فيديو: مقابلة مع صانع ومصلح أحذية عمره 91 سنة في نيويورك

Aug 01

فتح محله سنة 1945م ولي اليوم يداوم خمس ايام بالاسبوع.

واللي مو مصدق اني حاط موضوع يديد خل يقرص عمره عشان يصدق .

أول شي راح اتكلم عن الفيديو بعدين اسولف عن شسالفة الانقطاع بالمواضيع 

اسمه فرانك كاتلفومو – Frank Catalfumo ومثل ما قلت فتح محله سنة 1945 لما رجع من الحرب العالمية الثانية. اليوم يشتغل بنفس المحل مع ولده مايكل، يعني إذا تبي تحسبها صارله 68 سنة وهو مجابل الجواتي -وانتوا بكرامه-، لا واذا على كلامه كان يشتغل بالمهنة نفسها مع ابوه قبل لا يفتح المحل يعني عادي اكثر من 75 سنة 

لما يسولف شلون الناس كانوا ايام اول والمحلات شلون اختفت تحس اللي بعمره الحين يستوحش من هالزمن والناس صاروا متباعدين وشلون روح البساطة اختفت والكل يطالع شاشة الكمبيوتر او التلفون ويمشي وما يعيش الدنيا اللي جدامه. يخليك تفكر يسوه انك مجابل النت الحين أو حتى يسوه قاعد تقرا هالموضوع؟

مع هذا وصارله أكثر من 70 سنة مجابل نفس الشغل بنفس المحل، وانا مدونة فتحتها من ثلاث سنوات وبالموت مجابلها 

ومن چذي لما شفت الفيديو قلت يبيلي اكتب عنه موضوع واشرح شسالفتي مع الانقطاع،

بكل بساطة ماكو سالفة ولا في أي شي، المسؤوليات الوظيفية كانت تزيد يوم على يوم ولما ارجع من الدوام كنت حدي تعبان ما افكر اجابل فيها النت. واحسب معاي اني رب اسرة واحب اقرا شوي كتب وقصص واطلع مع ربعي واهلي..الخ.

مادري إذا هالشي مبين بس من صج المواضيع اللي اكتبها وابحث فيها وااااايد تتعّب وتهد الحيل علما اقرا وارتب واترجم وألخص والقى صور وفيديو، وهذا كله ماقدر اسويه بدون ما اخذ من وقت الأهل والبيت والدوام والكتب.

أيام اول لما فتحت الموقع كنت وايد مرتاح وما كان عندي ضغط بالشغل لدرجة اني كنت اكتب وايد مواضيع واحط صور بالدوام، بس الوضع تغير حيل وابتلشت  الحين عادي اكمل شغلي بالبيت والتلفون ما يسكت.

المهم الحين قاعد اكتب هالموضوع وانا بإجازة من الدوام، صارلي تقريباً اسبوعين والوضع الحمد لله عجيب والمزاج فريش   قريت وايد قصص ومقالات طبية وعلمية وسوالف يديدة رديت فيها روح المدونة وتشجعت احط هالفيديو.

ان شاء الله ببالي بعد مواضيع حلوه بس يمكن اضحي بالصور اللي احطها بقسم الصور عشان يصير لي وقت كافي لكتابتهم.

وشوكرن لكل اللي راسلوني وسألوا عني بالفترة اللي فاتت 

,   | 

19 Responses to “فيديو: مقابلة مع صانع ومصلح أحذية عمره 91 سنة في نيويورك”

  1. ياهلا بهالطلة حبيبنا كميل

  2. I’ve been checking your website every single day looking for a new post since your last one. Happy to see you back and truly understand your situation; but still, you’re not excused to disappear that long Kamil. If you just know how much the information you’re sharing with your special way of presenting it is benefiting, blowing mind and sometime changing your reader’s life you would allow more time and effort to maintain this lovely blog. Thanks for your great post and keep it up! Ma2jour.

  3. قمنا نحاتيك أخ كميل شغلتنا عليك بس الحمدلله دام إنت بخير إحنا بخير :)

  4. WELCOME BACK

  5. وين هالغيبه يا كميل عسى ماشر والله فقدناك

  6. اهلا بعودتك اشتقنا لمواضيعك واسلوبك الشيق في الطرح
    يعطيك الف عافيه يالغالي

  7. سبحان الله العظيم انا امل من الطريق اللي اروح له دايم باالدوام وهويشتغل في نفس المكان

    عجيب!

  8. الحمد لله إنك رجعت للمدونة =)

  9. كل الناس اللى بالعمر هذا بيكونو مخلصين لعملهم وعاشقين لمهنهم مهما كانت
    وروح البساطة التى تتحدث عنها ويتحدث هو بها هى موجوده بفطرة الانسان ” سبحان الله خلقنا بها”
    ولكننا اختلفنا عن زمان وفقدناها بالتدريج للاسباب اللى ذكرتها.
    تسلم على البوست ودائماً متابعه لمواضيعك
    بارك الله فيك

  10. موضوع جميل ، تسلم ، والحمدلله على السلامة وإن شاء الله المزاج دائما فريش

  11. من زمان هالقمر ما بان … أهلا وسهلا بعودتك وفعلا اشتقنا لمواضيعك الحلوة المميزة

  12. ولكم باااك
    والله بالنسبة لي لو ما تحط صور وتخلي الوقت اللي تقضيه بالبحث عنها وتخليه حق كتابة المواضيع
    لأن هالايام صعبة واحد يدش النت بس عشان يطالع صورة اما اذا موضوع السالفة تسوى
    واذا مواضيع حق مواضيع ترا عندي أسالة لي الراس

    المدونات الحين كلها تقنية محد نفسك يا بو كملة لا تبخل علينا بالمواضيع :p

  13. موضوع جميل ، تسلم ،

  14. اهلا بعودتك اشتقنا لمواضيعك واسلوبك الشيق في الطرح

  15. احنا كل يوم قاعد نفتح المدونه ولا جديد :( اتوقع لازم تحط بوست تودع متابعينك فيهم اذا كنت ناوي توقف كتابه :((

  16. موضوع رائع ومميز

  17. شتقنا لمواضيعك الحلوة المميزة

  18. يعطيك العافية على الطرح الطيب
    ومعلومات مفيدة الصراحة

    ليت الي عندنا يفهمون الي عندنا لا وصل 40 سنة خلاص تخلص حياته.

Leave a Reply