شنو هي الشامة؟ شنو صاير تحت الجلد عشان تصير شامة؟
General+
26. Nov, 2011 @ 1:11 am
11 Comments
وعادي تطلع لك شامة (أو حبة خال) يديدة ولا مو زين؟
من چم يوم كنت اغسل أسناني قبل النوم، عشان مثل ما يقولون “اغسل اسنانك تحميها، نظّفها تصبح بيضااااع 
“. وشخصياً لما اغسل اسناني أعفّس ويهي بالمرايا واقعد اسوي وجوه يعني وحش معصب يقاوم تنظيف الأسنان 
. المهم وانا قاعد أمثّل ولا انتبه على شامة صغيرونه على جبهتي ما كنت شايفها من قبل،،،
خزيتها شوي علما تأكدت انها ما كانت موجودة قبل، وصج ما كانت موجوده 
، أنا كل يوم أسوي حركة الوحش بالمرايا وما عمري شفتها تباً لها 
، بس بعدين قلت يالله ما عليه عالأقل فيها موضوع.
توضيح مهم: أنا مو طبيب ولا متخصص، بس حبيت اطرح هالموضوع عشان ابيّن بعض الخطوط العريضة منقوله من موقع رسمي لنشر التوعية الصحية، والأحسن دايما وأبداً مراجعة الطبيب لأي مشكلة صحية كبيرة كانت أو صغيرة.
شنو هي الشامة؟
تحت بشرتك الحلوه اكو خلايا تعطي جلدك اللون اللي تشوفه عليك – Pigment Cells واسمها بالتحديد melanocytes، مرات تتجمع هذي الخلايا في مكان واحد ويزيد تركيزها تحت جلدك، وطبعاً لما يتركز أي لون يصير أغمج، وهكذا تصبح الشامة شامة.
وليش عاد تتركز وتصير الشامة؟ شنو السبب؟
أغلب الشامات تتكون بعد الولادة وخلال مراحل الطفولة والعشرينيات من الخصر وطالع، وماكو شي محدد يسبب تكوينهم إلا يمكن التعرض للشمس، الأجزاء الظاهرة من جسمك واللي تتعرض للشمس تطلع فيها شامات أكثر من الأجزاء الثانية.
أغلب البالغين عندهم بين 10 إلى 40 شامة عادية، يعني لا تستغرب اذا لقيت لك شامة يديدة على جسمك، بس عاد انتبه عليهم.
شنو يعني “شامة عادية”؟ وشلون يعني انتبه عليهم؟
الشامة العادية يعني اللي ما يزيد عرضها عن راس مساحة قلم رصاص (5 ملم)، إذا كانت أكبر من چذي تصير.. شامة مو عادية 
هني مثال لبعض الشامات العادية حق اللي ما تلوع چبده.
الشامات العادية مــــــمممممممككككنننننننن في حالات نادرة تتطور إلى نوع من سرطان الجلد أعاذنا الله واياكم منه ومن كل مرض، ويقولون اللي عنده أكثر من 50 شامة عادية يكون معرض لهالخطر أكثر من غيره.
زين يعني شلون انتبه عليهم؟
- انتبه إذا تغير لون شامة.
- إذا كبرت أو صغرت بشكل غريب غير متناسق.
- إذا تغير شكل، ارتفاع، نسيج الشامة.
- إذا تصلّبت وصارت قاسية.
- إذا قامت تحكك بصورة ملحوظة.
- إذا شفتها تنزف أو تفرز شي غريب.
- إذا قمت تسمع الشامة تسولف معاك …
أتقشمر أتقشمر 
وشلون على الشامة المو عادية؟
يكون حجمها أكبر من الـ 5 ملم وحدودها غير متناسقة واللون متغير، اللي ما تلوع چبده من الصور يقدر يضغط هني ويشوف أمثله.
هالشامات حالها من حال الشامات العادية بس نادر حيل انها تتطور إلى نوع من سرطان الجلد، ويقولون اللي عنده أكثر من 5 شامات غير عادية شوي وضعه أخطر من غيره ولازم ينتبه على روحه.
عيل خل اروح طبيب يشيل الشامات كلها وأفك عمري مو أحسن؟
لا ماله علاقة، المشكلة مو من الشامة نفسها، الشامة تقدر تعتبرها مجرد دليل ظاهري لمشكلة داخلية، حتى لو تشيل الشامة المشكلة الداخلية راح تظل وما تنشال. لما يصير في مشكلة مع الشامة نفسها الدكاترة يشيلونها بدون تردد بس ما ينصحون بإزالة الباجي.
شلون أعرف شكل الشامة المتورمة أو الخطره؟
تكون شبيهة للأمثلة على هالرابط، مابي أعرض الصورة أدري في ناس أحاسيسها مرهفة ما تتحمل 
المصادر/
ليش أول كلام اليهال "ماما" و "بابا"؟
الإيميل المشهور بصور لبوابة الجحيم، صج ولا شغل جمبزه؟
فيديو تصوير بطيء لسنجاب صغيرون
طريقة حل مكعب الألوان بخمس خطوات فقط
يوم تغمض عينك وتحكها تشوف مثل ليتات، ليش؟
معلومات مفيدة
وكالمعتاد طريقة الطرح وتوصيل المعلومة رائعة
يعطيك العافية على الجهد
ونتريا كل يديدك
كلام سليم و ١٠٠٪ علي حسب اخر الابحاث اللي قريتها
طريقه توصيلك للمعلومه جدا جميله .. اهنيك
وانا من المتابعين الدائمين لمدونتك ، حتي في اوقات فراغي بالمستشفي
بدون مبالغه .. انت المدون العربي الوحيد اللي يستحق المتابعه
لك مني كل الشكر والتقدير
علي – المملكه العربيه السعوديه
مشكور دكتور والله استانست من تعليقك
اول مره اعرف سبب تكون الشامه مشكور
ماخذينها في الأحياء
تشكرات كميل افندم
دير بالك على شامتك و غمازتك
;D
ham ana e6la3atli shama yedeeda eb edi gabel cham shahar makant mawjooda kellesh o e9ara7a maknt 3arfa a9ln shlon tetkawan eshama!
mshkoora 3al m3loma
جنها مهياوة طايحه عالجلد !! ههه
السلام عليكم
في معلومة كلها اسمعها من امي و اختي
الشامة تطلع اذا المرة توحمت على شي و يابوا لها !!!!!!
مادري في احد سمعها غيري
معلومات مفيدة جدا
غاية فى الروعة .. جزاك الله كل خير
ليش يقولون اللي يعد النجوم تطلعله شامة مجرّبت أخاف تطلعلي