كُميل في زيارة لمقر ستاربكس الكويت

Mar 23

وصلتني دعوة من شركة الشايع لاستضافة المدونين في مقر ستاربكس. كان مبين الاستضافة فيها أشياء أكشن مختلفة عن استضافات المطاعم والزيارات الدعائية العادية اللي تعودت اشوفها، عاد شلت قشّي وقلت اروح اشوف شالسالفة.

آخر فترة قامت توصلني دعوات مطاعم ومحلات وللأمانة استثقل اروح لأنها كلش مو طريقتي بالتدوين، هالمرة بالدعوة هذي فهمت ان فيها جلسة تذوق قهوة وبعض الأمور الميدانية اللي تشجعت منها للزيارة، قلت بالمرة أغيّر جو شوي مع ضغط الدوام ما لحقت اكتب موضوع من فترة. للأمانة اقولها صج انصدمت لأي درجة عندهم اهتمام ودقة بالتفاصيل اللي قدرت استوعب منها ليش ستاربكس صار ستاربكس المشهور عالمياً بين كل محلات القهوة.

لما دشينا مقر الشركة مرينا على صالات المحلات المشهورة اللي تحت اسم الشايع (مذركير، دين أند ديلوكا، بودي شوب، نيكست..الخ)، كانوا مقسمين البارتشنز على حسب المحلات، بغيت اصور بس الشباب كانوا يمشون بسرعة ما لحقت وافتشلت اوقف مو متعود على هالسوالف.

علما وصلنا مكاتب ستاربكس ودخلنا قاعة ولا داخلها نسخة من محلات ستاربكس نفسها، يعني داخل المكاتب مسوين لهم محل ستاربكس. بعدين درينا ان هذي قاعة اجتماعاتهم مسوينها بنفس طريقة المحل عشان يعيشون اجواء المحل أثناء الاجتماعات وتكون القرارات بنفس إحساس الزبون النهائي وموازية لجو المحل (شرايكم فيني وانا اقول موازيه :) )

هذي صورة القاعة – الصورة منقولة من مدونة الدروازة أنا ما صوّرت كنت مفتشل :

قعدت بين أصحاب مدونة الدروازة الحبايب وصاحبنا مبارك اسماعيل الوحيد اللي كنت اعرفه هناك من قبل وقزّرتها سوالف علما تكلم ماثيو هولغيت نائب الرئيس لستاربكس الشرق الأوسط وقعد يشرح شلون في آخر استضافة سووها حق المدونين حصلوا على 370 ألف مشاهدة مادري زيارة (مادري شنو قصده الزيارات على وين كانت بس المهم يعني استضافة المدونين كانت مفيده حقهم حيل) ويتمنى من هالاستضافة تكون بنفس الصدى أو أكثر – قعدت افكر صج الدعايات الحين صايره عن طريق المدونات وايد اصرف لهم من الجرايد والمجلات والتلفزيون  شيطونين!

بعدها قال ان هذي القاعة يجتمعون فيها دايما وبكل اجتماع يسوون جلسة تذوق، يمررون على الحضور أكواب صغيرة من القهوة وكل واحد لازم يجرب ويقول هالقهوة شنو نوعها عشان يتمرّسون بالمجال ويكون عندهم خبرة.

مرروا علينا نوع قهوة يديد اسمه فيريندا ويتميز انه خفيف مقارنة بباجي الأنواع مو مركّز وايد. وشرح لنا ماثيو شلون يتذوقون القهوة على طريقتهم الاحترافية:

يقول قبل لا تتذوق القهوة لازم تشم ريحتها عدل، تغطي طرف الكوب براحة ايدك وتشم عن قرب بنفس عميـــــق حيل عشان تتشبع الرئتين من الريحة، بهالطريقة – باجي الصور في الموضوع منقولين من مدونة مبارك اسماعيل:

تالي تتذوق باللسان بس مو تشربها عالماشي كالعادة، لا يقول عشان القهوة تتوزع بحلجك وتتذوقها عدل بلسانك لازم تشفطها كأنك تبي تصفّر بس بدال ما تنفخ بره اشفط الهوا لي داخل – يعني سوي روحك تبي تصفّر بس بدال لا تنفخ اشفط الهوا. حاولت اجرب بس ما حسيت بفرق صراحة الموضوع يبيله ممارسة شوي وما تلاحظ النتايج من أول مرة  حتى اهم قالوا لي الحين بعد سنوات من التجربة مو دايماً ينقشون نوع القهوة ويغلطون فيها مرات.

بعدين رحنا قاعة ثانية عشان نشوف شرح النكهات وانواعها، قام أحد الموظفين -أعتقد اسمه فيصل مرعي- وبدا معانه بتجربة سريعة، كل واحد خذا حبة حلوى وقال لازم نتذوقها وخشومنا مسدودة ما نتنفس إلا من الفم، كلينا حبة وحده بعدين عدناها بس هالمرة طبيعي وحسينا بالفرق، عاد قال الفرق بين المرتين ان اول مرة ما حسيتوا بالطعم كلش والثانية كانت واضحة النكهة، وبيّن شلون 80% من النكهة والطعم يتدخل فيه حاسة الشم قبل التذوق. طبعاً تشققت لاني تكلمت عن هالشغلة من قبل في مواضيعي بالمدونة  (موضوع ليش لما ننتشل ما نحس بطعم الأكل وموضوع سبب حب الناس أكل المطاعم أكثر من البيت).

بعدين شرح لنا شلون أشجار القهوة وحبوبها تاخذ طعمها من المناطق المحيطة، يعني إذا كانت بين مزارع فواكه راح تاخذ من ريحتها ونكتهتها، إذا كانت عند مزارع البهارات هم تاخذ منها..الخ. عاد يقول القهوة عندهم في ستاربكس ثلاث أنواع بناءاً على منطقة زراعة القهوة:

Africa Arabia: يقولون نكهتها غنية مثل الفواكه والأزهار والحوامض وشوي تُعتبر خفيفة مقارنة بالباجين.

Asia Pacific: نكهتها قوية جداً ومركزة تطلع من أراضي تربتها بركانية تعكس البهارات والتوابل. تنفع حق المدخنين اللي حلمات التذوق عندهم شوي ضعيفة ما تصيد الطعم بسرعة بسبب التعود على النيكوتين.

Latin America: متوازنة وقريبة من نكهة المكسرات والكاراميل والسكر.

كل نوع من هالانواع ينفع له شي مختلف من الأكل عشان يتطابق مع نكهة القهوة وتحس بالطعم المثالي. عاد قالوا لنا انهم دارسين النكهة لدرجة ان الزبون لما يطلب قهوة معينة الكاشير من روحه يعرض عليه نوع من الأكل في المنيو عندهم مطابق لنكهة القهوة – وانا أول عبالي بس يبون يسوون دعاية ويبوقون فلوسنا لول . بنفس الوقت قالوا انهم يحبون لما يطقمون بين الأكل والقهوة يعطون الزبون التجربة المثالية للنكهة ويتذكر معاها المناطق والذكريات القديمة المتعلقة بالنكهات كلها عشان تصير تجربة كاملة.

بس خلّصنا من هالقاعة رجعنا مرة ثانية للقاعة الأولى وبالدور قعدنا نسوي قهوة لاتيه عشان نجرب العملية، كل واحد لبس المريول الأخضر ومسك القلاص وسوّى قهوته 

اللي استانست منه هني انهم شرحوا لنا شلون يسوون القهوة يصبون الحليب بكوب معدني مصنوع بطريقة خاصة عشان لما يسخن الحليب يدور بالكوب ويتسخن كله بالتساوي ما يصير شوية منه ساخن أكثر من الباجي. وهم عالقلاص المعدني حاطين خطوط تبين كمية الحليب لكل حجم من الأكواب اللي يستخدمونها عشان يتأكدون من ضبط القهوة بكل الأفرع حسب الحجم والنكهة المطلوبة.

لما يخلص من تسخين الحليب عالجنب نشوف القهوة تصب بالكوب النهائي بس قبل لا يحطون الحليب عالقهوة يمسك الكوب المعدني اللي فيه الحليب ويدوْره شوي ويطقه عالطاولة عشان تطلع أي فقاقيع موجودة بالحليب تحت، الفقاقيع هذي تتكون من عملية التسخين ويطلعونها عشان لما الواحد يشرب الحليب يكون خاثر وصاااافي عالآخر ما يكون داخله فراغات هوا بايخة. بعد ما يتأكد من انعدام الفقاقيع يصب القهوة عالخفييييييييف حيل عشان يختلط الحليب مع القهوة بكل هدوء وتساوي 

اللي ما يدري عن كل هالتفاصيل عباله هذيل ناس فاضين مقزرينها عالعالم وبس يبيعون قهوة وكروشهم مليانه فلوس شبعانين ما يبون يتعبون روحهم اكثر. بس صج شي عجيب حتى القلاصات يفكرون بهندستها وشلون خلوها شوي منحنية بشكل دائري عشان تعطي زاوية يختلط فيها الحليب مع القهوة بطريقة أحسن من الزاوية الحادة في الأكواب القديمة 

هذا الكوب القديم والتصميم فيه زاوية حادة بين الأرضية وحواف الكوب:

وهذا الكوب اليديد وفيه انحناء بالأطراف والأرضية تساعد على خلط القهوة مع الحليب بصورة أفضل:

أنا كنت آخر واحد سويت قهوتي واستانست حيل من التجربة  بس قبل لا يوصل شفت ماثيو صاحبنا واقف يمي ولا اقعد أسئله عن جم شغله دايما كنت افكر فيها،

قلت له شكثر مشهورة قهوة الوايت شوكليت موكا عندكم؟

قال اهي مشهورة بس مو أشهر قهوة عندنا.

قلت له وات وات وات؟!؟!؟  يو مييين إيفين إن كوويت أند أذر ميدل إيست كنتريز إتس نوت ذات بوبيولر؟

(يعني قلت له شنو شنو شنو؟!؟!؟  قصدك حتى بالكويت وباجي الدول العربية مو مشهور وايد؟)

قال اي وهذي قاعدة مشهورة بكل سوق القهوة ان أكثر أنواع القهوة مبيعاً عند كل المحلات ما تتعدى الكابتشينو والموكا والقهوة العادية، حالها حال الآيسكريم القاعدة فيها ان أشهر انواع دايما ما تتعدى الككاو والفانيلا والفراولة.

قال هني بالكويت المشكلة الككاو الأبيض يوصلنا من امريكا وقاعدين يحاولون يصنعونه بالكويت عشان يفتكون من مشكلة الشحنات ونقص الكمية، مو قادرين يتنبؤون بمبيعات هالنكهة وشكثر منها راح يغطي الطلب في السوق من جذي حاشتنا المشكلة قبل أشهر لما انقطع الوايت شوكلت من الكويت مدة شهرين تقريباً علما وصلت الشحنة اليديده ورخصوها من الجمارك.

بعدين صار جزء الأسئلة والأجوبة حق الكل وأحلى سؤال شفته كان..

س: ليش ما تبيعون قهوة عربية في أفرع ستاربكس بدول الخليج؟

ماثيو جاوب وقال ستاربكس بالأساس ماركة أجنبية تبيع قهوة أجنبية والأجواء والطابع كله ستايل غربي، القهوة العربية مو مجالنا ولا نحب ندخل بشي يخرّب من هوية المحل وصورته المشهورة.

اللي فهمته انهم يقدرون يبيعون أشياء تناسب الطابع المحلي بس بصورة محدودة مثل لما يحطون مكسرات كستانيا اللي نشوفها عند الكاشير أو يبيعون ألبومات أغاني عربية، هالأمور مقدور عليها أما انهم يبيعون منتج رئيسي مثل القهوة العربية مقابل القهوة الأجنبية هني صار خطأ استراتيجي.

تشرّفت بالزيارة وبمقابلة الحبيب مبارك اسماعيل وأصحاب مدونة الدروازة المحترمين والغالي صاحب مدونة Q8AllInOne، ان شاء الله المرة الياية أطيّح معاهم الميانة أكثر 

الزيارة كانت عجيبة وفيها فايدة ومعلومات حلوة، تذكرت أيام الرحلات المدرسية 

شكر خاص للأخت روان فرحات و آمنة إبراهيم وجميع الطاقم عالاستضافة والترحيب الطيب 

16 Responses to “كُميل في زيارة لمقر ستاربكس الكويت”

  1. جان سالته اذا يدعمون اسرائيل ولا لا?

  2. mohammed alhussaini Reply March 24, 2012 at 12:55 am

    اخيرا طلعت على الساحه

  3. يعطيك العافيه و تشرّفنا بلقائك و لقاء جميع المدوّنات ، إذ أحرجتمونا بالمديح
    شرايك بالفصحه ؟

  4. بعد كل هالقعده وليلحين ماطاحت الميانه ؟ ههههه طاحت يبه طاحت
    :D

    خوش تقرير وخوش اسئلة
    وانشالله نشوفك المرات الياية
    ;)

  5. الله يديم المحبه ويعطيك الف عافيه على البوست الحلو هذا.. مثل ما تعودنا عليك تجذبنا باسلوبك الشيق

    وشكرا

  6. موضوع جميل لا تحرمنا من جديدك وبالتوفيق

  7.  اشتهيت قهوة ،،،،انزين ماتكلموا عن افضل مكاين صنع الكابتشينو وهالسوالف

  8. وصج يعطيك العافية كميل انشغلت بالقهوة ونسيت اشكرك

  9. كوميل هذا انت اللي ماسك الكوب ويضحك ?…

  10. أمبيهـ وناااسهـ حسيت الجو كشخهـ هناك
    يلا ان شاء الله كل مرهـ يدعونك لين ما تمل منهم

  11. موضوع جميل جداً جداً أخوي كوميل

    بعد إذنك طبعاً بما إنك ذكرت إنك لم تستخدم كامرتك فتوقعت تكون إنتا في هذه الصورة http://hikuwait.com/wp-content/uploads/2012/03/IMG_4421-480×320.jpg

  12. رحت أطالع الصور و أشوف
    الي يعجبني أقول هذا كميل اذا واحد عجبني أكثر من الي قبله أقول لا لا هذا كميل
    لين ما مليت و قلت كلهم كميل زييين
    شي غريب انا كل فترة و فترة أفتر على المواضيع القديمة احصل موضوع جديد

Leave a Reply

 
%d bloggers like this: