ليش صور الآيفون بالدعايات دايما تكون الساعة فيها 9:42؟

Feb 04

وليش برنامج الخرايط نشوف عليه رقم 280؟ وبعض الأسرار بأيقونات نظام أبل.

السالفة هذي وايد تشبه موضوع ليش الساعات في الدعايات يكون التوقيت فيها 10:10 أو أقل أو أكثر بدقيقة.

أول شي أعرض صور مختلفة للآيفون في الدعايات:

942-on-the-lock-screen-in-this-television-commercial

different-commercial-same-time

one-more-print-example

a-cute-baby-at-942-am

talk-about-attention-to-detail

حتى في الصور اللي فيها شرح مفصل بس شوي الساعة مو واضحة:

942-am-even-carries-over-to-the-print-world

هني مادري ليش نقصوا دقيقة!

whats-this-941

السبب باختصار على لسان مدير سابق في شركة أبل اسمه بوب بورشر – Bob Borcher قال:

“إذا تشوف دعاية حق أبل، مطبوعة أو تلفزيونية، وتطالع الوقت راح يكون دايما 9:42 – 9:42 هو التوقيت اللي تم فيه إطلاق جهاز الآيفون.”

“If you ever see an Apple ad, print or TV, you look at the time and it’s always going to be 9:42 — 9:42 is when we launched the iPhone.”

طبعا هالكلام على أغلب الدعايات بس بعضها وخاصة الأخيرة يمكن قاموا يطلعون من هالحركة، مثل هالصورة ومبين الدعاية حق جهاز iPhone 4s والتوقيت 11:29:

we-assume-this-says-1129-pm-because-its-the-santa-claus-ad-from-the-holiday-season-santa-delivers-gifts-in-the-middle-of-the-night

يقولون احتمال السبب لأن الدعاية كانت في فترة الكريسمس ويعني سانتا كلوز يوصّل الهدايا نص الليل، مادري انا شخصياً ما اقتنعت.

هذي بس حركة من حركات شركة أبل وفي غيرها وايد وخاصة بالأيقونات اللي يستخدمونها بنظامهم الخاص:

1- برنامج الخرايط – Maps

map-iconالخريطة هذي تبين مكان مقر شركة أبل في كوبرتينو، كاليفورنيا، العنوان هو:

1 Infinite Loop
Cupertino, California 95014

وتقدرون تشوفونه بالضبط نفسه في خرايط قوقل طلعته على هالرابط.

Infinite Loop يعني دائرة أو حلقة لا نهائية وهم يرمز حق حركة برمجية اللي عنده خلفية بلغات البرمجة يستوعب المعنى. والدبوس الأحمر طايح على البوابة الرئيسية للشركة.

الكسلان اللي ماله خلق يدش موقع خرايط قوقل صوّرت له المكان هني:

2012-02-04_172150

2- النظارات في برنامج iBooks:

iBooks-browse

بكل بساطة مسوينها على نظارات ستيف جوبز اللي دايما يلبسها يقولون كان يحب يقرا .

3- أيقونة المغني في برنامج الآيبود:

ipod-artists1

مسوينها على ظل المغني Bono في فرقة U2، من صورة مشهورة كانوا يطبعونها في دعايات آيبود خاص حق الفرقة وعليه توقيع المغنين فيها، أذكر كانوا يبيعونه أول ما نزلوا الآيبود بالأسواق.

iPod-bono-apple-ad-cropped

4- أيقونة الرادار في برنامج Find My iPhone:

findmyiphoneicon

إذا تركز عدل الخريطة تبين الآيفون مكانه في نيويورك، مو كوبرتينو كاليفورنيا نفس الخريطة اللي ببرنامج الخرايط.

يقولووووون احتمال إشارة إلى مكان شقة حق ستيف جويز في مبنى سان ريمو – San Remo المشهور بس بعدين باعها بـ15 مليون دولار على المغني بونو اللي صورته بأيقونة الآيبود فوق.

مادري أحس هني ما عندهم سالفة والناس تبي تلزق المعنى غصب.

5- برنامج الملاحظات Textedit في نظام أبل:

textediticon

في شي مكتوب عالورقة (إضغط عالصورة عشان تقرا الكلام) وهو مقطع من كلمة بدعاية أبل المشهورة Apple’s Crazy Ones اللي انتشرت آخر فترة لما مات ستيف جوبز طلعت نسخة من الدعاية بصوت ستيف جوبز نفسه:

التوقيع بإسم John Appleseed وهو الاسم الوهمي اللي دايما يستخدمونه بدعايات وبرامج أبل حق برنامج جهات الاتصال ودفتر العناوين بأجهزتهم. الرسالة مكتوبه إلى كيت – Kate والظاهر هم من الأسامي الوهمية اللي دايما يستخدمونها في جهات الاتصال Kate Bell. يمكن قصدهم الأسامي الوهمية عندهم يراسلون بعض 

6- برنامج كتاب الخطوط – Font Book:

fontbookicon

الأحرف AFK بالأنترنت مشهور استخدامها اختصار حق Away From Keyboard في برامج الشات وتوضيح حالة المتصل.

7- برنامج iCal في نظام أبل:

App

إذا كانت الأيقونة محطوطه في شريط البرامج تحت الشاشة راح يبين تاريخ اليوم، بس إذا كان في مجلد برامج راح يطلع التاريخ 17/7 يرمز حق اليوم اللي قدم فيه ستيف جوبز البرنامج للجمهور في Macworld Expo سنة 2002 .

8- برنامج البريد – Mac Mail:

mailicon

لما تطالع الأيقونه بحجمها الكبير مبين على ختم البريد مكتوب Hello From Cuertino, CA يعني حركة كأن البريد عن طريقهم.

9- أيقونة برنامج Aperture في نظام أبل:

aperture

الصورة الأصلية بعد التكبير تقدر تلاحظ كاتبين Designed by Apple in California والعدسة يعني 50mm 1:1.4 مادري شنو يعني صراحة بس الظاهر يعكس قوة العدسة.

كلمة أخيرة

هذيل بس الأمثلة اللي عجبتني من بين الأيقونات اللي شفتها بالمصدر تحت، بعضهم أدري سالفتهم عادية مثل آخر أيقونتين بس هم حطيتهم عشان أبيّن حتى لو ما تكون الحركة قوية أو ما يكون لها معنى عميق بس شركة أبل تهتم بالتفاصيل لأبعد حد وخاصة بالواجهة والتصميم، حتى لو ما يكون شي ينتبه له المستخدم العادي. هالأمور الصغيرة تحط مقياس حق الشركة نفسها، المرة الياية لما يصممون أيقونة راح يفكرون حلو يحطون حركة سرية مثل كل مرة، حلو يحطون شغلة حتى لو ما يفهمها إلا المصممين اللي بالشركة أو بينهم بين بعض، يعني تعطي دافع انهم يهتمون بهالتفاصيل بأي مشروع بالمستقبل.

هالحركة تحبّب الشركة والموظفين بشغلهم وتكوّن رابط بين صاحب العمل واللي يسويه، من جذي تميّزت شركة أبل بثقافتها وجمهورها لأنهم يعطون هالنوع من الرابط اللي ما تحصله بالشركات الثانية، نفس الشي قاله ستيف جوبز لما دخل بيل غيتس مبنى شركة أبل بعد ما اشتهرت عشان يشتغل معاهم ببعض المشاريع، واحد من الموظفين سأل ستيف ما تخاف يبوق شغلنا؟ قال له ما معناه شغلنا بروحه ما ينفعه إذا ما عنده روح أو ثقافة أو بيئة أبل نفسها.

اللي يحب يعرف أكثر عن شركة أبل وشلون طلعت وحتى مايكروسوفت أنصحه يطالع فيلم Pirates of Silicon Valley وايد حلو هالفيلم ويعطي صورة واضحة وكافية عن حياة ستيف جوبز وبيل غيتس وشلون طلعوا بالواجهة. الفيلم قديم شوي من سنة 1999 بس حده عجيب وما بتستملق التصوير والتمثيل، حصّلته بيوتيوب بس مابي أحطه بالموضوع لأسباب خاصة اللي يبي خل يدش يدوره بروحه.

المصادر/

BusinessInsider

ElectricPig

,   | 

8 Responses to “ليش صور الآيفون بالدعايات دايما تكون الساعة فيها 9:42؟”

  1. الله يعطيك العافية … معلومات وايد حلوه … مشكور

  2. الله على دقة التفاصيل ..

    شكرا يا غالى

  3. طيب في برنامج الطقس في الآيفون
    تكون في شعار البرنامج درجة الحرارة 23 درجة
    ؟؟؟؟

    يعطيك العافية

  4. وايد الموضوع حلو بس تحس أنه بعد استقالة ستيف جوبز الشركة كل مالها بالنازل … يعني مو مثل الأول

  5. الله يعطيك العافيه عزيزي معلومات جميله
    لك كل الشكر و التقدير

  6. 1:1.4 means how much light can the lens absorb. the human eye has a maximum of 1.o that called aperture.
    you should search about aperture

Trackbacks/Pingbacks

  1. ليش صور الآيفون بالدعايات دايما تكون الساعة فيها 9:42؟ - February 4, 2012

    [...] هذا المقال أستخلص من مدونة Kumail+ ، ومن هنا يمكنك الإطلاع على المقال [...]

Leave a Reply

 
%d bloggers like this: