العين البشرية چم ميغا بيكسل دقتها؟

Aug 22

على فرض نبي نسوي كاميرا دقتها نفس دقة العين البشرية، چم ميغا بيكسل يبيلها عشان تضبطها؟

وشكثر مساحة الصورة اللي تخزنها العين إذا نبي نحسبها بالميغا بايت؟

أول شي لازم أوضح ان العين البشرية وايد تختلف في تركيبتها وطريقة شغلها عن الكاميرات الرقمية اللي عندنا هالأيام، يمكن بس من ناحية الفكرة الأساسية متشابهين أما الباجي فرق كبيييييرررر والجزء الأكبر من الاختلاف يرجع للمخ البشري والدور اللي يلعبه في عملية النظر.

مع هذا اذا حاولنا نتجاهل كل شي مختلف، وقرّبنا الافتراضات، واعتمدنا بعض الأرقام التقريبية، يقولون الظاهر أقرب جواب هو 576 ميغا بيكسل!

بس هووووب هووووووووب انطر! الاختلاف بين العين والكاميرا شوي يغير من هالرقم…

وكيف هازا؟ 

هالجواب محسوب من عدد المستقبلات العصبية في الشبكية اللي يوصل 5 ملايين مستقبل مخروطي و 120 مليون عصية (العصية – rod تترجم تباين الألوان ولها دور كبير في توضيح “حدة” الصورة – Sharpness).

بس تركيبة المستقبلات الضوئية في الكاميرات موزعة بصورة متساوية على قطعة صغيرة مربعة، أما المستقبلات الحسية في العين عشوائية وتتدرج في نسبة تركيزها كلما تروح إلى مركز العين، من جذي لما تطالع بالعين تشوف الواضح بس بالنص والأطراف تلقاها ضبابية، هذي صور توضيحية تبيّن الفرق:

 

 

هالكلام يعني الملايين من المستقبلات العصبية في شبكية العين ما تقدر تحسبها كلها انها فعاله 100% في عملية النظر.

يعني يقولك اذا نبي نحسب الدقة الفعلية النهائية مع هالتوزيعه للمستقبلات العصبية يمكن تصير دقة العين بس 50 ميغا بيكسل لا غير! ،، لا واحتمال كبير أقل من هالرقم.

زيد على الاختلافات الكبيرة انك تطالع بعينين، يعني عدستين مو عدسه وحده :) وطريقة شغل العين تشابه تصوير الفيديو أكثر من اللقطات الثابتة. العين تلتقط صورة متواصلة وتتحرك محتوياتها وزواياها باستمرار و تتحدث الصورة بالتغييرات المتسلسلة، كله تحت إشراف الـBig Boss اللي هو مخك اللي يعني المفروض يكون براسك بس ما يندرا  لول! 

أكبر اختلاف في الموضوع كله ان عملية “النظر” جزء كبير منها يصير في القشرة البصرية في المخ، العين بس تستقبل جزء من الصورة والمخ يخليك تقراها وهو من نفسه -بارك الله فيه- يملأ الفراغات العميا في النظر  وبأشياء مرات تكون خطأ مو على حقيقتها. هالفراغات اللي يعبيها نفسها اللي يسمونها الخدع البصرية، لما تكون في صورة انت منتبه للخداع البصري بس لما تمشي وتقوم وتقعد في حياتك اليومية ومشاويرك فعلياً انت على طول قاعد تشوف بالعين نفسها وعملية الخداع البصري موجودة في أشياء انت مو منتبه عليها.

حتى الألوان مرات المخ يخليك تقراها مختلفة عن حقيقتها مثل ما حطيت بموضوع قديم حق اللي يبي يراجعه.

القصد من كل هالهذرة ان عملية النظر البشرية وااااايد تختلف عن طريقة عمل الكاميرا الرقمية، عشان چذي حساب دقة الميغا بيكسل شي مو عملي وغير دقيق، يعني سواءاً كانت العين 576 ميغا بيكسل أو 50 ميغا بيكسل فعلياً ما بنحس بهالرقم وقيمته، عكس الكاميرا لأنها تشتغل بطريقة مبنية على هالمقياس والرقم يعكس شي ملموس فيها.

زين وشكثر يوصل حجم الصورة اللي تلتقطها العين اذا نبي نحسبها بالميغا بايت؟ 

مع مراعاة الاختلاف الكبير في الحسابات والمعطيات نقول تقريباً الصورة اللي مدتها ثانية وحده تلتقطها العين تساوي أكثر من 10 غيغا بايت من البيانات تروح للمخ لترجمتها. هذا بس عشان يصير عندك فكرة شكثر المخ البشري عجيب سبحان الله طول اليوم يشوف ويستقبل شكثر بيانات وفوقه يساعدك تتكلم وتتحرك ويتحكم بجسمك وهم ما يتعب.

هالموضوع ذكرني بموضوع مساحة المخ البشري بالغيغا بايت. واذا كنت تحاتي ان الصورة للثانية الوحده حجمها كبير وتخلص مساحة مخك اقول لك تطمّن لأن معظم البيانات اللي توصل من الصورة تنحذف بعد قراءتها وما يبقى إلا نتيفات لا غير، إلا اللهم إذا كنت مركز ومندمج وقاعد تذاكر مثلاً ومنتبه عقلياً ونفسياً. وطبعاً مع العمر وايد من الأشياء يحذفها مخك عشان يوفر مكان حق ذكريات أحدث.

وسلامتكم 

المصادر/

ClarkVision

Eyes Megapixel

NutshellOnline

HowManyAreThere

,   | 

15 Responses to “العين البشرية چم ميغا بيكسل دقتها؟”

  1. اعشق المواضيع اللي من هالنوع

    شكرا كميل

  2. يعطيك العافيفة خوش موضوع

  3. سبحان الله … معلومات رائعة وقيمة الف شكر لك أخوي كميل

  4. آخر موضوع يوصلنا للحاجة لمعرفة فكرة الذاكرة الفوتوغرافية ..

    للحين مو مستوعب هالفكرة وكيفيتها اصلا

    يالله اشرح :)

  5. بصراحة الموضوع وايد حلو ….
    وأسلوبك أهو اللي خلاه أحلى …
    من زمان عن هالأسلوب البسيط والسلس اللي يخليك تفهم المعلومة بسرعة ….http://www.kumailplus.com/wp-content/plugins/wp-monalisa/icons/kml_happy.gifhttp://www.kumailplus.com/wp-content/plugins/wp-monalisa/icons/kml_grin.gifشكرا مستر كوميل

  6. ماشاء الله عليك الله يعطيك العافيه
    موضوع رائع جدا الف شكر لك :)

  7. عبدالله القرمزي Reply August 25, 2012 at 9:53 pm

    مادري شلون كنت عايش بدون مدونتك!
    يعني صدق تمهل بين موضوع و موضوع بس النتيجة كبيرة على قولة السعوديين
    بس الحين بعدماقرأت موضوعك جاني سؤال بسيط
    الحين قوة العين ٥٧٥ لو حصلت كاميرا قوتها الف ميقا بكسل
    شلون بشوف الصورة بعد التصوير
    اخس سؤالي اهبل و اتمنى ما يكون اهبل http://www.kumailplus.com/wp-content/plugins/wp-monalisa/icons/kml_sweatdrop.gif

    و ارسل لك سلام البحارنة من البحرين http://www.kumailplus.com/wp-content/plugins/wp-monalisa/icons/kml_grin.gif

  8. Abdullah bin Mahfouz Reply August 26, 2012 at 7:12 pm

    عني شخصيا اشوف ان المدونة هذه افضل مدونة ذات محتوى واثراء علمي رائع. عزيزي اتمنى لك مزيد من التوفيق والنجاح والاستمرار في مسيرة عطائك اللي مطعشين لها

  9. موضوع جميل و تشكر عليه أخ كميل و لدي سؤال: أنا مرة قريت انه مخ الانسان يسجل و يخزن كل شيء يشوفه او يسمعه و ما يحذف ابدا شيء، شو رايك

    • حسب ما أعرف هالكلام غير صحيح وتقدر تراجع موضوع مساحة المخ بالغيغا اعتقد ذكرت شلون وايد معلومات تروح ويصير مكانها معلومات غيرها.

  10. كميل في سؤال ما ادري قانوني لو لا لكن نتمنى يكون ضمن
    مواضيع البحث المستقبلية
    السؤال يقول: ليش لازم نشوف يستخدموا مع الخمر ثلج؟ ليش مايحطوا الخمر بالثلاجة يبرد وبعدين يشربوه؟؟؟

  11. معلومات قيمة جدا ….
    واسلوب اكثر من رائع فى شرح وتبسيط المعلومة

  12. معلومات رائعة وقيمة الف شكر لك

  13. موضوع ممتاز ومعلومات رائعة

    سبحان الله خلق الانسان في أحسن تقويم

Leave a Reply

 
%d bloggers like this: