من أحلى اللحظات في حياة ستيف جوبز

Oct 06

ستيف جوبز عطاكم عمره ومات حاله حال البشر، انا ما احب احط صور تضيّق الخلق واذكر سيرة حياته وهالسوالف. قلت احط فيديو يبين فيه واهو متشقق من الوناسة مع كلمتين من عندي.

في 24 يناير سنة 1984 عقدوا اجتماع المساهمين السنوي لشركة أبل تكلم فيه ستيف جوبز وقدّم للحضور اللي وصل عدده تقريباً 3 آلاف شخص أول جهاز ماكنتوش شخصي فيه واجهة مستخدم رسومية – Graphical User Interface ، هالجهاز اللي صار بعدين أول جهاز كمبيوتر ناجح تجارياً.

آندي هرتزفيلد – Andy Hertzfeld كان أحد أول المبرمجين في شركة أبل وكان متواجد في المؤتمر، قال وهو يوصف ستيف جوبز لما استعرض الجهاز (ترجمتي العامية):

“صارت لويه وخبصه علما خلص استعراض الجهاز، شفت ستيف وعلى ويهه ابتسامه أكبر من أي ابتسامه شفتها عليه من قبل، كان مبين حابس دموعه ما يبي يبچي وهو متأثر من اللحظة، التصفيق استمر خمس دقايق علما هدّاهم ستيف”.

نص الكلام بالانجليزي:

“Pandemonium reigns as the demo completes. Steve has the biggest smile I’ve ever seen on his face, obviously holding back tears as he is overwhelmed by the moment. The ovation continues for at least five minutes before he quiets the crowd down.”

اللي يقرا عن ستيف جوبز راح يستوعب شكثر كانت هاللحظات وااااايددد كبيرة بالنسبة له، تقدر تقول أحد اللحظات اللي انولد فيها ستيف جوبز بعقليته اللي غيّرت عالم الكمبيوتر، بهاللحظة ستيف جوبز حس العالم اعترف فيه انه موجود، حس انهم يقولون له عطنا اللي عندك يمعود شحلاة شغلك. 

مادري عنكم بس بالنسبة لي جهاز الآيفون الأخير كان مبين عليه بشكل واضح غياب بصمة ستيف، بالكويتي نقول: “البوم من غير نوخذه يطبع” يعني السفينة من غير قائد تروح وطي! عاد خل نشوف إذا أبل قدروا يحصلون واحد مثل النوخذه جوبز يسد مكانه. 

12 Responses to “من أحلى اللحظات في حياة ستيف جوبز”

  1. وإن لقوا “نوخذة” يحل مكانه, لكن يبقى لـكل شخص بصمته المميزة والفارقة عن أي أحد !

    نرجو من الله تعالى له الرحمة !

  2. ماراح ياخذ احد مكانه الا اذا كان بنفس شغفه وهمته وهذا نادر…

  3. الملقوفة المحترمة Reply October 7, 2011 at 8:32 am

    مادري ليش تآثرت بوفاته خصوصاً اني قاعدة اكتب من الايفون والمشكلة اني كنت اعرف اسمه بس وتجربته بوفاته فهمت شخصيته
    الله يرحمـه ٣ تفاحات غيرت العالم ادم،نيوتن،ابل

  4. الحياة تجارب Reply October 7, 2011 at 1:13 pm

    هل راح ينكتب نفس هالكلام عن بيل غيتس مع العلم ان غيتس كان اكثر سخأ وتبرعا من جوبس وهل راح يطلب له ” الرحمة ” مثل جوبس

    • هذي من الإشاعات المنتشرة ان ستيف جوبز ما يتبرع، ستيف جوبز معروف عنه ما يحب يحط اسمه على مشاريعه واعماله الخيرية والمقربين منه في مقابلات شخصية قالوا هالشي انه نشيط من هالناحية بس يمنع بشدة انه يذكرون اسمه

      بيل غيتس مو فارقه معاه ومو مهتم للموضوع

  5. ليش تغير شكل المدونة كبيررر مرة حجم الصفحه واللون باهت مرة موحلوووووو رجعه مثل قبل بلييزززز

    • وفجاءه رجع مثل ماكان شكل المدونة شكل الخلل من جهازي فشلة سويت مناحه ع الفاضي ههههه

  6. a great man an innovator

  7. يا لك من مبدع يا كميل
    لقد انني شفت مدونتك بالبحث عن موضوع عن تجربه للايباد
    وفجأةُ
    جلست اقرأ المواضيع الجميلهُ
    لم اقرأها كلها لاني عندي دواام غدا
    يمكن عندما اكملها اغير رأي فيك
    لذلك استمتع بالمديح هذا الى انا اكمل باقي المواضيع

  8. لن تغير رأيك يا سامر =)

    فكل ما هنا ينضح جمالاً

  9. all i have to say thank u steve <3

  10. هي انتو لاتترحمو على واحد مو مسلم

Leave a Reply

 
%d bloggers like this: