ليش لما نقطع بصل العيون تدمع؟

Jan 24

البصل من نعم الله سبحانه علينا في الأكل، صج انه بو ريحة بس لذيذ بالأكل!

الغريب انه حده دراما لما نقطعه العيون تبچي عليه غصب. حق شحقه؟

الإجابة باختصار: بسبب مجموعة من تفاعلات كيميائية بين مركبات كبريتية موجودة في البصل تختلط مع الاكسجين في الهوا وتأثر على العين.

شنو يعني هالكلام الخربوطي ما فهمت شي؟

ما عليه هالموضوع شوي فيه كيميا، حاولت ابسّط الشرح كثر ما اقدر

يعني لما ينمو البصل في الأرض يمتص الكبريت من التربة ويتكون داخله من هالكبريت شغلات كيميائية (بالتحديد يسمونها جزيئات أمينية متطايرة من السلفوكسيد)، السلفوكسيد هذا هو مفتاح مسلسل الدراما البصلية والدموع.

لما نقطع البصل الخلايا داخله تتفكك ويسيح محتواها وتختلط ببعضها البعض مع أنزيمات بصلية كانت معزوله وتصير خلطه كبريتية مركّزه،

علمياً يقولون: أحماض السلفوكسيد الأمينية + الأنزيمات البصلية = أوكسيد بروبان (Syn-propanethial-S-oxide)

العملية أو الخلطه هذي يبيلها تقريباً 30 ثانية علما تستوي، من جذي نشوف العين ما تدمع مباشرة لما نقطع البصل.

أوكسيد البروبان متطاير يصعد بالهوا ويشوت عيونك عشان تدمّع .

شلون يشوت عيوني يعني؟

العيون فيها مثل حماية Firewall من المؤثرات الكيميائية والفيزيائية، والحماية هذي تشتغل عن طريق ألياف حسية متصلة بأعصاب تخلي العين تتصرف من روحها أوتوماتيكياً (لا إرادياً) حسب الظروف.

لما يوصل أوكسيد البروبان للألياف الحسية تعتفس وتقول يييييووووو  لا يحوشك شنو هالغاز هذا شكله مو شي يأذي العين! عاد تدز مسج حق المخ تقوله الحقنا يمعود يايتنا عاصفه تحرق العين ، المخ يرد الايميل على الغدد الدمعية بالعين يقول لها غسلي الحوش (العيون) بسرعه!   والغدد الدمعية تدق سلف وتغسل عيونك بالدموع علما تتأكد ان تأثير أوكسيد البروبان انعدم وتدريجياً ترجع الغدد الدمعية لحالتها الطبيعية.

شلون امنع العيون من الدمع لما اقطع البصل؟

أحلى حل بالنسبة لي انك تلبس نظارات الغطس، عينك تكون معزولة من أي مؤثر خارجي وشكلك يكون حده ستاااايل لابس هالنظارات وتقطع بصل.

الحلول المليقه الثانية:

* قطّع البصل تحت الحنفية عشان المواد الكبريتية تنغسل وتروح قبل لا تختلط ببعضها البعض وتتفاعل، إذا عندك وايد بصل للتقطيع وما تبي تخسر ماي قطعه في طشت ماي والمواد الكبريتية هم تضيع بالماي بس يمكن إذا تقطع وايد بعد فترة يزيد تركيزها بالطشت وتحس بالتفاعل يزداد تدريجياً.

* شغل مروحة صغيره يم البصل عشان تدفع المواد الكبريتية المتطايره عن وجهك وتروح بعيد.

* حركة تسخين أو تبريد البصل قبل تقطيعه يقولون تأثيرها مو مضمون 100% بس احسن من ولا شي لأنه يعطل من نشاط الأنزيمات البصلية واختلاطها عند القطع.

يقولك اللي يتعود على تقطيع البصل ويتحمل الدموع مع الوقت خلاص الأعصاب الحسية عنده في العين تتعود على هالغاز وما تحسبه خطر عالعين وتالي ما تدمّع .

حل عملي آخر

وليش ما حسبت مضغ العلكه أحد الحلول مثل ما نقرا بالايميلات والأنترنت؟

لأنها إشاعة وما تشتغل ، اذا قريت سبب الدموع وفهمته عدل راح تستوعب ان العلك ماله دخل بالموضوع كلش، وهم سالفة استخدام سكينة حادة أو قطع راس البصله. يمكن سالفة العلك انتشرت كطريقة عشان الواحد يتنفس من حلجه ورطوبه الفم تسحب نسبة من أوكسيد البروبان للفم قبل لايوصل العين، بس طبعاً في نسبة من المادة راح توصل للعين عاجلاً أم آجلاً وتحس بالأثر من جذي الحل مو عملي.

انا أحب تقطيع البصل، كلما امل او يضيق خلقي اروح اقطع لي شوية بصل ، بس متأذي من الريحة تلزق بالايد شسوي عشان اوخرها؟

أحسن شي طبيعي عشان توخّر ريحة البصل من ايدك امسحها بقطعة ليمون :) أو راجع هالموضوع كتبته قبل عن إزالة ريحة الأكل والطباخ من الايد.

وسلامتكم

المصادر/

HowStuffWorks

eHow

Discovery

, ,   | 

8 Responses to “ليش لما نقطع بصل العيون تدمع؟”

  1. اماا حق شحقة يالقذافي ههههههه
    موضوع البصل ينرفز لكن كل الحلول مجربتها على الطل مااكو فايدة
    احسن شيء المكينة اللي تقطع البصل شرايح وناعم وخشن بحيث الروايح تكون محجوزة داخل وماتوصل لعينك ..
    خووش موضوع كميل ^_^

  2. لا طلع سالفة العلج چذب اشوا اني ما جربتها

    يعطيك العافية كميل

  3. اهم شي المخ ماخذ راحته ويقرا جريدة ويقول غسلي الحوش مت ضحك ههههههههههههههههههه

  4. هههههههههههه .. جميل جدًا وخفيف دم الموضوع

    أنا في الأوقات اللي أقطع بصل –>> نادرًا

    وأشوف في البداية ما تحرني عيوني, أقول خلاص معناها ما بصيح, وأشوي ما أشوف إلا الدموع تكب أربع أربع … أثاري السالفة هالشكل !!

    يـعافيك ربي

  5. لا اله الا الله

    شكراااااااااااا

    جزاك الله خيرا

  6. لول عاد اليوم اقول حق المره اكلي علج
    لوول طلعت اشاعه احم احم

  7. حط ملح بيدينك وافركه لمده دقيقتين او 3 بتروح رويحه البصل منها : )

  8. تسلم كتير على الموضوع.. المعلومات جداً مفيدة
    واحب اقول ان لتلك الدموع التى يسببها البصل عند التقطيع فوائد عظمى وهى تغسل في طريقها قبل خروجها من العين جميع المواد غير الضرورية و الزائدة في الجسم … وتختلف عن الدموع الطبيعية التي تتسبب عن الحزن فتقوم بتخليص الجسم من المواد الكيميائية الضارة التي تفرز نتيجة الحزن و القلق و الاضطرابات

Leave a Reply

 
%d bloggers like this: