سوار قوة التوازن اللي منتشر، صج ولا نصب؟

May 07

Power Balance Bracelets أساور مطاطية ملونة عليها لزقه هولوغرام يقول لك اللي يلبسها راح يتوازن ويتحسّن أداءه الرياضي وطاقة جسمه تتعادل.. صج ولا كلام فاضي؟

هذي آخر هبّة شفتها عند الشباب بالديره، كل واحد حاط له سواره ملونه وما يصدقون واحد يسألهم شنو هذا عشان يشتغلون عليه محاضرة شنو تسوي وشنو فوايدها ومنو يلبسها من الرياضيين، ويختمونها بالتجربة العبيطة اللي يوقفون على ريل وحده واللي يلف خصره..الخ

اقتراح هالموضوع وصلني أكثر من مرة بالايميل وربعي بالدوام طلبوا اكتب عنه، وانا أحب أحيي الجماهير الطيبه واقول لهم النتيجة من الآخر:

كلام فاضي مع مرتبة الشرف!! 

بصورة عامة يعتمدون على خرابيط عن الطاقة الطبيعية للجسم والموجب والسالب وحقل الطاقة الكهربائية وتواتر الموجات وسوالف مريم نور اللي هبّوا فيها قبل جم سنة،

المشكلة شكو هالكلام كله بلزقه هولوغرام مادري؟ شنو الرابط بين الاثنين؟ كله مطاط وسيليكون ولزقه عادية مافيها أي شي (لزقه هولوغرام يعني تعطي صورة ثلاثية الأبعاد لما تطالعها من زوايا مختلفه)، اللزقه يحطونها على ساعات وألعاب واكسسوارات يهال من سنين وبنين شلون صارت خارقه مره وحده؟

والتجارب العجيبة اللي شفناها؟!؟!

اللي مو شايف التجارب كاهي:

هذي حركات استعراضيه بنفس ستايل الحركات اللي انتشرت ايام الخمسينات والستينات عشان يبيعون أشياء عبيطه، هذا فيديو يبين لك شلون هالتجارب نصب واحتيال:

لي الحين مو مصدق! أنا كل مرة ألبسها أحس بفرق!

كله براسك، بالانجليزي يسمونه Placebo effect، يعني تتوهم.

بس حطوا لاعبين ورياضيين مشهورين يستخدمون السواره وكلهم يمدحونها!

دعايه :)

لي الحين مو مصدق 

بعد ما صار كلام على الأساور قام أصحاب المشروع بنشر تصريح على موقعهم فرع أستراليا يقول التالي:

In our advertising we stated that Power Balance wristbands improved your strength, balance and flexibility.
We admit that there is no credible scientific evidence that supports our claims and therefore we engaged in misleading conduct in breach of s52 of the Trade Practices Act 1974.
If you feel you have been misled by our promotions, we wish to unreservedly apologise and offer a full refund.
To obtain a refund please visit our website www.powerbalance.com.au or contact us toll-free on 1800 733 436. This offer will be available until 30th June 2011.

يمكن تقول هالكلام ما يثبت شي، بس أنا اقول امبله يثبت ان التجارب اللي ينشرونها مو علمية، إذا كانت علمية كانوا يعتمدون عليها بس ما يقدرون.

وأهم شي قالوها بالحرف انهم مارسوا دعايات مضللة 

… لي الحين مو مصدق كل هالكلام 

وايد سووا تجارب متفرقه وكلها أثبتت ان السوار خرطي، كانوا يجربون يحطون عند بعض الرياضيين السواره من غير ما يدرون ويخلونهم يركضون ويقارنون نتايجهم مع رياضيين ثانيين حاطين سوار فاضي وكلهم كانت نتايجهم عاديه ولا أحد قدر يفرّق شي بين أداءه مع أو بدون السوار، هذا بروحه كافي يبين لك شلون السالفة كلها وهم و Placebo.

أحد التجارب كانت بتاريخ 28 أكتوبر 2010 مع الرياضي دومينيك داوز بالتعاون مع أخبار ياهو و IIG، والنتيجة مثل ما قلنا كانت عادية بين اللي لابس السوار وبين اللي مو لابسها.

تجربة ثانية كانت عن طريق شبكة BBC وبإشراف متخصصين وتوصلوا لنفس النتيجة.

تجربة ثالثة كانت مشروع لمجموعة طلبة وشافوا نفس النتيجة.

تجربة رابعة بشهر ديسمبر 2009 بأحد القنوات التلفزيونية بأستراليا هم قالوا نفس النتيجة.

تجربة خامسة كانت بشهر يناير 2011 في كلية العلوم الصحية RMIT’s School of Health Sciences طبعاً هم قالوا نفس النتيجة.

هم لي الحين مو مقتنع! 

عاد لي هني وكيفك، إذا تبي تصدق هالدعايات كيفك، واذا شفت صج حسيت بالفرق بعد لبسها ومو مصدق انه وهم خلاص براحتك الله يوفقك ان شاء الله. بس الشي الوحيد اللي يقهرني يوم اشوف الناس يشترون السواره بـ 5 أو 10 أو 15 دينار كويتي!!!!

يا ناس تكفه والله حرام قاعدين نقول لكم نصب وكلام فاضي وتدفعون هالكثر؟!

إذا عاجبتك البسها عشان شكلها بس لا تلبسها وتقص على العالم وتقعد تنشرها وتدفع مبلغ مثل هذا عشان سوالف الخرابيط، كله سوار مطاطي وبعدين الناس يصدقون مساكين ويروحون هم يشترونها بهالمبالغ الكبيرة! تبي تحرق فلوسك احرقها بروحك لا تخلي الناس تحرق فلوسها وياك 

هالفلوس تروح حق الفقارى والأعمال الخيرية والمساكين وايد أحسن، عالأقل تنحسب حق آخرتك،

واذا مو عاجبك تتبرع فيهم خلاص روح اشتر فيهم كنافه واعزم ربعك بالديوانية وقولهم كُميل يسلم عليكم 

اشتر بطيخ و رقي وحطهم بالثلاجة بعدين اكلهم بااااااااررررردييييين بعد ما ترجع من الدوام وادعي لي 

تدرون شنو اللي يقهرني أكثر؟

لما اشوف الشباب يلبسون هالأساور “الرياضية” وينسدحون بس أكل ومرعى وقلة صنعه، لا يلعبون رياضة ولا شي بس لابسينها وقاعدين،،، ليش؟؟

حتى بفسفسة الفلوس مو فالحين! 

المصادر/

Wikipedia

Telegraph.co.uk

Yahoo! News

Orange Country Register

RMIT University

35 Responses to “سوار قوة التوازن اللي منتشر، صج ولا نصب؟”

  1. دام لها مفعولها حتى لو كان سلبي
    ما اضن في مانع من لبسها

    • لا يبه في مانع ونص!

      شكو يبيعونها 15 دينار؟؟ السواره ما تسوه فلسين والناس طايحه تشتري فيها بمبلغ ماله داعي وناس تموت يوع >:(

  2. واللي يقصون علينا “سوار إبن سينا”؟؟

  3. أخ كميل ,, هل هذا نطبق على سواره Sabona??

  4. هذي آخر هبّة شفتها عند الشباب بالديره، كل واحد حاط له سواره ملونه وما يصدقون واحد يسألهم شنو هذا عشان يشتغلون عليه محاضرة شنو تسوي وشنو فوايدها ومنو يلبسها من الرياضيين، ويختمونها بالتجربة العبيطة اللي يوقفون على ريل وحده واللي يلف خصره..الخ

    ممكن اقول كااااااااااااااااااااك

    لانه قبل جم يوم وانا بالنادي مريت صوب شباب وواحد يقول حق الثاني, هذي الاسواره اللي تمتص الاشعه بالجسم, جان يقوله اي وقعد يمدحها ويقول شنو فوايدها وانا اقول بقلبي هل اوادم كل شي يصدقون

    موضوعك وايد حلو اشكرك لانك طرحته

  5. I don’t really think they work and even if ppl who wear them think they work it will be due to placebo effect y3ni they set it in their mind that they will be stronger and more energetic so they work harder and get stronger and more energetic

  6. خالد الهاجري Reply May 8, 2011 at 10:32 pm

    موضوع حلو ,, وانا عن نفسي ما اصدق هالسوالف
    بس بقول ان بعض عالسوارات يقولون انها تنظم الدورة الدموية و تنظم وقت نوم الانسان , بس واحد قالي شي اجنبي كان يشتكي من الم في الراس ( صداع ) و مايرتاح الا لو حط راسه بالارض , وثبت ان السجود هو اقوى مفعول ل تنظيم الدورة الدمويه.

  7. الله يعطيك العافية
    كلامك كله عدل وازيدك من الشعر بيت
    في حال وجود قطعة سكر عاديه احطها في الشاي ومحد تكلم فيها
    بينما اقدر اقنع نفسي او غيري بأن هذي قطعة سكر تعطي حيويه لي او طاقة واحطها في الشاي واسوي فيها قصة و جذي مايظل احد إلا ويشتريها!!!! ليش إحنا جذي <<< يعني احنا الى هذه الدرجة من السذاجة???

  8. موضوع موفق

  9. على قولت الوالده الله يحفظها

    يقصوووووون عاليهاااال

  10. السلام عليكم
    أنا لا ببيع و لا بأشتري ، ولا بأتربح من ورا السوار
    جربته ، و لبسته ، و ممتااااااااااز
    اللي يحب يجربه يعمل حاجة تانية خالص
    غما يلعب رست بدونه و بعدين يلبسه و يلعب رست مع نفس الشخص
    أو يلعب ضغط و يشوف حيجيب كام عدة ، و بعدين يلبسه و يشوف الفرق
    لا تجارب أجانب و لا نصب أمريكان ، و لا بطيخ صينيين
    التجربة خير برهان
    و الحكمة بتقول : الناس أعداء لما جهلوا
    ابحثوا في علم اسمه بيوجيومتري

    • وعليكم السلام اخوي

      صج الناس اعداء ما جهلوا :)

      وصج التجربة خير برهان، خاصة التجارب المختلفة العلمية لأكثر من جهة رسمية وكلهم شافوا السوار كلام فاضي.

      اللي يحس بفرق مثل ما قلنا هذا بلاسيبو ومسألة نفسية لا غير، سواءا كنت لابس سواره ولا وزار راح يصير نفس الشي ما دمت تعتقد انه يسوي شي.

      والبيوجيومتري علم حاله حال اي علم ثاني فيه الغث والسمين ومحد ربط بينه وبين هالسواره عشان تستشهد فيه

      تحياتي للجميع

  11. If the product is based on the placebo effect then you cant say that its useless since its used in the medical field with a high success rate.

  12. كلام فاضي ومالة اي معنى شلون سوار بنظم الدورة الدموية الي يصدق هو مريض نفسي

  13. it is all in ones head
    as long they r happy with it then …..

  14. يعطيك العافية اخ كميل على هـالموضوع الجميل .
    كنت ناوي اشتريه . وغيرت رايي .

  15. هاي اللزقة الي انت حاط صورتها ع الفاضي
    لكن في اسوارة نحاسية , تستخدم لتفريغ الطاقة
    وانا نصحني فيها الكابتن :))

  16. السلام عليكم ورحمة الله وبركاته رد على الموضوع متوفره عندي بأقل الاسعااااااااااااار بس 60 ريال سعودي للاستفسار ******

    ***تم حذف الرقم لأني ضد هالخرابيط وحرام الفلوس اللي تندفع عشانها***

  17. ألبوست قديم أدري بس توه العبط واصلني!!!! زوجي شاف واحد بالنادي لابسها وزعبط عليه وطيّر كم صاروخ .. ويه زوجي فرحان بها .. لا وماقال لي انه هولوغرام :( قال لي ان فيها معدن يعدّل الطاقة

    قسم بالله شر البلية ما يضحك :( لا وما خذها بـ 10 ههههههههههههه بصراحة انقهرت وبغيت اصقعها على راسة .. بس لأنه زوجي ابو عيالي ماحبيت افشله لبستها على مضض

  18. السلام عليكم جميعا
    يعطيك العافية اخ كميل على هـالموضوع الجميل .
    جاني هديه من أحد الزملاء ورفضت البسه ورفضت استلمه من عنده

  19. منقووووول

    http://aljalawi.net/wp-content/uploads/2011/11/Power-Balance-bracelets.jpg

    اعترفت الشركة الاسترالية المصنعه والمروجة لـ سوار الطاقه

    التي انتشرت بالفتره الاخيره و ” هب ” فيها الشباب

    بأن هذه الاسوار ما هي الا خدعه !

    .

    والشركة الآن على وشك الإفلاس

    بعد تغريمها مبلغ 57 مليون دولار

    من قبل سلطة حماية المستهلك في استراليا

    .

    واعترفت الشركة بأنه لا يوجد أي دليل علمي يثبت صحة هذه الأساور

    .

    حذر رئيس حماية المستهلك الاسترالي :

    يجب على المستهلكين بأن يكونوا حذرين من أي منتجات مشابه لهذا السوار

    ووصفه بأنه ليس إلا سوار مطاطي جميل الشكل فقط

    .

    المصدر

    .

    الصراحه انا عن نفسي مقتنع انها مجرد ” خرابيط “

    وهي عباره عن ” حاله نفسية “

    شنو سوار احطه بايدي يخليني قوي !

    يعني لو البس 10 اصير شمشون الجبار :P

    .

    ما رأيكم بهذه الاساور ؟

    إذا كنت تستعملها .. ما مدى تأثيرها عليك

    وهل اقتنعت بأنها عباره عن حاله نفسه ؟

  20. إضافة لما ذكره الأخ كميل ، أقول :

    بأننا لو نظرنا بعمق للموضوع فسنجد أننا أمام مدخل لخطأ كبير في المعتقدات يتمثل في اعتقاد الشخص بأنه لا حول له ولا قوة إلا بهذه الإسوارة .

    كما قال أحد الأطباء بأن مشروبات الطاقة تزرع في اعتقاد المدمن عليها أنه إن لم يشرب هذا المشروب فلن يستطيع أن يؤدي المجهود المطلوب منه.

    ونفس الكلام ينطبق على الإسوارة ، والله أعلم.

  21. الايونات السالبه Reply February 17, 2012 at 5:51 am

    الفكرة مش في شكل الاسورة ولكن الفكرة والفايده في الايونات اللي فيها وابحثوا في جوجل عن فوائد الايونات السالبه

  22. والله العظيم اني لابسهاوانها فعلا غيرت من التوازن عندي لدرجه اني الى الان مو مصدق لقيتهامع اخوي وجربناها شي مو طبيعي مدري وشلون ها السواره تغير في توازن الشخص بالشكل الرهيب الغير معقول وانا جاي هنا اقرى عنهاواستغربت من اللي يقول كلام فاضي لانه ما جربها جربها وتشوف والله ان تمسك راسك من الروعه ههههه

  23. اعــــصــــابــ

  24. السلام عليكم
    يا جماعة , خلونا نجربها والتجربة أكبر برهان , لا تنسو أن تقرؤا ما هو مكتوب على العلبة (آ في حال عدم الأاحساس بالفائدة يمكنكم استرداد ثمنها) يعني ليش منصدق منتجي بعض أنواع الألبان مثلا اللذين يقولون للمستهلك أن نوع اللبن من منتجاتنا بيحل مشاكل الهضم و ما أدري شنو منصدقهم و ما نخلي بيوتنا تفضى منها , كذلك مكتوب عايها انكم ممكن تسترجعون فلوسكم لو ما جسيتو في فايدة حتى ولو بعد ما تشربونها و تؤرجعون العبوات فارغة
    خلينا نشغل عقلنا شوي
    ودمتم

  25. السلام عليكم
    اخواني انا من اشد المعارضين لمثل هذه الانواع من التسويق للمنتج .. لقد رأيتها تباع صدفة في احد اسواق القاهرة وكان معي احد الزملاء وقامو بتجربتها فعلاً وبدأت بالسخرية حيال الموضوع إلا ان قمت بتجربتها بنفسي ووجدت الفرق وهو شيء فعلاً حقيقي واثبت التأثير الكبير عليّ وانا ليس لي دخل بالشركة ولا اقوم بالترويج لمنتجها فلذلك اقول لا نحكم على الامور من دون تجربتها ودعنا نرى ونتقصى عن العلم الذي يدعونه لكي نصل الى ما يتقبله عقلنا .
    وشكراً

    • مبين عليك ما قريت الموضوع، بالموضوع متكلمين عن تجارب منفصلة بأكثر من دولة وكلهم قالوا السوار ماله أي تأثير فعلي.

  26. انا فيه طبيب اعرفه كان عنده عدم توازن بأذونه ولما جربه يقول صار لي شهر راحت من الوشه اللي بالراس هاه صدقتي ولا لا هههههههههههههههههههه

  27. بس عندي الحل مقطع فيديو عاليوتيوب سحري بمعنى الكلمة يعني اتحداك انك ما تتخلص من هالسوار بقناعة شدييييدة بعد ما تشوف الفيديو
    اكتب عاليوتيوب سوار الوهن واقص ايدي لو ما تخلصت منه باسرع وقت ممكن

  28. عبدالله بن صبار Reply November 17, 2012 at 9:17 pm

    السلام عليكم كميل.. بداية أهنيك على هالموقع الأكثر من رائع.. وعلى أسلوبك الممتع :)

    بالنسبة للأساور هذي.. مرة كنت عند طبيب باطنية ألماني كبير بالسن وشفته لابسها، سألته بصراحة وبحكم تخصصك هل هي مفيدة وتنصحني ألبسها؟ قال لا بس عجبني شكلها ولبستها ولا أحس فيه فرق!

    هي موضة بس ياخي ما هضمتها :)

Trackbacks/Pingbacks

  1. سوار قوة التوازن اللي منتشر، صج ولا نصب؟ - May 7, 2011

    […] University هذا المقال أستخلص من مدونة Kumail+ ، ومن هنا يمكنك الإطلاع على المقال الأصلي tweetmeme_source = 'ArFeedz'; […]

Leave a Reply

 
%d bloggers like this: