ليش أغلب الحشرات اللي نشوفها ميته تكون طايحه على ظهرها؟

May 18

ليش مو ميته على جنب مثلاً؟

أغلب الحشرات والزهيويات بمختلف أنواعها واللي نصادفها في حياتنا اليومية نلقاها فاطسه واهي على ظهرها، والسبب باختصار يرجع لطريقة موتها: السم.

لو تراجع روحك راح تنتبه ان أكثر الحشرات اللي نشوفها ميته تكون في البيوت أو أماكن الدوام أو –يكرم السامع والقارئ- الحمامات.. كل هالأماكن غالباً يستخدمون فيها مبيد حشرات عشان يتخلصون منها، يمكن بمجتمعنا العربي يكفخونهم بالنعال أكثر لما يكونون بالبيت بس يبقى مشهد الحشرة المقلوبة وهي ميتة مشهور ومميز كفاية للكل 

النظرية المشهورة والقوية ان الحشرة لما يدخل جسمها المبيد الحشري يبدي يأثر على نظامها العصبي ويفصل المخ عن أعضاء جسمها الصغيرون، تالي تبدي يحوش جسمها تشنجات وتقلّصات قوية بأطرافها تخلّيها تقلب على ظهرها وبعدين طبعاً ما تقدر تتعدّل بسبب انعدام التنسيق العصبي،،، إلى أن تلفظ آخر أنفاسها  أغلب المبيدات في السوق هذي طريقتها، يسمونها organophosphate nerve poisons طريقتها تهاجم الناقلات العصبية neurotransmitters علما تموت الحشرة.

يعني إذا مات الصرصور بصورة طبيعية في البرية عادي تشوفه مو مقلوب بس أغلب الوقت تتغذي عليه الطيور وباجي الحيوانات البرية قبل لا تشوفه.

من النظريات الثانية ان شكل جسم الحشرات الخفيف والصغير سهل ينقلب عالظهر خاصة إذا طاح من ارتفاع سواءاً مات من مبيد حشري أو من ضربة نعال يابس أو كفخة هوا قوية… هالشي يسمونه الديناميكا الهوائية. ظهر الزهيوي لو تلاحظ يكون أملس ومسطح وبطنه مجعّد ومليان ريول وخزعبلات، إذا كانت الصرصور ميّت على بطنه مع أخف قوة من الهوا راح يقلب على ظهره، أو لما تطيح الحشرة واهي في الهوا لا إرادياً تنقلب على ظهرها أثناء سقوطها. شخصياً مادري هل هذي حكمة من رب العالمين مثل نوع حماية لجسم الحشرة ولا لأ عشان لا تتأثر من الارتفاعات؟ الله أعلم، بس تبقى هذي نظرية وارده.

شلون أمنع الحشرات والزهيويات من دخول المنزل؟

أهم شي تحافظ على نظافة البيت وتمنع تراكم وبقاء فضلات الطعام لفترات طويلة، داخل البيت مثل ما شرحت بالموضوع فوق يعتبر مكان آمن حق الحشرات من الحيوانات البرية والطيور والبيئة تكون مثالية لما يتوفر فيها رطوبة وبقايا طعام باستمرار، إذا الواحد يهتم بتنظيف بيته والمطبخ بصفة دورية وخاصة الأرفف وبين الطاولات والكابينات راح يقلل من احتمال دخول الحشرات لبيته.

إذا تبي شي منزلي سريع اخلط شوية بيكربونات الصودا مع سكر وانشر الخليط بزوايا الكابينات وفتحات الطوفه، بيكربونات الصودا والسكر ما يقدر يهضمهم الصرصور وينحشه من المكان هذا إذا ما تسبب بموته.

أختم الموضوع بمعلومات سريعة عن الصراصير:

* جسم الصرصور الخارجي مغطى بمادة شبه شمعية تحميه من الغرق في الماي، يقول لك حتى يقدر يقعد تحت الماي لمدة توصل 10 دقايق ويرد يطلع طبيعي مثل الحصان تباً له 

* يقدر الصرصور انه يقعد بمكان واحد من غير ما يتحرك لمدة توصل 18 ساعة! مثلي لما أجابل الأنترنت بعطلة نهاية الاسبوع 

* اللي يسأل الصرصور شنو ياكل راح اقوله ياكل كل شي نباتات وحيوانات ما عنده مشكلة  وانتوا بكرامة حتى الفضلات، يعني omnivorous، حتى الخشب يقدر ياكله ويهضمه بمساعدة مادة معينة داخل جسمه. ناقص يصير جازورا وياكل حديد بعدين محد يقدر عليه جليل الحيا.

المصادر/

موقع قسم الأحياء في جامعة ماسيتشيوستس

Mental Floss

The Straight Dope

eHow

Science Clarified

, ,   | 

16 Responses to “ليش أغلب الحشرات اللي نشوفها ميته تكون طايحه على ظهرها؟”

  1. يعطيك العافية على المجهود. وخصوصا الموضوع قدم في وقته وهو فصل الصيف ” فصل الحشرات”

    ونحن بإنتظار الموضوع الجاي. وبالتوفيق لك يارب

  2. انا على ما خبرت في فصل الاحياء انه تقلب على ظهرها لانها تتنفس من بطنها فانت لمى ترش المبيد يقوم يسد المسامات وهي تقلب على ظهرها علشان تتنفس

  3. سمعت إنه لما يتعرضوا للمبيد الحشري, يحاولوا ينقلبوا عشان يتنفسوا, لإن أنابيب التنفس تكون أسفل الحشرة..

    الشيء الثاني, شفت فيديو لMyth Busters حاطين صراصير داخل علب مويا لمدة 4 أيام, ولما طلعوها.. رجعت تتحرك O_o

  4. طيب صحيحة المعلومة اللي تقول ان الصرصور اذا احتك بالإنسان يذهب وينظف نفسه ؟؟

    • @DZEKO
      نعم صحيحة , الصرصور يذهب و ينظف نفسه إذا لامسته ,بيقرف مننا :D ,حاجة عجيبة سبحان الله

  5. fatimah mohammad Reply May 19, 2012 at 3:49 pm

    ههههههههههههههه المعلومات الختامية لـطيفةجدًا

    وصفك للصرصور جاب لي القشعريرة خخ !

    الله يعطـيك العـــافية

  6. فعلا موضوع في وقته و الان بدأت احس بأمور تدبي تحت ريولي الله يسامحك
    وياليت نشوف موضوع ذات صله بمشاهده او قراءه مواضيع و ارتباطها بالنفسيه
    مثل الحين ليش بعد ما تشوف منظر او قصه عن حشرات تحس انه في شي يمشي !!

    الله يعطيك العافيه و ياليت نعرف ليش تكثر بفصل الصيف رغم تواجد الحشرات
    بكل الاحوال الا اننا نشاهد كثرتها في المنازل هل هو لعدم تحملها للحر و اين تكون
    خلال فصل الشتاء ؟؟

    الف شكر لك

    • كلام صحيح يا ريت اخ كميل لو توضح لنا الشعور الغريب مثلا اذا شفت واحد في مرض في عينه مثلا ابدا احس عيني بدت “تغلغل “مدري وش معنى ه الكلمة بس تشعر زي التحسس او اذا شفت مثلا واحد رجله مقطوعة ولا ايده شعور غريب يبدا يسري في رجلي او ايدي
      دمت بود

  7. كرهت الزهيوي أكةر عقب هالموضوع
    يعطيك العافية كميل

  8. اللي يعرف طريقة للتخلص من البق ، يكون سوى معروف كبير بعمتي اللي تعاني منه ، هذه الحشره الاذكى على الاطلاق ، وهي تختلف عن البعوض ، لان الكثير يخلط بينها وبين البق

    • اخوي بوحسين جرب تبحث في جوجل و اطبع
      اعشاب طاردة للحشرات
      للتخلص من الناموس في المنزل
      و ان شاء الله تحصل على مواضيع تفيدك

  9. اخ كميل تعرفت قبل قليل على مدونتك من خلال موضوع نشرته سابقا عن الفنادق والنجوم الخمس والان قرات هذا الموضوع احب واستمر في تصفح باقي المواضيع لكن اعجبني اختيارك لمواضيعك واسلوب الطرح الجميل والفائده الثقافيه التي تقدمها باسلوب سلس ومميز في نفس الوقت وحبيت ان اشكرك لاهتمامك بنشر الوعي للناس ويارب يوفقك وينطيك الصحه والعافيه لتكمل مسيرتك ويكثر من الاشخاص المميزين مثلك تحياتي لك واسفه على الاطاله

  10. معلومات جميلة وقيمة ما شاء الله

    حقيقى تسلم اخى على هذه المعلومات

  11. بعد من الطرق السهله عشان تبهذل الصرصور تخلي الليتات مفتوحة يتبهذل مايحب الليتات

  12. thankx for the info

  13. شكرا على هذه المعلومات

Leave a Reply

 
%d bloggers like this: