شنو في داخل سنام الجمل؟

Jan 06

صج يقولون داخله جنطة أكل وماي تخلي الجمل يتحمل الصحرا؟

لما كنت صغير –وانا بعدي صغير على فكرة – كنت دايماً اتخيل داخل سنام الجمل مثل جنطة المدرسة فيها صمون وشوية بفك وبسكويت وسانكست وعالجنب مقطوط ترمس ماي. لما الحبيب يجوع بس يطق على زر باسنانه واللي يبيه من الجنطة يدش ببطنه، كنت اتخيل كل سن حق شغله، واحد حق البفك وواحد حق البسكوت وواحد حق السانكست ..الخ.

نفسها سوالف الطفولة مرات ترد براسك وتقعد تفكر فيها، وانا ذكرت السالفة قلت خل اشوف بالصج شنو في داخل هالسنام المتفوخ على ظهر الجمل.

أثاري كل هالتفخة كمية كبيرة من الشحم! جبل من الشحم متكدس فقط لا غير. ماكو صمون ، ماكو بفك ، ماكو بسكوت ، والأصعب بين الكل… ماكو سانكست 

إذا كان الجمل صحيح ومتعافي ممكن يصير وزن الكتلة 35 كجم. البشر وأغلب الحيوانات يخزنون كميات من الشحم بين أنسجة العضلات أو بطبقة تحت البشرة مباشرة. بس سبحان الله الجمل هو الحيوان الوحيد اللي عنده كتلة من الشحم متجمعة بهالشكل والطريقة.

ليش عاد كل هالشحم؟ شالفايدة منه؟

الكتلة الشحمية هذي تساعد الجمل يعيش فترات طويلة توصل اسبوعين من غير أكل وهالخاصية مهمة لبيئة الجمل البرية الصعبة. لما الجسم ما يلقى شي يتغذى عليه يبدي ياكل من الشحم في الجسم عشان يسد حاجته للأنشطة الحيوية، مثل اللي يصير بجسمك لما تسوي ريجيم منتظم لفترة معقولة، الشحم والكرشه والدهون كلها تروح – أو عشان نكون دقيقين أكثر تصير نسبتها أقل.

شايفين شلون مرات بالأفلام أو بالكارتون يحطون الجمل عنده سنام مترهل وطايح عالجنب؟ هذا يعني الجمل مستهلك كمية من الشحم داخل السنام وكان في رحلة طويلة والأكل فيها قليل خلاه يحرق من مخزون الشحم الداخلي، بس إذا وصل مكان وقدر يشبع وياكل بعد شهرين إلى أربع شهور يرجع السنام كبير مثل ما كان بالأول.

الصورة هذي حق جمل عنده سنام منتهي وسنام لي الحين فيه شوية مخزون:

97623816

camelseitlichtrabend_1

وليش ما يصير الشحم موزع بكل جسم الجمل نفس البشر؟ ليش صاير كتلة كبيرة فوق؟

إذا صار موزع راح يسخن الجسم أكثر ويحتر أكثر في الصحرا وهالشي مو عملي، لما يكون متجمع فوق بمكان واحد وبهالكمية يخدم مثل عازل حراري يحمي الأعضاء الداخلية من حرارة الشمس الشديدة في الصحرا والجزء السفلي من جسمه يبقى بارد. نفس الشي يمكن تلاحظ بين ربعك إذا شفت واحد متين غالباً تلقاه ما يستبرد في الشتا بسرعة، وعادي يلبس صيفي ويقعد ويشوف الضعاف يطقطقون من البرد ، جزء من هالتحمل يرجع لطبقة الشحم المتجمعة في جسمه واللي تشتغل مثل العازل.

مو بس بالأكل الجمل عنده حركات، حتى الماي إذا راح يشرب ما شاء الله يشفط لك 75 لتر بسرعة رهيبة واذا خذا راحته يقدر ياخذ اكثر، وبعدين اذا احتاج وصار الماي قليل يقدر يسحب من أنسجة جسمه تقريباً 100 لتر من غير ما يتضرر. عشان تميز شكثر الـ100 لتر يعني مثل 100 بطل ماي صغير! وبسبب الكبد والأمعاء الخاصة لما يقضي حاجته يكون –اجلكم الله- البول كثيف ونسبة الماي فيه جداً قليلة، والبراز أيضاً جاف بدرجة أكبر واكبر اللي يقدرون يستخدمونه لإضرام النار في الصحرا.

أما تحمل الحرارة فالجمل -سبحان الله- يقدر يتحكم بدرجة حرارة جسمه على مدى اليوم بنسبة معينة، لما تكون الحرارة عالية تلقاه يرفع من حرارة جسمه عشان يقلل من نسبة التعرق ولا يفقد كميات من الماي الداخلي. تقريباً يقدر يرفع حرارته 6 درجات سيليزية عن معدلها الطبيعي. واحنا البشر الحرارة عندنا تصعد درجة سيليزية وحدة ننسدح بالفراش ونتدلع .

لما عرفت حقيقة السنام وعلى آخر سطرين من هالموضوع استوعبت ان السنام تقدر تقول اهو في الحقيقة كرشة مقلوبة ، يعني كرشة مليانه شحم بس على ظهر الجمل مو بطنه.

معلومات سريعة عن الجمال:

1- ممكن يوصل عمر الجمل الواحد 50 سنة.
2- الجمل عنده ثلاث اجفان في عيونه، اثنين منهم فيهم رموش يمنعون التراب من الدخول وواحد رقيق شبه شفاف ينظف البقايا أو العوالق الرملية.
3- في حالات العواصف الرملية يقدر الجمل يسكر خشمه لمنع دخول التراب.
4- الجمل مثل العنز، يقدر ياكل تقريباً أي شي.. حشا جازورا مو جمل 

المصادر/

Animal Planet 1

Suit101

Animal Planet 2

Boston.com

,   | 

13 Responses to “شنو في داخل سنام الجمل؟”

  1. يعطيك العافيه خوش معلومات والله

  2. جل القائل
    (( افلا ينظرون الى الابل كيف خلقت ))
    يسلموووو كميل على هالتوضيحات الحلوة ^_^

  3. صارلك مدة طويلة مكاتب موضوع طويل … مواضيعك دائما مفيدة عاشت ايدك

  4. Abdulla alqarmazi Reply January 7, 2013 at 4:25 pm

    يذكرني سنامه بكر شتي
    متعيجز أسوي رجيم

  5. جميل جدا .. من اسباب تميزك الكثيرة اعتمادك ع مصادر انجليزية لضعف المحتوى العربي بالانترنت للأسف

  6. موضوع لطيف, ومعلومات مفيدة بارك الله فيك ^^

  7. كمووووول , أنا أحووووبك ^.^

  8. معلومات رائعه وطريقة شرح مسلية
    شكرا لكم

  9. و يسمونه زمان بال”حِرْجُوج”. اي اللي استهلك ماعلى ظهره من شحم! شكراً كُميل، مواضيعك دايم جميلة و خفيفة!

  10. سبحان الله
    الجمل إعجاز
    جزاك الله خير

  11. معلومات قيمه و مفيده تونا نعرفها
    اكيد شيابنا يعرفون هالمعلومات

    مو مثلنا حنا جيل الافلام كرتون

  12. سبحان الله
    الجمل إعجاز

Leave a Reply

 
%d bloggers like this: