خداع بصري: المخ مرات يفهم الألوان غلط

Jun 18

عيل منو يصدق الأخضر والأزرق بهالصورة نفس اللون؟

صارلي تقريباً اسبوعين وانا مقفّل مافيني اكتب شي، بالموت قصيت على روحي وقلت اكتب هالموضوع بسرعة. اللي شايف الصورة من قبل ما عليه لا يستعيل ويقول شايفها، راح اتكلم عن نقطه زيادة بنهاية الموضوع.

طالعوا هالصورة زين وقولوا لي جم لون تشوفون:

أربعه؟

غلط!!

سبعه! 

لا أتقشمر ، بس 3، وردي وبرتقالي وأخضر.. ماكو أزرق.

طااااع هذذذذااااا! كاهو الازرق موجود هني كا كا كاهووو!

شوف الصورة عدل من قريب:

واذا فتحت الفوتوشوب وخذيت عينة من اللون بالمكانين راح تلقاه:

اللون واحد، واللي تشوفه أزرق بالأساس أخضر.

شلون جذي؟

العيون تطالع الألوان وترسل صورتها للمخ، والمخ يطالع الصورة ويترجم اللون، بس هااااااااا! يترجم اللون مقارنة مع الألوان اللي حوالينه مو اللون بروحه من غير شي .

أكيد صايرلك هالموقف لما تروح تشتري خام دشداشة أو قميص و تختار خامة بيضا تطالعها، بعد شوي تشوف لما يحطونها يم خامه ثانية تنتبه انها صفرا ولا سكرية بس ما كنت مستوعب علما صارت يم لون أبيض منها!

نفس الشي مع الألوان الثانية مثل البني أو الكحلي أو الأصفر ..الخ عيونك تحكم عليهم بالألوان ودرجاتها أو حتى الإضاءة اللي بمحيطها، مرات إضاءات المحلات تكون خافتة وتخدع لما ترجع البيت تشوف اللي شريته لون غير اللي شفته هناك، كل هذا طبيعي ولازم تتأقلم على هالشغلة.

اللي مخلي هالصورة أقوى في خدعتها انهم مسوين الخطوط البرتقالية توقف عند الجهة اللي عبالك تصير زرقا، يعني الخطوط البرتقالية ما تدش بكل أجزاء الصورة، شوف الزووم مرة ثانية:

..هالحركة اهي اللي تعطي مخك عرچوب -على قولتنا بالكويتي- وتخليه يفسر اللون أزرق. المخ دايما يحاول يملي الفراغات اللي تشوفها عيونك، شكل الخطوط الضعيفه المتداخلة ببعضها بشكل دائري وايد دقيق ومخك يبي يفسر الصورة بسرعة عاد يتعرچب ويقول هالخطوط متصلة ببعض وتدش على كل الألوان ويترجم اللون باللون اللي يمه.

الفكرة نفسها مكررينها بوايد صور ثانية منتشرة بالايميلات بس بألوان ودواير واشكال مختلفة.

كلمة أخيرة

العين تقص عليك بسرعه، الخدعه هذي ما تنصاد إلا لما نسوي زووم ونحلل تفاصيلها، شكثر تصير لنا مواقف نفهمها غلط بنفس الطريقة اللي نشوفها بالصورة هذي وما نستوعب الموقف إلا لما “نسوي زووم” عشان نعرف “اللون” الأصلي بالصورة.

تخيل وانت تمشي بحديقة مرة وحده تشوف واحد يناقز على سلاحف عشان يذبحهم! أكيد تقعد تقول شفيه هالخبل؟ 

بس لما تروح له وتشوفه شنباته شكبرها على ويهه ولابس كبوس أحمر وأوفروول أزرق وتستوعب انه هذا شخصية ماريو اللي بألعاب نايتندو راح تقول إيييي عددددللللللل ماريو دايما يذبح سلاحف عشان ينقذ الأميرة خله بحاله وعسى الله يوفقه، كل الاستغراب اللي براسك يروح وينقلب موقفك منه 180 درجة.

لما سويت “زووم”  عليه عرفت القمنده ،

كل واحد يضبّط الزوم اللي عنده لا يخورها مع خلق الله 

المصادر/

Discover Magazine

تحديث:

هذا فيديو يراويك فكرة الخدعة نفسها بأسلوب ثاني :)

,   | 

18 Responses to “خداع بصري: المخ مرات يفهم الألوان غلط”

  1. أناشفتهم 5 ألوان
    عبالي صدت الحركه XD

    يعطيك العافيه ..

  2. السلام عليكم اخوي

    انا متابعة لمدونتك من مدة واكتشفتها بالصدفة وللان كل ما ادخلها اقعد عليها بالساعات

    استفدت منها اشياء كثير واللي يعجبني اسلوبك الفكاهي اللي يخلي المعلومة تنفهم وتنحفظ اسرع

    وكمان ربطك بين الموضوع ووقعنا الحالي زيحكاية الزوم هنا

    اختك هناء من جدة

  3. وسوالف هالمخ ما تخلص
    كله قاص علينا واحنا مصدقينه

    موضوع جداً رائع
    معلومات أستفدت منها

    ما قصرت أخوي عالطرح
    يعطيك العافية
    =)

  4. تصدق أحياناً اللهجة الكويتية ما افهم لها

    زياد – جده

  5. ghareeeeba walla, youm zwamt banaw inhom grab yam ba3ath… Inzain t-haga fee nas yshofoon i9oora 3 alwan..? wila ma7ad yigdar..?

  6. خخخخخخخ رهيبة مواضيعك اللي تكتبها على السريع

  7. السلام عليكم..
    الصراحة انا معجب اب مدونتك..
    و بما اني توني راد من ملعب ماي و صابون و متكسر و مرضوض بغيت اسألك ليش اذا انطقينا بالعظم تطلع رضه و ليش تنتفخ..:P
    و يعطيك العافيه..

  8. و ان قول سهله وين الصعوبه في الموضوع ثلاث الوان و اخرتها غلط ههههههههههه

  9. ههههههههههههههههههههههههه عاجبني مثال ماريو
    وهالمخ من جد دايم يقص علينا
    كيب ات اب
    ولا تطوول الغيبات

  10. مقال رائع وجميل ومدونة جميلة شكرا لك واتمنى لك مزيد من النجاح …

  11. شي بديع :) عجبتني الفكره

  12. very nice post
    keep it up :)

  13. معلومه جدا قيمه اشكرك اخي و اعط مدونتك خمس نجوم على تميزك في وضع المواضيع القيمه

  14. الفيديو غير حقيقي ،، هذا فوتوشوب

    LOOL

Trackbacks/Pingbacks

  1. ليش الأطباء والممرضين يلبسون أخضر أو أزرق؟ | Kumail+ - December 2, 2011

    […] من قبل عن خداع بصري ان المخ مرات يترجم الألوان غلط، نفس الشي بالضبط هني. لما العين تطالع أحشاء ودم باللون […]

  2. ليش الأطباء والممرضين يلبسون أخضر أو أزرق؟ - December 3, 2011

    […] من قبل عن خداع بصري ان المخ مرات يترجم الألوان غلط، نفس الشي بالضبط هني. لما العين تطالع أحشاء ودم باللون […]

  3. ليش الاطباء والممرضين يلبسون اخضر او ازرق ؟ « 9byaan - December 9, 2011

    […] من قبل عن خداع بصري ان المخ مرات يترجم الألوان غلط، نفس الشي بالضبط هني. لما العين تطالع أحشاء ودم باللون […]

Leave a Reply

 
%d bloggers like this: