شنو أعلى ارتفاع ممكن توصله ناطحة سحاب من الناحية الهندسية؟

Sep 28

يعني لي وين نقدر نبني عمارة وبعدين المهندسين يقولون بس هذا حدنا، إذا صعدنا أكثر من جذي العمارة راح تنهار.

اللي يقرا العنوان أكيد راح يفكر ببرج خليفة، اللي يقولون من كثر ما هو مرتفع عن الأرض صار عنده ثلاث أوقات مختلفة للسحور والفطور على حسب أي طابق انت ساكن، لأن الشمس بأعلى طابق تنشاف حتى بعد غروبها بالنسبة حق القاعدين بالطابق الأرضي، والفرق خمس دقايق علما تغيب الشمس عن كل سكان البرج.

burjkhaleefa

صج الفرق حده 5 دقايق بأعلى طابق بس تبقى السالفة يا للهول أو إن صح التعبير OMG! 

وحسب ما أذكر حتى قبل افتتاح برج خيلفة قرينا بالجرايد عن أبراج راح تتجاوزه في الصين (بس يبون يتجاوزونه بعشر أمتار فقط) وفي السعودية برج المملكة يبونه يوصل ألف متر، يعني تقريباً 170 متر أعلى من برج خليفة) كل هذا خلال السنوات القادمه.

لي متى يعني؟ متى نشوف المهندسين يرفسون الباب على هالأوادم ويقولون لهم يالله عااااد حدكم لي الطابق 200 مثلاً وأكثر من جذي المبنى يطيح على روسكم؟

الجواب باختصار لي الحين علمياً ما لقوا حد ، العوامل اللي تدش في معادلة الارتفاع هي التالي: المواد، راحة البشر اللي بيستخدمون أو يسكنون المبنى، تكنولوجيا المصاعد اللي تبي تربط بين الطوابق، والعامل الأهم في كل هذا: القريشااااات!  ونظرياً كلما يفكرون بارتفاع محدد شافوا انهم يقدرون يتجاوزونه. 

يعني قصدك إذا كل هالعوامل صارت بالمخبا راح نقدر نبني ناطحة “فضاء”؟  أو نقدر نروح مبنى وندش المصعد نطق الطابق 2000 مثلاً ونوصل القمر؟

المهندسين هالأيام يقولون احتمال اي  ليش لأ!

وفي حال صار كل هذا وتوفر المطلوب راح يهندسون دعامية أو أساس المبنى (بالانجليزي يسمونه buttressed)على حسب الارتفاع المطلوب ورووووووح. الفكر ببساطة كلما تبي تصعد بالارتفاع لازم الأساس يكون أعرض عشان يكون المبنى أثبت، بس هم تقدر تتغلب على مشكلة زيادة العرض بتدعيم الأساس وتقويته هندسياً.

أحد المتخصصين بالعمارات المرتفعة قال انه مرة اشتغل حق واحد من الشرق الأوسط (حسافه ما ذكر اسمه) عشان يبني أطول ناطحة سحاب يكون فيها 500 طابق (برج خليفة فيه 163 بس) وارتفاعه يوصل 2.4 كيلو متر عن سطح الأرض (برج خليفة 0.828 كم)، يعني تقدر تقول حجم المشروع كان ثلاث أضعاف ارتفاع برج خليفة الحالي. يقول لما اشتغلوا وعشان يتغلبون على المشاكل الهندسية قدروا يطلعون بعشر اكتشافات وحلول جذرية محد سمع فيها من قبل، بما فيها النقل والمصاعد واستخدام مواد وتكنولوجيا يديده 

القصد من هالمثال ان هذا كان مشروع واحد قبل 3 إلى 5 سنوات من تاريخنا، عيل الحين شنو يقدرون يسوون؟ المتخصص اللي بالسالفة يقول لو دش علينا واحد ثاني وقال أبيكم تسوون ضعف هالمبنى كنا راح نقعد ونطلع لنا بحلول يديده غيرها عشان نوصل الارتفاع اللي يبيه.

زين وشصار على هالمشروع والمبنى الضخم؟ وين راح؟ 

صارت الأزمة الاقتصادية ذيك الفترة وكل شي راااااح في الهوا شاشي وانت ما تدراشي 

يعني نظرياً نقدر نبني مصعد للفضاء؟

نظرياً اي، في شغله يتكلمون عنها وايد اسمها مصعد الفضاء – Space Elevator يوصل امتداده 100 ألف كيلو متر، نظرياً يحطون قاعدة المصعد متعلقة بالأرض بقوة وبالطرف الثاني كتلة –حسب ما فهمت- متعلقه بمدار بالفضاء وتنسحب عكس اتجاه الأرض بمساعدة قوة الطرد المركزي للخارج، جذي الوصله أو الرابط بين الكتلتين يشتد ويسمح لنوع من المركبات بالتنقل بين الطرفين.

… يا بوووووووييييي!

أدري، انا هم لي الحين مو قادر استوعب شلون الطيارات تتعلق بالهوا عيل شلون بصدق مصعد يوصل للفضاء صاعد نازل، حده تباً 

معلومة عالطاير: تدرون ان برج خليفة فعلياً 15% منه مواد بناء والباجي كله 85% هوا من الداخل، لو تفكر فيها تدوخ شلون البشر وصلوا بالتكنولوجيا ما شاء الله. 

المصادر/ 

جريدة الأنباء

The Atlantic Cities

Wikipedia – Burj Khalifah

Wikipedia – Space Elevator

,   | 

11 Responses to “شنو أعلى ارتفاع ممكن توصله ناطحة سحاب من الناحية الهندسية؟”

  1. شكرا لك على الموضوع المميز و شخصيا اعتقد انه ما يعجعلني اسكن في الطوابع العليا هي الاطلاله فقط يعني اذا مافي اطلاله جميله ما اشوف انه هناك اي هدف من السكن في الطوابق العليا غير انه عمليه التنقل من و الى الغرفه
    مشوار ناهيك عن الامور الطارئه لا سمح الله للاخلاء
    فالافضل السكن في الطوابق القريبه من الارض حتى
    لا تمل من عمليه التنقل الى خارج المبنى ناطحات السحاب او المباني الطويله تهدف في جمع اكبر عدد من الافراد بشكل عامودي وهي فكره
    لسياسه تقليص نسب الاراضي المستخدمه اولا و اخيرا و البعض يعتبره مجرد صرح او رمز للدوله المقام عليها هذا المبنى …

  2. شكرا على الموضوع الرائع و الشيق :)

  3. الموضوع شيق مثل كثير من موضوعاتك لكن للأسف الحلو ميكملش http://www.kumailplus.com/wp-content/plugins/wp-monalisa/icons/kml_mad.gif

    انت تكتب بلغة البلد التى انت منها (الكويت ) فلا استطيع أن أفهم كثير من الكلام , أنا من مصر على فكرة
    أفضل حل إنك تكتب باللغة العربية الفصحى فهى سهلة و مفهومة للجميع http://www.kumailplus.com/wp-content/plugins/wp-monalisa/icons/kml_grin.gif

    • عبدالله القرمزي Reply October 1, 2012 at 8:12 pm

      أنا مؤ كويتي ولهجتي مؤ كويتية و مصر على اللهجة الكويتية http://www.kumailplus.com/wp-content/plugins/wp-monalisa/icons/kml_grin.gif

  4. وما اوتيتم من العلم الا قليلا

  5. اتوقع انه اذكر في الاسلام شي عن تطاول البنيان شي جذيه

    المهم برج خليفه اتوقع اهوه بدايه التحدي في البنيان
    والياي اعظم

  6. طيب نسبة الاكسجين تقل
    والارتفاع يؤثر على الضغط

    علشان كذا اكيد فيه حد معين

  7. الموضوع ممتاز جدا

    بس انا شخصيا لا احب الادوار العليا

    الا دقائق او ساعات عشن المنظر والهوا

    انا اخري اسكن في العاشر اكتر من كدة لأ

  8. شكرا لك على الموضوع المميز

Trackbacks/Pingbacks

  1. شنو أعلى ارتفاع ممكن توصله ناطحة سحاب من الناحية الهندسية؟ « Blogs Updates - September 28, 2012

    […] Kumail+ Share this:Facebook   No Comments […]

Leave a Reply

 
%d bloggers like this: