قصة تصميم شعار شركة أبل – Apple ومعناه

Sep 03

بلا الخرابيط اللي نسمعها عن تفاحة المعرفة مادري تفاحة آدم، والعضة معاناها بايت – Byte نغزة كمبيوتريه، الكلام ببلاش والإشاعات الخمطة بفلس،

انا اقول لكم المعنى الأصلي حسب كلام اللي صمم الشعار شتبون بعد؟

التفاحة اللي صارت من أشهر العلامات التجارية في عالم التكنولوجيا قررت -أنا كُميل ما غيري - اني أكتب عن سالفتها دام الناس لي الحينها تسولف عن استقالة الأب الروحي للشركة عمو ستيف جوبز.

منو اللي صمم الشعار؟

واحد أبضاي عنده شنبات في عالم الفن وتصميم الشعارات التجارية اسمه روب جانوف – Rob Janoff. موقعه الرسمي على الرابط هني وهذي صورته:

rob-janoff

وهذي صورته سنة 1977 ايام شبابه وبنفس السنة اللي صمم فيها الشعار، اتعب عالشنب :

rob-janoff-then

الموضوع حصلت اجاباته كلها في مقابله انا راح اخذ منها الأسئلة اللي لها علاقة بالموضوع واعطيكم الخلاصة بطريقتي بالعربي.

السؤال من الموقع صاحب المقابلة والجواب من المصمم.

متى صممت شعار أبل الأصلي المخطط بالألوان؟

بوقت مبچر من سنة 1977، الوكالة حصلت حساب أبل خلال شهر يناير وتم عرض الشعار مع جهاز أبل 2 اليديد خلال شهر أبريل من نفس السنة.

عطوك ملخص أو إرشادات عن الشعار وشكله عشان تشتغل عليه؟

صراحة لا. بس التوصية الوحيده اللي قالها ستيف جوبز وكانت تضحّك قال: “لا تسويه كيوت” . كانوا يعطون ملخصات على الأعمال اللي بعدها مثل الإعلانات التعريفية وبروشورات بس الشعار لا ما قالوا لي شي.

كان في تصميم لشعار ثاني قبل تصميمي اللي عن إسحاق نيوتن مرسوم بقلم حبر:

full.2366288306_b60155ce23_o

صمم هالشعار رون واين – Ron Wayne كان زميل عمل لفترة قصيرة حيل مع ستيف جوبز وستيف ووزنياك بس بعدين باع حصته لأنه كان يحاتي الالتزامات المالية اللي راح يتحملونها. كان يراعي مسؤولية عايلته الصغيرة بس جوبز و ووزنياك عزاب ما يحاتون هالناحية.

أتوقع ستيف جوبز كان شاد حيله على جهاز الأبل 2 – Apple II واستوعب تصميم هالشعار ما يلوق من جذي طلب غيره.

هذي صورة جهاز أبل 2:

جم نسخة صنعت عشان تعرض الشغل عليهم؟

نسختين، وحده تفاحة مقرومه والثانيه تفاحة كاملة. بس عشان لا يقعد يقول التفاحة المقرومة “حدها كيوت” . أشوه اختار النسخة اللي تعطي طابع شخصي أكثر اللي هي مع العضه . التصميم كان مباشر ما يبيله تفكير وكنت ملزوم احط شي عن التفاح. لما قدمتهم حقه عطيته بعض النسخ الجانبيه؛ نفس الشعار بس مخطط، نسخة لون كامل، نسخة معدنية كلهم على نفس التصميم.

عيل حتى ايامها سويت نسخة معدنية ونسخة بلون كامل؟

إي كنت تقريباً مجبور على هالشي. لما تشتغل على طباعة لون أو لونين لازم تختار نسخة واضحة وكنت افكر الشعار المخطط ما راح يضبط معانه خاصة بالطباعة بالأبيض والأسود.

apple_logo_evolution

الألوان المخططة هذي تمثل ثقافة الهبي – Hippy Culture المشهورة موضتها ذيك الأيام؟

جزء كبير منه اي، الاثنين -انا وستيف جوبز- كنا مع هالموضة والثقافة. بس السبب الأقوى ان جهاز أبل 2 كان أول جهاز كمبيوتر شخصي يعرض الصور بالألوان. يعني الخطوط الملونة تمثل أعمدة الألوان اللي نشوفهم بالتلفزيون. زيد عليها كانت محاولة عشان يصير الشعار سهل استقباله عند الجميع وخاصة الصغار عشان شغل المدارس.

شنو تمثّل العضّه –القرمه- عالتفاحة؟ هل هي إشارة إلى مصطلح الكمبيوتر “بايت”؟

هل هي إشارة إلى قصة النبي آدم وشلون حواء “أكلت” من التفاحة المحرمة؟

هل التفاحة نفسها رمز لقصة اكتشاف الجاذبية ونيوتن مع التفاحة اللي طاحت على راسه تحت الشجره؟

كل هالقصص حلوة، بس للأسف ولا وحده منهم لها علاقة بالسبب والتصميم . من وجهة نظر مصمم -ويمكن مر عليك هالشي- أحد أكبر الظواهر اللي تمر عليك انك تصمم شعار لأي سبب من الأسباب وبعد چم سنة تكتشف افتراضات تشرح بعض اعمالك، وكل هالشغلات خرابيط. اعتبرها قصص شعبية حلوة، واحد يبديها والناس كلهم “إي والله اكيد چذي السالفة”. 

يعني ماكو احتمال انك تأثرت بهالقصص حتى بصورة لا شعوريه وانت تصمم الشعار؟

500px-Apple_Computer_Logo.svg_صراحة أنا واحد من أقل الناس تديّناً، من چذي قصة آدم وحواء مالها علاقة موليّه. قضمة المعرفة سالفتها حلوة بس هم مالها علاقة. وايد قصص غيرها اشوف فيها إغراءات أكثر تجاه السبب الحقيقي من هالقصص.

تورينغ – Turing المشهور بأبو علوم الكمبيوتر واللي انتحر في بداية الخمسينات كان بريطاني ومتهم بالشذوذ الجنسي -وصج كان شاذ- حكموا عليه بالسجن وانتحر عشان ينحاش منه. سمعت مرة ان شعار التفاحة الملونة كان تكريم غير مباشر حقه (ألوان قوس قزح مشهورة بدول الغرب انها ترمز للشواذ). بعض الناس عبالهم سويت التفاحة ملونة عشان علَم الشواذ، وفترة طويلة الناس من صجهم خذوا بهالتفسير. الجزء الكوول الثاني من القصة ان الظاهر تورينغ انتحر بتفاحة مسمومة بالسيانيد. مو بس جذي، بعدين اكتشفت ان ألان تورينغ – Alan Turing كان يحب قصة بياض الثلج وشلون طاحت تنام للأبد بعد ما قرمت من تفاحة مسمومة علما قامت بمساعدة الأمير.

المهم، لما اقول السبب الصجي تلقاه حد الإحباط بس هم اقوله: صممته مع قرمه (عضة) عشان يكون مقياس ويبين حجم التفاحة الفعلي ما يكون عبالهم هذي حبة كرز (يعني حجم العضه يعطي انطباع واضح انها تفاحه مو حبة كرز). بالإضافة ان القرمه فيها إبداع ورمزيه انك ماكل من التفاحة، شي الكل يقدر يجربه ومعروف بكل الثقافات. أي واحد مرت عليه تفاحة احتمال كبير قرمها ويحصّل اللي تشوفه بشعار أبل.

لما صممت الشعار وخلصته لقيت المدير الفني يقول: “عاد تدري، في مصطلح كمبيوتر اسمه بايت – byte ” (يعني صوت الكلمة نفس كلمة عضه بالانجليزي – bite) ولا أرد عليه: “يالله عااااااااااد!! ” من چذي السالفة يت مضبوطه عدل بس هم صدفه، على ايامها كان لازم يشرحون لي أبسط المفردات اللي لها علاقة بالكمبيوتر.

tumblr_lopaknFDME1qzxysco1_500

واضح انك ما صممت الشعار بالكمبيوتر، صح؟

(ملخص الجواب) أيامها بس استخدمت قلم رصاص واوراق وصمغ وورق ملون وغيره.

هذا كله الجزء المتعلق بالموضوع من المقابلة، اللي يبي يقراها كاملة يقدر على هالرابط.

زين يمكن واحد يسأل هالكلام كله عن الشعار، بس شمعنى ستيف جوبز و صاحبه ووزنياك اختاروا اسم التفاحة Apple بالأساس؟

أنقل لكم جواب ووزنياك الشخصي في هالفيديو:

الملخص: ستيف جوبز اقترح اسم Apple بعد ما رجع من ولاية اوريغن، كان يشتغل بأحد البساتين هناك، يقول –الظاهر- واحد يشتغل معاه بالبستان اقترح الاسم وعجبه. لما اقترح ستيف جوبز اسم Apple Computers ووزنياك قال له اخاف نتناشب مع شركة Apple Records وتصير محاكم وقضايا، وصج صارت وايد قضايا وخسروا منها فلوس بس الاسم يستاهل.

وبس هذي القصة من طأطأ لي سلام عليكم :) تحياتي التفاحيّة!

هذي خلفيات سطح مكتب على شعار أبل:

13 Responses to “قصة تصميم شعار شركة أبل – Apple ومعناه”

  1. صج أبل من أكثر الشركات اللي كانت متميزة بالوقو حقها
    تحسه يعطي جذي فخامة …
    من كم يوم سمعت هالكلمة من وحده “”التفاح إذا كلناه نفعناوإذا شريناه كشخنا”” من ترجمتك للمقابلة حسيتك أنت اللي مصمم الشعار

  2. مادري ليش احس ان ستيف جوبز من الناس لي مايهمه مثل هالاشياء اهم شئ عنده العمل مايراعي الاسماء والاشكال

    خصوصا واني اشوف اسم ابل بعيد عن التقنية

  3. وأخيرا عرفنا القصة الحقيقة

    يعطيك العافية أخوي
    ما قصرت عالمعلومات القيمة

  4. اذا ما شفت فيلم قراصنة وادي السيلكون “pirates of the silicon valley” لازم اتشوفه :)

  5. السلام عليكم
    اشكرك على القصه الحقيقة
    شركة ابل من افضل الشركات في التقنية ان لم تكن افضلها بل الشركة الوحيدة المتكاملها
    المهم مابي الموضوع يتحول الى تعصب في فلم سينمائية عجبني اسمه pirates of the silicon valley
    وفي حلقة من برنامج the story of the intrnet
    تلكم عن بداية شركة ابل
    بالتوفيق للجميع

  6. موضوع رائع وقيّم ومتعوب عليه ..

    لكن هل توافقني الرأي :
    http://bit.ly/pJKqwc ؟؟

  7. مبدع والله مبدع ياكميل..

    ترجمة مرعبه للمقاله !!

    وتدخل المعلومه غصب لمخ القارئ..

    الله يوفجك

    وانا من اكثر واشد متابعينك ولكن بصمت..

  8. حتى أنه استعمل النسبة الذهبية! !!!

  9. واخيرا سمعنا الكلام الصح شكرا

  10. انا الصراحة كتيييييير بحب شعار شركة ابل
    والموضوع حلو كتير
    والله يعطيك العافية
    بس حاسة انو الئصة فيها خطأ

  11. ..

    مآ فهمت .. ولاآ شي !!

    شعآر شركة آبل حلو

    صح جاية عرض و مالي داعي

  12. يعني موضوع حلو .. وتشكر عليه .. بس الله يفظك اكتب لغة عربية صح .. ايش دا وقسم اقري السطر عشر مرات عشان افهم

  13. مشكووووور رغم انها جاءت متاخره

Leave a Reply

 
%d bloggers like this: