ليش يرسمون شخصيات الكارتون بأربع أصابع؟

Sep 11

5216-largeليش ما يرسمون لهم خمس اصابع نفس البشر؟ وليش كانوا يرسمونهم لابسين دسوس؟

أمس رحت فيلم السنافر ، صج عبيط والتمثيل لك عليه بس هم حلو ويستاهل خاصة حق الصغار. لما تسمع اليهال يضحكون بالسينما بتلقى روحك تضحك معاهم حتى لو على ملاقة 

بأحد اللقطات بالفيلم يحطون الزوجه تبي تسوي “هاي فايف” – High Five حق سنفورة، عاد اول شي تقول لها High Five! بعدين تسكت تقول قصدي High Four!  يعني تنتبه ان سنفورة عندها أربع أصابع مو خمسة.

هني اشتغل فيني السؤال: ليش يرسمونهم بأربع أصابع (ابهام + ثلاث اصابع)؟  حتى أذكر باجي الكارتونات أغلبها ملاحظ أربع أصابع مو خمسة.

الجواب بكل بساطة: رسم 4 أصابع أسرع وأبسط وأسهل من رسم 5

As Walter Lantz mentioned in one of his on screen appearances on THE WOODY WOODPECKER SHOW, he stated, “You may have noticed that cartoon characters traditionally have only three fingers and a thumb. Why, I don’t know. But we’ve found that they were easier to draw that way….”

رسم الأربع أصابع بدا من أول أيام الأفلام الكارتونية قبل الكمبيوتر والأجهزة المتطورة الموجودة هالأيام. على ايامها كل ثانية وحده من فيلم الكارتون كانوا يحتاجون يرسمون له 24 لقطة ثابتة عشان يعطي الصورة متحركة!
احسبها معاي وانا خوك:

الدقيقة فيها 60 ثانية،

يعني الدقيقة الوحده = 24 صورة * 60 ثانية = 1440 صورة ثابتة للدقيقة

حلقة الكارتون الوحده ايام اول تقريبا كانت 10 دقايق

10 دقايق * 1440 = 14,400 صورة ثابتة لحلقة الكارتون الوحده!! 

والصورة الثابتة يعني رسم رصاص وبعدين تحديد بالحبر وبعدها تلوين وضبطها مع الخلفية الثابتة.

وتقريبا كل هالكلام شغل ايد بحت ماكو أجهزة وكمبيوترات نفس هالايام، وشغل الايد غاااالي ناااار 

زين شكو كل هذا بعدد الأصابع؟ 

الاستديوهات كان عليهم ضغط كبير عشان يسوون عالأقل 3 أو 4 حلقات في الشهر الواحد، يمكن ما تحس فيها بس تقليل اصبع واحد من الايد كان شي كبـــــيــــــــــــر حق الرسامين ويفرق معاهم واااايد! عالأقل حذف اصبع وايد منطقي أكثر من حذف عين ولا اذن ولا حتى ريل..الخ.

لنفس السبب هم كانت الشخصيات الكارتونية ما تغير ملابسها إلا نادراً جداً جداً، وكلما يقدرون يخلونهم لابسين جواتي –يكرم السامع والقارئ-، زين افتكوا من اصبع بالايد ماله داعي يجبرون روحهم يرسمون اصابع الريل  لول.

اذا مو مقتنع كفاية شوف مقطع الفيديو هذا يشرحون لك شلون كانوا يفكرون لأي مستوى بس عشان يوفرون وقت برسم الشخصيات الكارتونية والصور الثابتة المطلوبة:

بس هذا كله ايام اول، شكو لي الحين يرسمون الشخصيات بأربع اصابع؟ (مثل فيلم السنافر اللي قلت عنه)

في عامل الثاني بالموضوع ساعد السبب الأول اللي تكلمت عنه: ان الأربع اصابع “تبسّط” شكل الشخصية، لما تشوف الأربع اصابع تكون الشخصية الكارتونية فيها تبسيط بشكل مبالغ، تلقى الجذع مثلاً دائري أو بيضاوي، والريول ضخمة بس الشخصية تبقى قصيرة في الطول، الأربع اصابع تعطي انتفاخ لليد يتناسق مع كل هالنوع من الرسم ويصير بسيط وبتعبير ثاني “كيوت” بشكل مناسب لفيلم كارتوني .

عشان جذي نشوف لي الحين مع كل التطور اللي صار في الكمبيوترات وتكنولوجيا الستديوهات لي الحين حافظوا على تصميم الأربع اصابع وما تغير، مثل فيلم السنافر وشخصياته. ستايل الأربع اصابع صار مرغوب ومناسب اكثر لنوع الرسم الكارتوني اللي متعودين عليه الجمهور من الرسم الواقعي المفصّل والدقيق.

thumbs up

أحد دعايات ديزني أوروبا تبين شكثر صار ستايل الأصابع الأربعة محبوب

وليش نشوف شخصيات يلبسون دسوس (قفازات) بيضا؟

أول مثال يطري على بال الناس بهالسؤال هو ميكي ماوس، أغلب شخصيات ميكي ماوس لون اجسامهم اسود، رسم الدسوس البيضا كانت حركة من الاستديو عشان يصير تباين بين لون الايد لما يمر على الجسم ويصير تعبيره أوضح حق المشاهدين، حتى حركة الاصابع وهي متداخله على بعضها البعض يصير فيها تفصيل حلو. مو بس الجسم، حتى الخلفية بشكل عام، اللون الأبيض نسبياً استخدامه قليل في خلفيات الكارتون وحركة وشكل الايد راح يبين اكثر فيه من الألوان الثانية. عشان جذي هم بعض أجزاء وودي وود بيكر نشوفه يلبس دسوس، وبغز باني، وبعض الشخصيات المشابهة وبنفس الفترة.

بعدها صارت السالفة ستايل أكثر من حركة لها سبب :) حتى الاستديوهات فيها هبّات ومع الخيل يا شقرا

شوفوا هالصوره عشان تحسون بسالفة لون جسم الشخصيات:

picture-of-mickey-mouse-and-friends

Mickey-Mouse-9

اختم الموضوع بفيديو سريع لطريقة رسم وجه ميكي ماوس:

المصادر/

TheStraightDope

tvtropes.org

tvtropes.org 2

Golden Cartoons Forums

, ,   | 

19 Responses to “ليش يرسمون شخصيات الكارتون بأربع أصابع؟”

  1. نفس السؤال اللي كنت اسإله نفسي قبل لاني كنت دايما ارسم شخصيات كارتونية وخاصة السنافر. .ونفس جوابكم بالضبط. .

  2. هذا يطرح سؤال آخر أهم
    لمذا خلق الله الانسان بخمسة أصابع وليس أربعة؟

  3. مرررره وواااااوووو
    كنت دايم اسأل نفسي عن سر الأصابع الاربعه
    وكيف يرسمون الكرتون وهالاشيا
    يعطيك العافيه ع الشرح والمصادر
    ماقصررت
    Nona mohed

  4. مشكور على المجهود في شرح طريقة الرسوم و على الموضوع

    اجتهاد مشكور بس الفأر حقيقة له أربع أصابع باليد و خمسة بالقدم

    http://bit.ly/nuekqH

    بالرابط ادناه صورة الفتاة لديها خمس أصابع

    http://bit.ly/oiBal8

    • العفو حياك

      الاربع اصابع مو بس عن الفيران في الكارتونات، حتى السنافر واغلب الشخصيات البشرية وبقية الحيوانات يرسمونها باربع اصابع. مثل ما قلت هذا العرف السائد في الاستديوهات الغربية ايام اول.

      بخصوص اللقطه من كارتون عدنان ولينا شوي تقدر تعتبره حاله خاصه، الكارتون من انتاج استديو غيبلي الياباني ويختلف في ثقافته وطريقته عن الاستديوهات الامريكية او الاوروبيه. و ازيدك من الشعر بيت واقولك احتمال كبير تلقى بأفلام ديزني الكلاسيكية يرسمونهم بخمس اصابع كاملة لانهم كانوا يبون يصيرون دقيقين وواقعيين في اعمالهم وعندهم ميزانية قوية مقارنة بباجي الاستديوهات.

      انا ما قلت ان القانون لااااازم اي شخصية وكل كارتون يكون فيه اربه اصابع. انا بس قلت هذا المشهور اللي نشوفه وهذا سببه. :)

  5. تشكراات كميل باشا

    ناطر الموضوع اللي مواعدني فيه

  6. مقال ممتاز ومدونة رائعة شكرا لك وبالتوفيق ….

  7. يالله قبل الاسبوع كان هذا السؤال يجول في تفكيري شكراً على الاجابه

  8. لما تسمع اليهال يضحكون بالسينما بتلقى روحك تضحك معاهم حتى لو على ملاقة

    LMAO!!!! XD

    Thank you for sharing this. Loved this post (^.^)

  9. 14,400 SHEETS???? 7aram walla el trees :\ mshan heek el ‘3abat endatharat :\

  10. WOOOOOOOOOOOW thats sooo cooooooooool amazing maaan

  11. Wow..ma Kent metwaqe3 enah al ejaba 3ala al so2al tkon Chetheeh..
    Thanks man o Allah ya36eek al 3afya

  12. يجونك بعض الناس ويقولن : “إنها الماسونية” ومسوين نفسهم اكتشفوا حاجه تضر الدين
    – يعطيك العافيه كميل .. مميز كالعادة

  13. سؤال واايد طرى على بالي

    لووووول

    شكراً للتوضيح

Leave a Reply

 
%d bloggers like this: