سامعين عن سور “الهند” العظيم؟

Nov 11

عيل عبالكم بس الصين عندهم سور طويل عريض؟

يسمونه كومبالغار – Kumbhalgarh ومكانه في ولاية راجاسثان – Rajasthan في غرب الهند. يمتد على مسافة توصل 36 كم، صج مو وايد مقارنة بسور الصين اللي يقولون كله على بعضه يوصل  21,196 كم بس يبقى هالسور الهندي ضخم وعجيب! والمشكلة قليييييل يعرفونه أو حتى سامعين عنه كله من سور الصين اللي خاطف الأضواء عن هالفقير المسكين :(

Kumbhalgarh great wall of India 5

بدوا يشتغلون على هالسور سنة 1443م (القرن الخامس عشر) واستمر المشروع تقريباً قرن كامل علما خلص، وخلال القرن التاسع عشر صارت له توسعة شوي بعدين تحول لمتحف مفتوح للزوار.

الهدف الرئيسي من بناء السور كان حماية المعابد المهمة واللي يوصل عددها 360 معبد ورا السور معظمها تخص الديانة اليانية وشوية معابد للهندوس. الشي الثاني اللي تحميه هي الأراضي الزراعية المحيطة بالمعابد لأنها تمثّل راس مال المنطقة.

شنو هذي الديانة اليانية؟ 

من الديانات الهندية القديمة طلعت قبل الهندوسية ولها حوالي 4 ملايين تابع معظمهم في الهند. النقطة الأساسية عندهم هي اللاعنف نحو جميع الكائنات الحية.

Kumbhalgarh great wall of India 2

ببعض الأساطير الشعبية يقولون على أيام اكتمال المشروع كان المهرانا (تسمية ملكية ثانية تشبه المهراجا) يأمر بإشعال عدد خيالي من الفوانيس عشان ينوّر المزارع اللي يحميها، لدرجة المزارعين كانوا يقدرون يشتغلون بالليل والنهار ويشوفون شغلهم عادي من غير مشاكل.

أسطورة مشهورة ثانية ان المهرانا كلما حاول يبني السور أو الحصن كانت تطلع له مشكلة وما يقدر، علما سأل مستشاره الروحي ولا الأخ يقول له لازم واحد يتبرع ويضحي بنفسه عشان يفك النحس. الحبيب الظاهر كان يبي يتفلسف ويسويها اكشن زيادة ولا يقول شوفوا وين يطيح راسه وحطوا هناك معبد، ودفنوا باجي جسمه ومكانه تبنون الحصن وباجي السور. تخيل المنظر جذي المهرانا قاعد مع الحاشية ويسمعون كلام المستشار، بعدين المهرانا يطالع الحاشية عشان يشوف منو ينط ويتبرع للتضحية بس ينصدم الكل يسوي روحه مشغول بتلفونه أو يطالع السقف  أو

يقولون فترة من الزمن محد تبرع عشان يضحي بروحه علما واحد من “الحجاج” اللي يزور معابدهم المقدسة تبرع، وعلى نسخة ثانية يقولون كان جندي. قطعوا راسه في طقوس دينية وصار مثل ما اقترح المستشار الروحي ويقولون بعدها انحلت مشاكل مشروع الحصن. واليوم عند البوابة الرئيسية للحصن في معبد صغير حق هالفقير اللي قصوا عليه 

Kumbhalgarh great wall of India 16

مكان السور استراتيجي يفصل بين مملكتي الماروار Marwar والميوار Mewar والسور كان للميوار، كان ملجأ أو خط دفاعي أخير من هجمات الماروار. خلال 500 سنة من عمر السور ما قدر يطوفه أي عدو إلا مرة وحده فقط لا غير، وبس لأنهم حاصروا الحصن والماي داخل خلص. بالمقابل اذا تشوفون سور الصين يقولون وايد اخترقوه وما أدى الغرض منه بشكل فعال.

لي اليوم الناس يقولون في أفخاخ قديمة منتشرة ومخفية حول السور ودايما يحذرون السياح لا يروحون الجهات المهجورة من الحصن 

Kumbhalgarh great wall of India 35Kumbhalgarh great wall of India 34Kumbhalgarh great wall of India 32Kumbhalgarh great wall of India 31Kumbhalgarh great wall of India 30Kumbhalgarh great wall of India 29Kumbhalgarh great wall of India 28Kumbhalgarh great wall of India 26Kumbhalgarh great wall of India 25Kumbhalgarh great wall of India 24Kumbhalgarh great wall of India 22Kumbhalgarh great wall of India 21Kumbhalgarh great wall of India 19Kumbhalgarh great wall of India 18Kumbhalgarh great wall of India 17Kumbhalgarh great wall of India 14Kumbhalgarh great wall of India 13Kumbhalgarh great wall of India 12Kumbhalgarh great wall of India 11Kumbhalgarh great wall of India 10Kumbhalgarh great wall of India 9Kumbhalgarh great wall of India 8Kumbhalgarh great wall of India 7Kumbhalgarh great wall of India 6Kumbhalgarh great wall of India 3Kumbhalgarh great wall of India 1Kumbhalgarh great wall of India 23

Kumbhalgarh great wall of India 4

Kumbhalgarh great wall of India 33

….

..

مفكر أجرب شغله وحبيت استشيركم هني عالسريع:  بسبب ضيق الوقت عندي ولأني ماقدر اساوي بين البحث عن الصور اليومية وكتابة المواضيع ودي أجرب ما احط صور جم يوم واتفرغ اكتب جم موضوع بشوف إذا اقدر اخلص مواضيع اكثر وبعد كل موضوع اتفرع اقعد يومين احط الصور المعتادة،،،

ايش شرايكم؟ 

 

المصادر/

ويكيبيديا – سور الصين

ويكيبيديا – اليانية

ويكيبيديا – Kumbhalgarh

kuriositas.com

,   | 

16 Responses to “سامعين عن سور “الهند” العظيم؟”

  1. انا معاك بالاقتراح هذا.. على الاقل تريح نفسك شوي..

  2. انا كل يوم أستفتح بمدونتك واشوف الصور وحلاة مدونتك انها تثقيفية وتونّس لأن اسلوبك عجيب وأشوف أن موضوع او اثنين بالأسبوع ممتاز وتعلن مثلاً إنه يوم السبت والثلاثاء تنزل موضوعين وباجي الأسبوع صور — عموما مهما سويت انا راح أكون من رواد والمدونة ومشكور على جهدك

  3. سو اللي يريحك بس المواضيع احلى شي بالمدونة

  4. والله اللي يريحك يا كميل. وأنا أحب أقرأ مواضيعك حتى لو يومياً. لكن بعض المرات الوقت ما يسمح.

    فموضوع كل ثلاثة أيام زين.

    والله يعطيك العافية

  5. يعني ممكن من دون صور ، بس ولو صورة وحدة بس تعبر عن الموضوع أفضل
    :)

  6. حسون الملعون Reply November 13, 2012 at 1:32 pm

    يعطيك ألف عافية على المعلومات اللي تتعب عليها وتقدمها بصورة مشوقة لزوار المدونة

    الله يوفقك ويسعدك

  7. انا اعتقد انك تهتم بالمواضيع اكثر شوي يكون احسن !!!!!
    لان معظم الناس تحب مواضيعك اكثر !!!!!!
    انا عن نفسي متابع لمواضيعك و مو مهتم واجد بالصور :P

  8. المواضيع وايد احلى و اونس و افيد من الصور

  9. عجيب هذا السور

  10. مواضيعك دائماً في القمة
    وأسلوب أكثر من رائع
    يعطيك العافيه
    ونتظر جديدك المتميز

  11. موضوع رائع والصور ممتازة جدا

    بورك جهدك

  12. سو اللي يريحك بس المواضيع احلى شي بالمدونة

  13. رجيم الماء Reply October 14, 2014 at 3:27 pm

    رائع جدا معلومات جميلة

Trackbacks/Pingbacks

  1. سامعين عن سور “الهند” العظيم؟ « Blogs Updates - November 12, 2012

    […] Kumail+ Share this:Facebook   No Comments […]

Leave a Reply

 
%d bloggers like this: