القمر راح تقل 1/6 يعني ماله داعي منصة نفس الأرض.
- نقطة الصخور هذي استغربت منها، بالضبط اللي صار العلماء قالوا هذا شي ما شفناه أصلاً ومستحيل يكون من الأرض! كلم أي عالم أو طالب جيولوجيا وراح يشرح لك النقطة ببساطة، مزايا الصخور اللي يابوها مو بس تختلف عن الصخور الأرضية، خصائصها وصورتها الجيولوجية مستحيل تكون أرضية أصلاً، وكلامك ان النظريات العلمية مو مؤكدة ماله دخل، هالشغلة بالذات متأكدين منها مثل ما اهم متأكدين الأرض غير مسطحة.
- نجوم الظهر هذي نعم نشوفها مرات بس بشكل عام ما تطلع بالنهار، القمر نفس الشي بصورة عامة خلال هالوقت ما تشوف نجوم.
- ماكو مقارنة ولا علاقة بين الهبوط على سطح القمر والمريخ، اذا واحد راح المدينة الترفيهية مو يعني لازم يروح المنطقة اللي وراها بعد فترة ولا يقولون له خلاص عيل ما رحت المدينة الترفيهية!
- رحلات الفضاء ان شاء الله قريبة خاصة مع شركة virgin وطيارتهم اللي اعلنوا عنها قبل جم سنة.
إذا تراجع تعليقك واشكالاتك كلها قايمه على التشكيك والافتراض و”اذا ما صار هذا ليش ما صار هذا” و”هني الشكل مو عاجبني”،
هذا مو منطق علمي ولا عقلي، ولا يصير تبني راي في قضية علمية بهالطريقة،
أقل شي الأرقام والحسابات الفلكية وصور الأقمار الصناعية ورحلات الفضاء اللي صارت بعدها كلهم أكدوا الهبوط على القمر ومحد قدر يناقض البيانات اللي يابوها سواءاً البصرية أو العلمية أو المادية أو غيرها.
بس
الصراحة الموضوع ولا اقوى ماشاءالله عليك كميل
تعودنا عليك و على مواضيعك الصخر ماشاءالله
عيني عليك بارده لاتخاف
موفق يالغالي
واضحة انها لعب … كيف مافي هوااء ورواد الفضاء لابسين الاقنعةوعبوات الاكسجين … والعلم الامريكي بيرفرف ؟
اقول شلونك اخوي؟
موضوع حلو بس ماقمت اناقش فيه لنه تناقش شخص كل شوي بيرجع يقولك علم وبطيخ فضائي وليش ماصورو الالين الفضائي
ويختملك بقصة ناسا صرفت الملايين على قلم والروس استخدمو رصاص
موضوع جبار
حسب معلوماتي المتواضعة
ان اول رحلة هيا فقط التي بائت بالفشل
فزورت امريكا الصورة و ادعت انها صعدت القمر و كان بطل الفيلم نيل ارمسترونغ
و كسبت امريكا من هذا التزوير ما يقارب 40 مليار دولار
و لو ما زورت و اعلنت انها فشلت في صعود القمر .. كان خسروا انواط تنطح انواط
ثم ان اول رحلة كانت على اساس 1969
يعني بعد 40 سنة العلماء ما قدروا يتفادون الاخطاء الي ارتكبوها في السنوات الماضية و يعالجونها !!!
و بما ان في اقمار صناعية تدور حول الارض حاليا و هذا الشي حتى الطفل يعرفه .. ليش مافي مركبة فضائية و صلت القمر !؟!؟!؟
دايما مواضيعك قمه الله يحفظك ويحفظ مدونتك واحلى شي عجبني بالموضوع ال
smilyface للي يرقص حواجبه
قتلني
كل واحد وقناعاته والصراحه ما اقنعتني
مازلت اعتقد انها خدعه
اما سالفة المرايا ل
ذكرتني بسوالف كونان بداية الحلقه الجريمه مستحيله
ولما يكشف لك الطريقه الفذه والتكتيكه لتنفيذ الجريمه
تقول بطل العجب
كون انا ماندري شلون نزلوا المرايا
مو بالضروره يكون معناها ان المرايا نزلت بالرحله الخرافيه
كميل خلك هادي مع الردود واحترم وجهات النظر الثانيه..
ومن ناحيتي مومقتنع بسالفه ان احد وصل القمر.. كلها اكاذيب وسالفه المرايا … شنو الدليل ان في مرايا غير صور؟ انا اقدر احط نفسي بالقمر كلها فوتوشوب
بس هذا مايعني ان السالفه كلها جذب.. لاكن انا مومقتنع
لووووول
والله هادي مافيني شي أبد، واذا أحد فهم اني معصب أو عباله قاعد اتطنز اتمنى يسامحني لأني من صج قاعد اكتب بكل امانة.
إذا قصدك على التعليق اللي قلت “شلونك اخوي؟” هذا بس قلتها من باب الفكاهة لأني تكلمت عن النقطة المذكورة في الموضوع ومبين ما مر عليها لا غير
وعادي ما راح اعصب إذا ما اقتنعت و كاهم ما شاء الله كذا واحد هني قايلين ما اقتنعوا، خلاص كل واحد وكيفه يبه
حتى انا قلت مو كاتب هالموضوع عشان اقنع أحد، اللي ما يبي يقتنع كيفه بس قلت اوضح بعض الأمور بصورة مبسطة يمكن احد مو مار عليها من قبل أو محد شرحها بالطريقة.
اخوي لا تحاول تقنعنا لأنو كذب كذب كذب انا اعرف انو بزماني هذا مافي شي مستحيل بس امريكا كذابه وصدق شوف سلسلة القادمون تفهم كل شي ولا تتعب حالك اعصااااابك
لسى في ناس شاكه بدي الهرجه
o_O
عموما ترا مو لازم لكل يقتنع يعني ايش بتستفيدوا ؟
طلعوا ولا ماطلعوا
اهم حاجه القمر موجود وكل يوم يطلع
خلاص ياربي لك الحمد :p
شُكراً جزيلاً كُمِيل
المهم في الموضوع أنه لا علاقة للتصديق أو الرفض بالعقيدة
صدق أو لا تصدق هذا شأنك
وعني مصدق 100%
لأن ما فيه أي مانع من هذا الشيء
فالقمر جرم قريب وكوكب أقرب من فيلكا للكويت بالنسبة للوسائل الحديثة