صج لازم نغطي فرشاة الأسنان في الحمامات؟

Mar 09

يعني عشان لا يحوشهم رذاذ ماي السيفون وانتوا بكرامة.

طبعاً الموضوع شوي فيه لوعة جبد بس بعد شسوي ، الايميلات وخرابيطها ما ترحم. يمكن النتيجة ما تعجبكم وايد واللي فيه حساسية من النظافة انصحه يطلع من هني عشان لا ينصدم من النتيجة!

انتشرت هالسالفة بالايميلات من جم سنة واذا لاحظتوا عدل راح تشوفون حتى شركات فرش الأسنان بعضهم قاموا يصنعون مغاطي بلاستيكية يبيعونها مع فرش الأسنان في الجمعيات. تكلمت أول أيام الموقع عن أي نوع فرشاة اسنان تشتري وشلون تختار احسن فرشاة، وبنفس الموضوع بيّنت شلون الشركات ما يهمهم شنو الشي الصحي كثر ما يهمهم انك تشتري اللي يعجبك، بالضبط مثل موضوع الفيتامين C وعلاقته بالنشلة.

المهم بعض الايميلات تقترح انك تصكر غطا المرحاض قبل سحبه لمنع انتشار الرذاذ، أو انك تغطي الفرشاة، أو تحطها بره الحمام وتفك عمرك.

من الأخير الكلام صح ومو صح.

لما نسحب السيفون صج ينتشر رذاذ الماي الوصخ واللي فيه بأرجاء بيت الراحة اللي انت مستريح فيه؟

إي نعم ينتشر، ويسمونه باللغة العربية aerosol وبالانجليزي الهباء الجوي، بعد كل سحبة سيفون ينتشر الرذاذ وبقاياه لفترة توصل ســـاعـتـــيـــن في كل صوب من الحمام ويحوش كل شي فيه بما فيه انت!

الرذاذ هذا وصخ ولا رذاذ ماي عادي ولا شنو؟

رذاذ ماي السيفون يشيل وياه بكتيريا وفيروسات ومايكروبات وجرثومات القذارات واشياء وحشه وايد .

يفرق تحط الفرشاة قريب ولا بعيد من المرحاض؟

ما يفرق، دام انها داخل الحمام راح يحوشها غصباً على خشمك.

حد اليييييييييييييييييعععععععع !!

يمكن تقول جذي من الناحية الظاهرية، بس اللي قليل يستوعبونه ان الحمام غالباً يكون أنظف وأطهر من وايد أماكن بالبيت حتى لو اختلف شكلها وريحتها. يسمون هالوصاخة بالعربي fecal coliform bacteria وبالانجليزي (اللي تلوع جبده لا يقرا) …

بكتيريا البراز القولوني! 

اهي نفسها تكون موجودة في النجاسات ونفسها تنتشر وتتكاثر في أي مكان يوفر لها بيئة المناسبة، يعني مو بس بالحمام أو من الوصخ.

…. وين تكون موجودة يعني؟

أي مكان رطب، مافيه وايد ضوء، ويحوش أي شي عضوي (عضوي مثل أكل أو جسمك أو نبات ..الخ)

…. مثل؟

اصنفج الموااااعييين، بالوعة المطبخ، التلفووووناااات النقالة والأرضية، المخدات أو الشراشف أو الأثاث الرطب، فوط السباحة، الكيبوووورد والماوس وطاولة المكتب…الخ بعض هالأماكن تكون أوصخ من الحمام بواااايد وبعض الإحصائيات اللي مريت عليها من فترة تقول أوصخ شي بالبيوت لقوه كان التلفونات النقالة! وقالوا بكل صراحة شافوا كرسي المرحاض أنظف من التلفونات النقالة اللي شافوها ومن 15 مكان ثاني في البيت!

حتى لو أحتفظ فيها بره الحمام أو استخدم مغطاة بلاستيكية أو أحطها بدرج معزول؟

الوصخ والبكتيريا القذرة هذي موجودة بكل مكان والمشكلة انها تتكـــاااااثررررررر وتنمو في الأماكن الرطبة قليلة الضوء، حتى لو تاخذ الفرشاة وتخشها بره الحمام في مكان معزول أو تحطها بمغطاة بلاستيكية هم راح تنمو فيها الوصخ اللي قلت عنها.

الفرشاة رطبة بعد استخدامها وبيئتها مثالية لهالجراثيم واذا غطيتها راح تزيدها مثالية للجراثيم.

إذا أبي أصير نظيف من قلب وافتك من كل هذا شسوي؟

تكلمت في موضوع الصابون المضاد للبكتيريا شلون التخلص من كل أنواع البكتيريا مو زين ويأثر على قوة مناعة الشخص وصحته مع الوقت، لازم نصير شوي وصخين ولا راح نتأذى 

صعب تتخلص من كل شي، بس يمكن تساعدك هالنقاط:

1- استخدم منظفات معقمة مثل الديتول أو الكلوروكس كل جم يوم على الأجهزة والأماكن اللي تتكرر عليها في البيت، امسح سطح المكتب والكمبيوتر والتلفونات وطاولة الطعام والمطبخ وغيره من اماكن تبسّط فيها على طول. هالشغلة تسويها حوالي مرتين إلى ثلاث مرات في الأسبوع.

2- افصل بين لوحة تقطيع اللحم ولوحة تقطيع الخضار.

3- اغسل أغراض المطبخ بما فيها اسفنج المواعين وفوط المطبخ بغسّالة المواعين بعد استخدامهم. وبعد ما تطلّعهم نقّعهم في حوض ماي وصابون لمدة 5 دقايق.

4- لما تغسل ملابسك آخر شي تغسله خل يكون الملابس الداخلية.

5- استخدم منظفات أو صابون ملابس فيها كلور.

6- حط قطع الكلور الزرقا في حوض السيفون.

والفرشاة؟

إذا تبي تكون 100% نظيف ماكو إلا انك تبدلها كل اسبوع، عاد كيفك !

أهم شي ان نسبة القذارة أو البكتيريا هذي كلش مو خطيرة وما تأثر على صحتك خير شر، بس اللي فيه وسواس نظافة يفرق معاه طبعاً.

أختم الموضوع بفيديو حلقة Mythbusters اللي يتكلمون عن هالأسطورة وأهم نقطة عجبتني في الحلقة لما حطوا فرشاتين اسنان في مكان معزول معقم ومغطى تماماً، ويغسلونهم حتى بماي مفلتر! شوفوا النتيجة بالفيديو:

المصادر/

The Straight Dope

6 Responses to “صج لازم نغطي فرشاة الأسنان في الحمامات؟”

  1. موضوع جميل حرك مشاعر النظافة فيني.
    الواحد لازم كثر ما يقدر يخلي الحمام ونت بكرامة جاف ويشغل ﺍﻟﺸﻔﺎﻁ. بروح اشتري فرشة اسنان جديدة

  2. يعني ورانا ورانا هالبكتريا
    ومافي فايدة لو أشتريت فرشاة بغطاه ولا لأ

    الله كريم

    يعطيك العافية على الموضوع

  3. أحسن حل إنك ما تحط الفرشة بالحمام
    خلها بالغرفة أنظف
    خوفك يكون في أشياء أسوأ من البكتيريا بالحمام: الزهيويات ːp
    يعطيك العافية

  4. تكفااااا لاااااا

  5. السلام عليكم ،،،

    الموضوع ممكن ينحل ببساطة … أنزل غطاء المرحاض قبل سحب السيفون وهكذا تمنع إنتشار رذاذ الماء … وبعد5 دقائق إرفع الغطاء وأضف ديتول أو معقم وانزل الغطاء مجدداً وأسحب السيفون :)

Leave a Reply

 
%d bloggers like this: