صج الفيمتو مضر؟ وباجي الألوان الصناعية في المنتجات؟

Aug 27

بطل الموائد الرمضانية في العالم العربي انتشر عنه ايميل في الفترة الأخيرة خلاني اكتب هالموضوع.

التهمة: احتواءه على صبغة مضرة ومسببة بأمراض أو أورام سرطانية –الشر عنكم بعيد ان شاء الله-.

من فترة قريت بمدونة فرانكوم موضوع يتحلطم فيه عن الايميلات اللي توصله خلال شهر رمضان بأخطار فيمتو، فرانكوم يقول الظاهر هالسوالف تطلع من الشركات المنافسة لضرب المنتج بطريقة غير مباشرة. فكرت بالموضوع وقلت خل اشوف شالسالفة عشان نستفيد خاصة مع منتج كبير ومشهور مثل الفيمتو.

رحت طالعت اول شي كلام الايميلات من قوقل ولقيت الاتهامات طويلة عريضة بس ملخصها النقاط التالية:

التهمة الأولى

احتواءه على لون أحمر اسمه ألورا – Allura Red AC رمزه العلمي E129 ويقولون اللون مضر ومسرطن.

الجواب

اللون هذا له عدة أسماء وينكتب بأكثر من طريقة:

Allura Red AC
E129
Food Red 17
C.I. 16035
FD&C Red 40

عاد يعطونك بالايميل فيلم هندي  الأمراض السرطانية في المعده والكبد والمثانه تزيد بعد رمضان والسبب الفيمتو! كللللههه من الفيمتو ! اهو أكيد ألف بالمايه السبب بكل بلاوي السرطان اللي تطلع بعد رمضان في العالم العربي والإسلامي! زين ما قالوا مخطط صهيوني شيطاني ضد البشرية والمسلمين بالخصوص .

الكلام هذا كله ما حطوا له دليل، أول مرة اسمع الأمراض السرطانية تزيد بعد رمضان ، وأول مرة أسمع مركز الأورام حذر من الفيمتو وأخطاره، بس الكلام ببلاش والتأليف صاير شغل اللي ما عنده شغل. بعدين في حال كان صج تزيد الأمراض بعد رمضان شمعنى بس من الفيمتو؟ ليش مو من الإفراط بالحلويات والكنافة والبينك بيري والخرابيط والقرقيعان والغبقات والدهون وغيره وغيره؟

في شي يثبت العلاقة المباشرة بين كل هالأمراض -إذا كانت صج تزيد مثل ما يقولون- مع الفيمتو؟

يعني اللون مو مضر؟

الكلام هني مشربك وايد، الملخص اللي وصلت له انه امبله مضر بس مو بروحه، مضر لما يكون مختلط مع مكونات ثانية، ومحد متأكد شكثر مضر، يعني واااايد مضر ولا شويه لي الحين ما لقيت شي واضح وأكيد.

اللي لقيته انه امبله له تأثير سلبي على درجة نشاط اليهال، حتى درجة ذكاءهم ونسبة انتباههم والتركيز،

واحتمااال نعم يكون عامل مسبب للسرطان!  بس الكلام واضح وصريح انه مجرد عامل واحد والعوامل وايده في كل مكان اليوم.

الكلام مو بس عن اللون الأحمر ألورا اللي موضوعنا عنه، الكلام يشمل:

Sunset yellow (E110) (FD&C Yellow #6) – لون يستخدمونه بالمشروبات الغازية 
Carmoisine (E122) – لون أحمر يستخدمونه بالجلي (الظاهر يعني حلويات الجلي) 
Tartrazine (E102) (FD&C Yellow #5) – لون أصفر 
Ponceau 4R (E124) – لون أحمر 
Quinoline yellow (E104) – لون أصفر هم يحطونه في الأكل 
Allura red AC (E129) (FD&C Red #40) – لون أحمر / برتقالي

هذيل الألوان الستة كانوا مشمولين بالدراسة اللي صارت وبالنتايج كانوا يدعون الشركات انهم يزيلون استخدامهم تدريجياً مع الوقت واستخدام بدايل عنها.

بعد الدراسة قامت هيئة سلامة الأغذية البريطانية بطلب مراجعة النتايج من قبل هيئة سلامة الأغذية الأوروبية واستنتجوا ان الأدلة ضعيفة ومحدودة لأعراض قليلة لا غير، والكميات المستخدمة في المنتجات ما تحتاج التغيير أو التعديل بناءاً على اللي ورد فيها. بس هم وافقوا انهم راح يوقفون استخدام الألوان تدريجياً الظاهر من باب الاحتياط.

التهمة الثانية

اللون الأحمر هذا ممنوع في اوروبا بس حقنا بالدول العربية عادي.

الجواب

الكلام هذا يخلط الصح بالغلط ويعطيك الصورة المطلوبة حق كاتب الايميل، أول شي في أوروبا في قوانين عامه حق التجارة مع دول الاتحاد الاوروبي، وفي قوانين محلية للدول وممكن تختلف عن قوانين الاتحاد الأوروبي.

مثلاً اللون الأحمر هذا ألورا اللي يقولون عنه “ما ينصحون” باستخدامه واستهلاكه حق اليهال بس مسموح قانونياً. القوانين المحلية في الدنمارك وبلجيكا وفرنسا وسويسرا يمنعون اللون امبله والظاهر في دول أكثر بنفس الموقف.

بأمريكا اللون مسموح استخدامه بالأدوية والمكياج والغذاء وموافقين عليه إدارة الغذاء والدواء – Food and Drug Administration (FDA) المشهورة عالمياً.

التهمة الثالثة

نقطه ثانية يذكرونها انهم ما يحطون مكونات الفيمتو كاملة، ويدخل في مكوناته “الملح الإندونيسي وإسمه العلمي جلوتمايت الصوديوم وهي ماده محسنة للطعم وتفتح النفس للأكل ، ولكن المشكلة أنها تسبب تلف في المخ والكبد من كثرة الإستعمال”.

الجواب

مرة ثانية هذا كله كلام ما عليه دليل ولا نقدر ناخذه ولا نعتمده، شلون نتأكد يعني؟ أنا أقدر أقول عن أي شي فيه مكونات مو مكتوبة ومن ضمنها شي سام مسرطن يخليك تتحول خروف إذا شربته ثلاث مرات بعد الغدا .

بعدين هذي صورة لمحتويات الفيمتو التقطتها عالطاير:

انت شرايك يا كُميل، يعني بتشرب شي فيه هاللون ولا لأ ؟

راح اتبع قاعدة “الباب اللي اييك منه الريح سده واستريح” والصحة ما فيها قشمرة كلش .

أكرر واعيد السالفة مو بس فيمتو! أحب أعتبر هالموضوع تبرئة حق الفيمتو من باب انه حاله حال وايد منتجات ثانية يتداولونها الناس طبيعي من غير مشاكل. السالفة تشمل وايد منتجات اللي فيها الألوان المذكورة في الدراسات، شوفوا السكتلز –Skittles والستاربرست – Starburst وككاو الـM&M وكل حلويات الجلي اللي فيها ألوان صناعية.

شوفوا بهالموقع كل المنتجات والحلويات اللي يدخل بتكوينها اللون المقصود وطقوا اصبع:

http://www.red40.com/

استقصاد منتج واحد بين الكل ظلم وغلط لازم نعرف سببه، فعلاً مو بعيد واحد عنده مصلحه يبي يخسّر منتج على حساب منتجات ثانية.

أنا أقول الظليمة شينه وكل واحد ينتبه عالمكونات ويراعي الأكل الصحي وخاصة أكل البيت بمواده الطبيعية وايد أحسن من الأغراض الصناعية.

المصادر/

Wikipedia

LiveStrong

UK Food Guide

Food Standards Agency

BBC News 1

BBC News 2

CNN

17 Responses to “صج الفيمتو مضر؟ وباجي الألوان الصناعية في المنتجات؟”

  1. قواك الله على هالمعلومة :)
    ولول انها يت متأخرة في آخر أيام رمضان
    رحنا وطي

    الله الحافظ
    :)

    • الله يقويك ويخليك :)

      وصج يت متأخرة بس شسوي يخوك التوقيت الرمضاني متعب الواحد ما يدري متى يكتب ومتى يقرا ومتى يجابل العبادات ولا التلفزيون ولا الزوارات

      يالله ما عليه عالأقل الحين عرفنا، وان شاء الله يبعد عن الجميع كل شر ;)

  2. كلامك منطجي يا باشه .. وانا ازيد على كلامك صار لنا سنين وحنا نشرب من هالفيمنو ليش الحين صار مسرطن؟ ولى متى بس نسمع بدون اي ادله؟ وبعدين ترى الكثره والافراط بالاكل والشرب اتسبب امراض ثانيه الله العالم اشكثر لها مضاعفات بالمستقبل

    • من ناحية من زمان يشربونه وما صارلهم شي انا صراحة ما اعتمد على هالنقطة،

      بعض الآثار الصحية ما تبين إلا بعد سنين أو حتى يبين في العيال لا سمح الله الواحد زين يدير باله

      مثل ما قلت الإفراط بأي شي راح يسبب ضرر والمعدة بيت الداء :)

  3. مجهود رائع لك كل الشكر و التقدير
    يا كويت ميل :))))

    • العفو والشكر يرجع لكم للمتابعه والتعليق

      بس ترى الاسم كُميل مو كويت ميل ماله علاقه

  4. بارك الله فيك
    والله ادري انه كُميل بس ابطفرك
    على قوله تعليقات واحد من الشباب
    قبل فتره :))

  5. اشكرك على مجهودك وبحوثك الرائعة دائما

    واعتقد في العديد من المنتجات التي نستخدمها يوميا هي اخطر من الفيمتو بملايين المرات

    مثل المشروبات الغازيه

  6. بال12 شهر بالسنه نشربه بس بشهر رمضان
    مايت على هالفيمتو المسكين
    البيبسي يتراوالي اخطر منه بوااايد والاوادم يشربونه اكثر من الماي طول السنه واذا بيرقع السالفه يقولك انا اشرب دايت

    قواك الله وعيدك مبارك

  7. شكرا مسيو كُميل

    الحين بتشرب ولا منت شارب ؟؟

    الفيمتو صارله اكثر من ١٠٠ سنه محد اشتكى

  8. يعطيك العافية اخوي كميل على هالبحث و التوضيح

    انا قريت هالايميلات يعني ممكن الناس تصدقها بس اللي خربها سالفة انه السرطان يكثر عقب رمضان! الصراحه شي يضحك يعني بهالسرعه تتكون الخلايا السرطانية! بشهر واحد لووول

  9. كفيت و وفيت .. الله يعطيك العافيه

    :)

  10. اذا انت مو متاكد من اضراره اجل انا اقولكم يا جماعه ان الفيمتو مسرطن وممنوع في بعض دول اوروبا وذالك باحتوائه على اللورا الحمراء. وانتبهوا من كل العصائر المعلبه وكل الاكلات المعلبه واي شي محطوط فيه مواد اضافيه.

    الي بيناقش ويجادل هو الخسران اما الي يبي الحق راح يلقاه

    سلام عليكم

  11. جزاك الله خير على هالمعلومات المفيدة

  12. ‎:( هذا حالنا بعد الفطور ‎‫#فيمتو‬‏ ‎http://pic.twitter.com/udmmA6Yt‏

Leave a Reply

 
%d bloggers like this: