كارتونات ديزني وقصص الأطفال ونهاياتهم الأصلية (الجزء الأول)
General+
25. Sep, 2011 @ 5:46 pm
22 Comments
حتى كارتونات ديزني ما سلمت من عمليات التجميل والترقيع.
الجزء الأول: ذات الرداء الأحمر، حورية البحر، وبياض الثلج.
المفروض هالموضوع كان خالص أمس بس تباً حق مستشفى السيف ماقدرت أخلصه إلا اليوم. سااااعتييييين يالظلاّم مزروع عندكم وانا ماخذ موعد؟ 
حق شنو الموعد إذا أنزرع ساعتين؟ يقولون لي ما عليه الدكتور توه راجع من اجازة، يعني لما الدكتور يرجع من إجازة المواعيد كلها تصير خرطي مالها معنى؟
عشان چذي أحب أهدي هالموضوع حق الأخ عبدالرحمن الفريدي اللي كلمني عالفيس بوك وتعاطف معاي وانا معصب ومتنرفز من مستشفى السيف تباً لهم. يقولون أبحر برعايتنا، أقول لو أبحر بمعلبات فول أحسن! 
ملاحظة مهمة: أغلب القصص القديمة في منها أكثر من نسخة، وأغلب النسخ الأصلية فيها طابع رعب وبلاوي سوده، أيام أول كانوا يحبون القصص المرعبة وتفاصيل لوعة الچبد والسحر والموت والأشباح، مو بس الكبار حتى الصغار كانوا يموتون على هالنوع من القصص، إذا القصة مافيها رعب راح يخزونك يقولون شالمليق هذا اللي ما عنده سالفة . مع السنين الذوق تغير والنفوس تغيرت وقاموا يضيفون ويشيلون من القصص القديمة عشان تناسب الجمهور وخاصة عيال هالايام.
عشان اعطي الموضوع حقه واقدر اقرا واكتب براحتي راح اكتب الموضوع بأجزاء، مبدئياً الظاهر راح يكونون ثلاث أجزاء بس يمكن أزيدهم على حسب الردود وتجاوب المتابعين. إذا ما عجبكم وايد راح اشوف لي سالفة ثانية، يمكن افصل بين الأجزاء بمواضيع فيديو وصور عشان اغير شوي.
المهم يالله كاهو الموضوع:
1- ذات الرداء الأحمر (بالكويت يعرفونها بإسم ليلى ذات الرداء الأحمر)
مو من أفلام ديزني بس من أشهر قصص الأطفال الموجودة، النسخة الأصلية حق القصة طلعت من أوروبا، الشرير ببعض النسخ يكون غول، وببعض النسخ رجل ذئب، بس اشتهر اكثر شي بعد كل هالسنين نسخة الذيب العادي. شحلاة السالفة كانت غول ورجل ذيب فيها أكشن زيادة، يعني مثل بدال صمونة برجر عادية 
(ذيب) تصير صمونة برجر بالجبن (رجل ذيب) 
!
بإحدى النسخ الأصلية الشرير يسبق ليلى لبيت الجدة، لما يوصل يذبح الجدة عالسريع بعدين يقطّعها ويـطـبـــخـــها 
، يلبس ملابس الجدة ويقعد، بس توصل ذات الرداء الأحمر الشرير يصب لها من “الطبخة” الحلوة اللي مسويها على مزاج وليلى تااااااااكل منهاااااااااا! إيييييييييي ليلى تااااااكللل جدتهاااااااا 
! بعدين عاد في بعض التفاصيل البايخة ماحب أذكرها بس عموما بالنهاية الذيب ياكل ليلى.
بس ياكلها وخلاص 
ماكو حطّاب ينقذها لا اهي ولا يدتها اللي بلعتها ليلى، ياكلها وبس سلام عليكم 
. وهذا حال وايد من النسخ الثانية للقصة وأشهر نسخة كتبها تشارلز بارو – Charles Perrault في القرن الثامن عشر بنفس النهاية المؤلمة.
القصة هذي كانوا يقولونها حق اليهال عشان لا يسمعون كلام الناس اللي ما يعرفونهم عشان لا يقصون عليهم. وهم عشان يحذرون الحريم من الذئاب البشرية والتعامل معاهم بحذر.
2- حورية البحر
كتبها شاعر دنماركي اسمه هانز كريستيان أندرسون – Hans Christian Andersen سنة 1837، نفسه هالكاتب مألف قصة البطة السودة وملكة الثلج وغيرها من القصص. قصة حورية البحر كتبها بالأساس حق عرض باليه مو حق كتاب بس بعدين اشتهرت.
بالقصة الأصلية لما الحورية يصير عندها ريول تروح حق الأمير وتلقاه يتزوج أميرة المملكة المجاورة، الحورية ينكسر قلبها وتقول خلاص راح اموت بسبب التعويذة انا مش عاوزه الدنيا خلاص 
، الساحرة قالت لها إذا ما تزوجتي من بشر راح تموتين بعد فجر اليوم الثاني من التحول وما تقدرين ترجعين البحر أبد ولا تموتين. قبل الفجر بشوي تشوف اخواتها الحوريات اييبون لها سكينة خذوها من الساحرة نفسها مقابل قصاصات شعرهم، قالولها عشان ما تموتين لازم تذبحين الأمير بهالسكينة وتخلين دمه يسيل على ريولچ عشان تردين حورية مثل ما كنتي وتعيشين حياتچ.
الحورية راحت وقفت على راس الأمير وبيدها السكين بس قلبها ما طاوعها تذبحه ولا تروح تقط عمرها بماي البحر وتتحول إلى رغوة أو زبَد بحر، يقولون بعدين المؤلف عدل عالقصة وقال لااااا اهي لما صارت رغوة بحر هذا بس جسمها بس روحها صارت من أرواح الهوا البشرية اللي بتروح الجنة 
يعني المهم بالأخير فنقشت وماتت خلاص، بس قاعد يسوي السالفة كشخة مو عارف شلون.
3- بياض الثلج
القصة أوروبية وترجع لروايات الأخوين جريم – Brothers Grimm. بالنسخة الأصلية الملكة تطلب من الصياد اييب كبدة ورئتين بياض الثلج عشان تتعشى فيهم 
! بس بعدين صح الصياد يشفق على بياضوه ويخليها تنحاش بس اييب كبدة ورئتين خنزير بري للملكة الشريرة. والملكة يعني صج طلبت طبخهم (وهي ما تدري) وتعشت فيهم وهي غافلة عن السالفة.
بعدين لما تدري بالموضوع من المرايا ترد تحاول تغتال بياض مرتين بس تفشل وكل مرة تكون متنكرة بشخصية مختلفة، المرة الثالثة امبله تذبحها من التفاحة المسمومة. الفرق الكبير انها ما تقوم من بوسة الأمير الوسيم (جليل الحيا مو متربي 
) مثل ما يقولون في نسخة ديزني. الأمير مر على قبرها الزجاجي في الغابة ولا ينبهر من جمالها وقرر ياخذ تابوتها البيت يحتفظ فيه (قلت لكم جليل حيا ما تصدقون)، الحرس يحاولون يشيلون التابوت ولا يختض ويسبب بحركة التفاحة وخروجها من حنجرة بياض وتقوم من النوم ويتزوجها الأمير.
أحلى شي النهاية بهالقصة هني وأحب أختم فيها الجزء الأول من الموضوع 
لما تزوجت بياض الثلج الأمير وصارت أميره قررت تعاقب زوجة أبوها الملكة الشريرة 
، عاد يابت جوتي من حديد وسخّنته عالآخر بعدين خلتها تلبسه وترقص ليما طاحت على وجهها ميتة 
في بعض النسخ يقولون ماتت من سكتة قلبية.
صراحة النسخة هذي واقعية وصج تعطيك صورة واضحة عن هوشات الحريم ولأي درجة ممكن توصل بينهم موت وجواتي حديدية من نار! 
… يتبع في الجزء الثاني قريباً
المصادر/
أليس في بلاد العجائب.. على لسان كُميل
طريقة عمل أحسن طيّارات ورقية :)
مجموعة خلفيات سطح مكتب (الجزء الثالث)
حقائق عن أكبر شركات الاستضافة
10 حركات بسيطة للبحث في قوقل
موضوعك رايق خصوصا اني من عشّاق الاخوان جريم والخرافات اللي جمعّهوها ,, حلمي اروح متحفهم في المانيا احس بنهار من قو ذكريات الطفوله خخخخ
من ناحية ختمة بعض القصص تصدق قد شفتها بكارتون بس مدري اي واحد من كثرهم خخخ , يمكن حكايات عالميه نسخة الثمانينات ! لاني اتذكر قد شفت نهاية جورية البحر
وبرضو نهاية سنوايت قد شفتها يوم قطعة التفاحه تطيح واتذكر قد حاولت تذبحها عن طريق حزام يخنقها او شي زي كذا , يعني الطريقه الثانيه
بالختام موضوع رايق جدا جدا , يحلفون ماجابني هنا الا ريحة ديزني خخخ
نننظر الجزء الثاني ياوحش
عجيييييييبه كمل كمل ناطرين باقي الاجزاء
تعرف كميل أني قريت كلام يثبت كلامك يقولون الأمير جليل الحيا الي أخذ بياض الثلج
هو نفس الأمير الي حبته الحورية وقتلت نفسها عشانه
نهاية قصة ليلى حسيت بطغم لحم مسلوق في فمي
.
.
ترى سالفة جليل الحيا مو صدق للأسف
Cinderella, The Girl Without Hands, Hansel and Gretel, Goldilocks and the Three Bears, Rumpelstiltskin, Sleeping Beauty & The Pied Piper … I’m wondering which one will b next
هذا الموضوع من احلى المواضيع الي كتبتها في المدونه
! بدون مجامله … طبعا انت تحطت على الجرح الحساس… منو منى مو من عشاق ديزني وهالافلام الرائعة ؟؟ اتوقع قليل جدا من يعارضني….. موفق وناطرين على احر من الجمر الاجزاء القادمه … خل نشوف شنو الصج ….. وحبيت تعليقك الاخير ” نهاية واقعية .. توضح هوشات الحريم ” كااااك البنات شكلهم بعصبون :P
أنا سامع معلومة عن قصة سندريلا الأصلية… بس ماني قايلها الحين إذا كان في جزء ثاني للموضوع
استمر يا كميل استمر
تشكرات كميل افندم
والله ياكميل حمستني اشاهد بياض الثلج
مع انه كان اسوء فلم عندي من افلام دزني ماحبه
يجيب لي الكئابة
ننتظر الجزء الثاني
وكالعادة أسلوب رائع جدًا ومشوق, وجميـــــــل وأهم شي مضحك, ربي يقويك كميل, وننتظر الجزء الثاني =)
nnnnnnnnnice , keep on doing what u do bro …
من احلى المواضيع في المدونة .. و اصل كميل
حركة حلوه سردك للاحداث الحقيقيه كما ذكرت ..
افضل بكثير من النهايات التقليديه
بأنتظار بقية الاجزاء
كمل كميييل .. متابعين ونبي باجي الأجزاء
عاد أنا مينونة ديزني
موضوع ممتع، وانتظر باجي الاجزاء ، انا يوميا اتابع مدونتك الرائعه
أكيد بإنتظار الأجزاء القادمة
أنا أستغربت من النهاية وقلت الظاهر مخرفين
قصة ذات الرداء الاحمر
أذكر شفتها ككرتون أول مرة يوم ينقذها الفلاح وبعدين قريتها مثل ما كتبتها
والحين عرفت ليش
يعطيك العافية عالموضوع وفضايح حقيقة القصص
وبإنتظار الاجزاء القادمة
=)
اثاريه ملعوب علينا
ننتظرك بفارغ الصبر
حلو الموضوع
جميل انهم يلطفون النهايات
الغريب هو الفلم الكرتوني ” سالي ”
في الروايه الاصليه “الاميرة الصغيرة ” النهايه انه اللي في بيت الجيران هو ابوها
وتكون النهايه سعيده يلتم الشمل هي وابوها
لكن في الكرتون اللي في بيت الجيران يصير صديق ابوها هو صح ترجع غنيه ونهايه سعيده لكن ليه موتوا ابوها !!
ههههه وايد حلوين بس الاجرام مو صج <<<<عاجبها