صفارة القطار لها معنى ولا بس تفلسف؟

Mar 24

*تشوووو تشووووووووووووووو*!!

امبله لها معنى !!

صفارة القطار بالأساس مثل لغة إشارة يستخدمها قائد القطار لتوصيل رسايل قصيرة بينه وبين العمال والناس في القطار نفسه والمحطات والطريق. مرات يستخدمها عشان يحذّر العمال أو يبلغهم بشي، تعليمات سلامة، تحذير لحركة معينة ..الخ.

تشكيلة الصفارة بين هرن قصير وهرن طويل وترتيبها يعطي المعنى النهائي المتفق عليه – رواه كُميل . تختلف اللغة ومعناها باختلاف الدول،، في الدول الأوروبية يستخدمون لغة مختلفة عن اللغة اللي بأمريكا. حتى مع تطور الراديو والتكنولوجيا لي الحين يستخدمون هالصفارات هالأيام، الظاهر صارت مثل عادة قطارية تراثية.

هذي بعض المعاني المشهورة للإشارات في أمريكا الشمالية، الـ”o” يعني صفارة قصيرة والـ”-” طويلة.

صفارات قصيرة ورا بعض يستخدمونها لما يستخدمون مخرج طوارئ أو لتحذير أشخاص أو حيوانات على السكة الحديدية.

– لما يوقف القطار، يشغلون البريكات الهوائية ويعادلون الضغط.

– – القطار يشيل البريكات ويبدي يتحرك.

o o الاعتراف باستلام الرسائل المستقبلة.

o o o لما يكون القطار واقف يكون معناها قاعد يرجع قري (يرجع لي ورا) أو متابعة إشارة شخص يوجه القطار عشان يرجع.

o o o o طلب إشارة (الظاهر يعني من قطار ثاني) أو إعادة إرسال رسالة لأنها غير مفهومة.

– o o تحذير ان في قطار ثاني في الجدول قاعد يوصل هالقطار (قطارنا متأخر لدرجة القطار اللي ورانا قام يوصلنا).

– o o o إبلاغ صاحب العلم الإرشادي عشان يروح آخر القطار.

– – – – إبلاغ صاحب العلم الإرشادي عشان يرد من الغرب أو الجنوب.

– – – – – إبلاغ صاحب العلم الإرشادي عشان يرد من الشرق أو الشمال.

– – o – القطار على وشك وصول تقاطع عام، أو عبور نفق، أو حديقة أو محطة قطارات فيها عمال، أو لما يمر يم قطار ثابت. هالإشارة اسمها قانون 14L وموجودة بمعظم اللغات القطارية.

o –  فحص البريك لأي تسريب أو عوالق.

– o لما يقرب من محطة أو منحنى في السكة أو أي جهة تكون فيها الرؤية مو واضحة وايد.

في الدول الغربية يعتبرون القطار ومحطات القطار مكان رومانسي حق وداع الحبايب أو حق الوحدانيين، رمز حق السفر والغربة لانتشار شكل الناس اللي ناطره تسافر أو تودع أحباءها، حتى صفارات القطار أيام اول كانوا يستخدمون نوع بخاري مو كهربائي أو متطور نفس اللي نشوفه اليوم، الصفارة البخارية يكون صوتها شوي أفخم ويعطي انطباع حزين (مثال بهالرابط، مثال ثاني)، هالنظرة قديمة وتاريخية من ايام اول.

مثل عندنا بالكويت شلون البحر ونظرة الناس حقه كنا نودع اجدادنا حق رحلات الغوص والسفر اهم عندهم القطارات مشهورة بهالنظرة، نظرتنا حق اغاني البحر والموال والأوووووو يااااا مااااااااااال شلون نربطها بذكريات البحر الحلوة بس ندري انها كانت ايام شقا صعبة، الفرق عندهم محطات القطار منتشرة أكثر في القارات الأوروبية وداخل أمريكا من السواحل والموانئ اللي تكون بس على الأطراف.

هذي صور مختلفة لأنواع صفارات القطار:

المصادر/

Wikipedia – Train Horn

Wikipedia – Train Whistle

, , ,   | 

7 Responses to “صفارة القطار لها معنى ولا بس تفلسف؟”

  1. معلومات حلوة
    أول مرة أدري إن لها معنى

    يعطيك العافية على المعلومات
    =)

  2. معلومه جديده و جميله و مدونه اجمل شكراً كميل

  3. حتى القطار ما سلم منك يا كميل ههه

    موضوع حلو ، ما توقعت ان لهالصوت معنى ابداً

    اثاريه طلع مثل شفرة موريس ، و لا هاذي مالت العميان ؟ لوول ، ما بتفلسف

    اممم ، اثرت تساؤل ثاني ؟ ، اكو تفسير لصوت ونان الشرطة و الاسعاف *ويييييييييييييييو *
    هه لول

    عالعموم يعطيك العافية

  4. ما دريت انه لها معنى إلا الحين
    حتى القطار له لغة خاصة
    XD

  5. توقعتها مثل بوري السيارة عبط
    شكرا..

  6. o – o – o ––o
    يعني الله بالخير

  7. ذكرتني بفلم unstopple تقريبا فيه نفس المعلومات اللي ذكرتها بس انت موضحها بشكل
    جميل هناك من رعب المناظر والأصوات ماتلحق تفهم اش يقصدوا بالصفارة أصلا

    شكرا لك استفدت وبشدة

Leave a Reply

 
%d bloggers like this: