شسالفة موسوعة غينيس للأرقام القياسية؟

Dec 01

شلون بدت هالموسوعة ومنو قرر انها المعتمدة للأرقام القياسية في العالم؟ وشلون اذا بكسر رقم قياسي؟

بدت فكرة الموسوعة من واحد اسمه هيو بيفر – Hugh Beaver كان يشتغل عضو منتدب لشركة غينيس لصناعة البيرة. بتاريخ 4 مايو 1951 هيو راح عزيمة للرمي مع ربعه في إيرلندا ولما قعدوا يرمون بالطيور ولا القطاوة ولا أي شي ثاني بدا بينه وبين ربعه نقاش طويل عريض عن أسرع طير يصيدونه في أوروبا، نصهم يقولون بيكاتشو والنص الثاني يقولون لا والله تشاريزارد اهو الأسرع . الظاهر احتد النقاش حيل بينهم لدرجة هيو قعد يفكر وايد بالموضوع وضاق خلقه انه ماكو كتاب يقدر يرجع له عشان يشوف شنو أسرع طير في أوروبا ويختم النقاش والكل يسكت. وقام يفكر أكثر ويقول بييييييه أكيد الحين في الحانات المنتشرة بإيرلندا ووايد يتناجرون ويختلفون على مواضيع ما يقدرون يحسمونها مثل سالفتي (طبعاً اهو فكر بالحانات لأنها في مجتمعهم تشبه الدواوين أو القهاوي عندنا بالكويت والمجتمعات العربية). بالأخير قال كل المشكلة ان ماكو مصدر يحسم كل هالسوالف بين الناس ويمكن لو سويت هالكتاب راح يصير مشهور!

أنا قاعد اقرا سالفته واقول هالولد كلش مو مال يدش بنقاش ، تلقاه من النوع اللي ما ينام واهو يفكر ليش ما قلت جذي وكان لازم اچعمهم چذي ، سالفة سخيفه مثل هذي قعد يفكر فيها لدرجة قام وألّف منها كتاب!

المهم لما قرر يشتغل عالكتاب الظاهر سأل جم واحد من ربعه علما واحد اقترح عليه يجيك اخوان توأم اسمهم نوريس وروس ماك رايتر – Norris and Ross McWhirter كان عندهم مكتب للبحث عن الحقائق في لندن وكانوا مشهورين انهم أصحاب ذاكرة قوية يحفظون أغلب المعلومات اللي تمر عليهم ويقدرون يعيدونها من غير مشاكل وبكل دقة. قام هيو وتواصل معاهم وتعاقد عشان يجمعون معلومات تكفي للكتاب، وفي أغسطس 1954 صدر أول كتاب بإسم The Guinness Book of Records وطبعوا منه ألف نسخة بس للبيع والتوزيع وكان الهدف منه التوزيع أكثر من الربح، الظاهر عشان يجس نبض الجمهور (بالعربي يعني يبي يشوف ردة فعل الجمهور). السنة اللي بعدها طبعوا أول نسخة رسمية للبيع وصدر بأغسطس اللي اهو قريب من موسم الكريسمس، ما مدى السنة تخلص إلا وصار هالكتاب الأكثر مبيعاً في بريطانيا، والسنة اللي بعدها هم 1956 انطبع الكتاب في الولايات المتحدة وانباع منه 70 ألف نسخة.

شلون كانت الفكرة عبيطة بالأول، بس بالأخير صج ضربت معاه صح! 

مع نجاح المبيعات قرر هيو يطبع نسخة يديده كل سنة مع تحديث عالأرقام القياسية، بإشراف التوأم ماك رايتر نفسهم، بس سنة 1967 توفى بأثر سكتة قلبية والمنظمة اللي أسسها والمسؤولة عن الكتاب استمرت بشغلها طبيعي وتطورت. اليوم كتابه صار نار على علم ومع السنوات الناس قاموا يتنافسون عشان يكسرون الأرقام ويسجلون اسمهم فيه ويحصلون على تغطية إعلامية، وأصحاب الموسوعة نفسها يسوون دعاية ويشجعون على هالشي، لدرجة انهم قرروا يخلون تاريخ 9 نوفمبر هو اليوم العالمي لأرقام غينيس العالمية – International Guinness World Records Day وبأول تطبيق سنة 2006 كانت المشاركة ضخمة وفي نسخة الموسوعة بذيك السنة تسجل فيها 2,244 رقم قياسي يديد! هذا غير انهم يدزون ممثل رسمي من المنظمة يسلّم شهادة ومسوين واجهة وحركات أكشن، يعني مروجين حق شغلتهم بطريقة محترفة.

ومنو اللي قرر انهم المنظمة المسؤولة عن الأرقام القياسية في العالم؟

الجمهور اهو اللي قرر  من شهرة الموسوعة ومتابعة الناس لها صارت مرجع لكل الأرقام القياسية ولها سمعتها العالمية.

أنا بكسر رقم قياسي  شسوي؟

طق اصبع علما يطقون باب بيتكم ويسئلون عنك يا معلم  لا بس دش على رابط موقعهم هني وقدم فكرتك: http://www.guinnessworldrecords.com/set-record/

التقديم والعملية كلها ببلاش طبعاً، بس لازم تنطر يوافقون على فكرتك بعدين يراسلونك بشروط المؤسسة ونظامها وأهم شي شروط الإثبات المطلوبة عشان يصدقون انك كسرت الرقم. إذا كنت تبيهم يدزون مندوب رسمي لازم تدفع مبلغ محدد عندهم.

المهم عاد لما حضرتك تكسر الرقم وتخلص لازم تدز الدليل بالبريد حق مكتبهم في لندن ولا يكون عبالك لازم يدفعون لك فلوس البريد؟  بعد هذا اللي ناقص

لما يراجعون الدليل ويتأكدون منه راح يدزون لك الشهادة المعتمدة ويسجلونك بشكل رسمي كصاحب رقم قياسي.

هذا مثال حق شهادتهم:

يعني بعدين يحطون اسمي بالكتاب؟! 

يمقن ويمقن لأ  المؤسسة عندها 40,000 رقم قياسي مسجل بشكل رسمي وكل سنة يختارون مجموعة محددة بس من الأرقام لطباعتها في النسخة السنوية.

زين إذا كسرت رقم قياسي يعطوني فلوس ولا شالسالفة؟

… اقول استريح بس 

شنو أنواع الأرقام اللي اقدر اسجلها؟

أي رقم تنطبق عليه أربع شغلات:

1- يمكن قياسه (أطول، أسرع، أثقل، أكثر..الخ)
2- يعتمد على عامل واحد، يعني ما تقدر تسجل أطول وأسرع رقم مره وحده، إما أطول أو أسرع، عشان الناس لا تقعد تخلط الحابل بالنابل وتصير ملاقه. الناس ما ينعطون ويه 
3- يمكن تأكيده: يعني بدليل واضح.
4- يمكن كسره: يبون يخلون كل الأرقام مفتوحه للمنافسة مرة ثانية.

معلومات عالطاير

* موسوعة غينيس للأرقام القياسية نفسها عندها رقم قياسي بلقب أكثر كتاب مبيعاً في العالم محفوظ بحقوق الطبع والنشر. وهالمعلومة كاتبينها داخل صفحات موسوعة غينيس نفسها. يعني جليلين الحيا تافخين روحهم بروحهم 

* موسوعة غينيس هم يعتبرونه أحد أشهر الكتب اللي تنباق من المكتبات العامة حول العالم 

* كل اسبوع توصل مؤسسة غينيس للأرقام القياسية أكثر من ألف فكرة لكسر أرقام قياسية جديدة، ويحتاجون حوالي شهر إلى شهر ونص لمراجعة أي طلب من الطلبات اللي توصلهم على الرابط اللي قلت عنه فوق. بس عندهم خدمة مدفوعة لتسريع العملية للشخصيات أو المناسبات الخاصة، على هالرابط.

* يرفض أصحاب الموسوعة تسجيل الأرقام القياسية الخاصة بقتل أو إيذاء الحيوانات، وهم منعوا تسجيل الأرقام القياسية في الأكل والشرب عشان الناس لا تذبح روحها وهم يحاولون يسجلون رقم قياسي، وهم يمكن يدشون بقضايا قانونية مع أقارب الضحية يطالبون بتعويض ويتهمونهم. بشكل عام أي رقم قياسي فيه احتمال يشكل خطورة على صحة الشخص ممنوع تسجيله مثل مدى ابتلاع السيوف داخل الجسم وعدد السجاير اللي يدخنها الشخص في يوم واحد ..الخ.

* سنة 2009 أعلنت منظمة غينيس ان أشريتا فورمان – Ashrita Furman هو صاحب أكبر عدد من الأرقام القياسية وكان عنده 100 لقب، وزيد عليهم اللقب اليديد اللي حصله “صاحب أكبر عدد من الأرقام القياسية” يصيرون 101 لقب. هاليوم وصل عدد الألقاب عنده أكثر من 311 وأغلبهم أشياء عبيييييطططهههه صج حده ما عنده سالفة ومصدق عمره.

* بعض الألقاب المستحيل قياسها يمنعون تسجيلها لاختلاف الآراء فيها، مثل لقب أجمل رجل أو امرأة لأن المقياس والأذواق تختلف فيه بالعالم كله.

المصادر/

موقع منظمة غينيس

ويكيبيديا – غينيس

ويكيبيديا – أشريتا فورمان

, ,   | 

15 Responses to “شسالفة موسوعة غينيس للأرقام القياسية؟”

  1. بصراحة أنا من المتابعين الصامتين لك من خلف هالشاشة الإلكترونية..
    وعندي سؤال لك وهو: شو الي خلاك تفتح هالمدونة؟!! يعني شو الحدث الي صار وخلاك تفكر بفتح هالنوع من المدونات ؟!! وبنكون شاكرين لك إذا تكلمت عن تجربتك بفتح هالمدونة وكيف كانت البداية والحماس والتشجيع وإحساسك؟

    أتمنى إن سؤالي مايكون تدخل بالخصوصيات.

    تحياتي: فاطمة من الإمارات

    • حياكم الله اختي وبكل أهل الإمارات الطيبين،

      بصراحة قبل المدونة كنت اقرا كل هالمواضيع واقعد اسولف عنها حق ربعي وعايلتي، وللأمانه محد كانت تعجبه هالمواضيع مادري ليش :/

      بعدين قمت اكتب مواضيع مختصرة وأرسلها حق زملائي بالعمل، بس الكل كان يتحلطم هم وما تعجبهم هالسوالف بالايميلات، كانوا يحبون الصور المضحكة والنكت،

      بعدها بفترة من الملل قلت خل اسوي مدونة، بس ترددت قلت أكيد محد بتعجبه هالسوالف كنت مقتنع ان الناس ما تقرا مواضيع بس يحبون نكت وصور،

      زوجتي اللي شجعتني وقالت افتح المدونة أحسن حتى إذا محد يقرا انت تسلى بمواضيعك فيها وبعملية التصميم، استمرت تقنعني اسبوع بعدين قلت يالله أجرب.

      يشهد الله اني لما فتحت الموقع كنت مقتنع بشكل كامل اني بقعد اسولف فيه بروحي سنة أو سنتين، قلت مستحيل الناس تدخل وتعجبها المواضيع ومستحيل أكثر انها تتابع.

      بعد شهرين تقريباً من جد انصدمت حيل من ردة فعل الجمهور وعدد الزوار! O_o لي الحين مو مصدق عدد الايميلات اللي توصلني عالموقع ومرات صج استحي ماقدر اقراهم لي الآخر :S

      الغريب بكل هالموضوع ان زملائي اللي كانوا يتحلطمون من هالمواضيع بالايميلات قاموا يتابعونها بالمدونة ويستانسون منها ولي الحين مو فاهم ليش ..

  2. زنبقة الماء Reply December 4, 2012 at 6:06 pm

    السلام عليكم…استمتعت في الأيام الماضية بقراءة مدونتك الأكثر من رائعة و الممتعة و المفيدة…عندي فضول: كم عمرك؟

  3. مشكور على الرد أخ كميل.. ومثل مايقولون بعض الإحباط من قبل الآخرين يدل على التميز.
    وإنت ماشاءالله متميز بكتاباتك وبهالمدونة الغنية بالمعلومات الشيقة والممتعة.
    ولا يسعني إلا أن أقول للأمام دائما وكن على يقين أن هناك متابعين صامتين يتابعونك دوما ويتحرون ويتشوقون لكل جديد منك
    وبالتوفيق

    فاطمة

  4. موضوع ممتاز الصراحة انا مستمتع جدا بقرائة موضوعاتك الشيقة

  5. موضوع رائع .. وأجمل ما فيه أسلوبك المتميز
    نحن في حاجة إلى موسوعة مماثلة.

  6. رائع رائع رائع ياكميل

    تصدق شو اللي عحبني بهاالتدوينه قصة بدايتك هههه

    صراحه الاسلوب والفكره والطريقه بهاالمدونه جميله

    شكرا لانك تشاركنا يااخي

  7. يبالهم بعد يمنعون الأرقام القياسية اللي فيها بطرة، زي أكبر صحن تبولة !

    شكرا لك على المعلومات

  8. استمتعت جداً بقراءة الموضوع ..
    اسلوبك جداً رائع , استمر ..

  9. موضوع ممتاز الصراحة انا مستمتع جدا بقرائة موضوعاتك الشيقة

  10. مدووووونتك عجيييييييييييييبه

Trackbacks/Pingbacks

  1. شسالفة موسوعة غينيس للأرقام القياسية؟ « Blogs Updates - December 1, 2012

    […] Kumail+ Share this:Facebook   No Comments […]

Leave a Reply

 
%d bloggers like this: