ليش درايش الطيارة صغيرة وشبه دائرية؟

Sep 27

ليش ما يسوونهم كباااااار عشان الناس ما يتحركون من كراسيهم لما يشوفون الطيارة تنزل ولا تطير؟

السالفة فيها سر صغير!

أدري على اساس اكتب الجزء الثاني من النهايات الأصلية لقصص الأطفال وأفلام ديزني بس قلت احط بينهم مواضيع عشان أغيّر شوي

جواب الموضوع متلخص بقصة قصيرة:

أول اسطول طيارات نفاثة تجارية تنقل الركاب كان اسمه  The de Havilland Comet على اساس انه يكون طفرة في عالم الطيران التجاري وإبداع هندسي عجيب الكل يتكلم عن روعته. شوفوا صورة الطيارة المينونة :

DH_Comet_1_BOAC_Heathrow_1953

الكل كان متفائل خير من هالطيارات لدرجة انهم صنعوا اسطول كامل بنفس التصميم وسيده دزوه يشتغل، كل هالكلام في أوائل الخمسينات.

ويا فرحة ما تمت، بس ما طارت The de Havilland DH 106 Comet بعد 20 دقيقة ولا تتفكك بالهوا وتطيح وتسبب كارثة!  انقصت ويوههم فقارى وناس ماتت (35 شخص) والدنيا قامت وصارت قيامة.

يعد المراجعة والدراسة قالوا أكيد كان خطأ من الطيار، الطيارة كاملة مكملة مافيها ولا عيب. :modest:

شوي ولا طيارة ثانية هم تتفكك وتطيح :huh: ، وشوي بعدها ولا طيارة ثالثة هم تتفكك وتطيح فوق المحيط :| وعدد الضحايا صار اكبر والناس قامت تخاف اكثر، المفروض كانت شركة طيران تجاري بس على هالحوادث محد راح يطير الكل يخاف!

المهندسين قالوا دام الطيارة تتفكك أكيد فيها عيب، يابوا مجسم طيارة مشابه وغطسوه في حوض كبير وقلدوا مراحل الضغط المتكرر اللي تمر فيها الطيارة بالارتفاعات الجوية العالية. شوي شوي انتبهوا عالمشكلة: لقوا زوايا الدرايش تتكسر عالبطيء مع مراحل تغير الضغط الجوي…

كل هذا لأن الدرايش كانت مربعة وزاياها حاده!

2708291110_b224ddb523_b

الزوايا الحادة مو مبينة بالصورة هني لأنها تكون داخل جسم الطيارة، الكسر يبدي صغير بس يزيد مع تغير الضغط ويسبّب تفكك إطار الدريشة، وكلما يتفكك شي يتفكك معاه المجسم المعدني للطيارة وبالنهاية الطيارة كلها تطيح نفس ما كان يصير.

من يومها وكل الدرايش صارت دائرية وصغيرة :( ، إذا صارت كبيرة فيها خطورة على المجسم الكلي للطيارة، مو بس الدرايش، حتى باب الطيارة تلاحظونه الزوايا دائرية متقوسة للسبب نفسه.

لي هني خلص الموضوع بس اللي يبي شرح تفصيلي حق السبب خل يقرا هالفقرة:

كلما تصعد الطيارة بالسما فوق كلما يقل الضغط الجوي (الهوا والاكسجين يصير أقل) عاد الطيارة تقوم تعوّض النقص بسحب الهوا من الخارج وضخه داخل الطيارة عشان يصير الوضع طبيعي للبشر والكل يقدر يتنفس اكسجين كافي. النتيجة يطلع معاك داخل الطيارة الهوا أكثر من خارجها، والطيارة مثل بالونة تبي “تنبط”، لو كان في هوا خارجي بنسبة عالية كان يضغط على جسم الطيارة الخارجي ويخليها تتماسك (بالكتب يقولون يعادل الضغط)، بس الهوا الخارجي ضعيف ما فيه حيل كافي لهالغرض عاد “تنبط” أو تتفكك الطيارة بأضعف نقطة اللي هي كانت زوايا الدرايش المربعة، أيضاً لنفس السبب ما يخلون الدرايش كبيرة لأن المساحة الكبيرة للزجاج ما تتحمل الضغط العالي وتنكسر.

المرة الياية إذا ركبت الطيارة مع واحد ما يتابع مدونتي قولوا له السالفة تفلسفوا على راسه خل تقزر :blehbleh:

بس بعدين قولوا له خل يدش مدونتي  :|

المصادر/

Wikipedia

Life Engineering

Answers.com

, , ,   | 

15 Responses to “ليش درايش الطيارة صغيرة وشبه دائرية؟”

  1. مشكور على المواضيع الفيدة…

  2. nice story bs 5ar3tni :P

  3. ههههه ان شاء الله راح اسوي دعاية حق المدونة

    الموضوع خطير اشكرك على هذا الجهد الرائع

  4. شكراً كميل
    موضوع رائع ومعلومة جديدة
    مبدع كعادتك
    تحياتي :)

  5. ولا مره فكرت ليش
    خوش موضوع كّميل مشكور على المعلومه

  6. روعة وماشاء الله ع الموضوع المفيد
    إلى الامام دائما

  7. كميل ……… بصراحه اهنيك على المدونه والمواضيع اللي دائما تكون مميزه وممتازه

    صار لي اكثر من سته سته شهور وانا اتابع مدونتك وكلش كلش عجبتني واجد

  8. ماشاء الله ماهي غريبه عليك هالمواضيع و دائما تتحفنا بالجديد و المفيد

    سؤال صفير بس ماعليك امر

    ليس درايش كبينه الكابتن مو دائريه
    بل بالعكس اكبر و زواياها حاده

    الف شكر لك

    • ، كابينة الطيار حجمها اصغر وعدد اللي فيها اقل بوايد من المقطورة الرئيسية

      الضغط في كابينة الطيار الظاااااهرررر والله اعلم اقل من جهة الركاب، من جذي نشوف الكابينه معزوله بباب محكم ومايتركونها مفتوحه لفترة طويلة بالاضافه لاسباب امنية.

      اللي عنده تصحيح خل يقول لان كلامي عايم قلته من ملاحظه بحته مو عن خبره

  9. امممم معلومة ممتازة جدًا’, وشي ما يخطر بالبال

  10. من جد كميل من زمان ما نشوف مثل هل المواضيع الحلوه
    ^_^

  11. بسالك اخ كميل ابغا ترشح لي اسماء احلى كتب قريتها منوع مو مجال واحد لان نوعيت مواضيعك نفس الي احب اقرى فيها بس موبالانجلش

  12. طبعا راح اتفلسف ع راسه
    والاكيد راح اقوله عن مدونتك
    ؛)

  13. روعه المعلمومه اشكرك..على طرحك مع اسلوب خفيف دم.ماشاءالله عليك..موفق دايم

Leave a Reply

 
%d bloggers like this: