ليش الشعوب الشرق آسيوية تاكل بالأعواد أو الـ(الچوبستيكس)؟

Jan 26

Chopsticksتكفه يعني من بين كل الأشياء اللي تقدر تستخدمها عشان تحط اللقمه بحلجك، شمعنى هالعصايتين قرروا يستخدمونهم مجموعة شعوب مشهورة بالذكاء والتاريخ والحضارة؟

مو قادر أتخيل واحد يبي ياكل غداه ولا مره وحده يوقف ويخز الصحون جدامه ويفكر فتره بعدين يقول خل اييب لي عصايتين ضعاف عشان أمسك فيهم الأكل وأحطه بحلجي…   كلما فكرت فيها ما اقتنعت، مو قادر ألقى موقف أو سالفة ممكن تصير عشان الواحد يستخدم عصايتين بالأكل كلش ملش  اذا تأخذ السالفة بالمنطق يمعود حتى لو تاكل بإيدك أسهل من العصايتين!

وعشان بنت اخوي الصغيرونه اللي تتابع المدونة وتحب الأنيميشن الياباني قلت اكتب السالفة بموضوع   يعني الموضوع إهداء حق بنت اخوي مو حقكم، تباً لكم 

متى بدا استخدام الأعواد؟

عيدان الأكل المشهورة باسم “الچوبستيكس” – Chopsticks طلعت من حضارة الصين القديمة، تقريباً بدا استخدامها من سنة 1200 قبل الميلااااد! (يعني مجموع عمرها يوصل أكثر من ثلاث آلاف سنة ) وكانوا يستخدمونها بشكل أساسي للطبخ مو للأكل، وشكلها الأصلي كان عبارة عن أغصان شجر ضعيفه وطويلة يحطونها داخل الجدور وأواني الأكل أو الماي أو الزيت الساخن لتحريك أو إمساك شي من الطعام. ومن الاستخدامات الثانوية حق الطباخ مرات يستخدمها لتنظيف أذنه وهو ينطر الأكل يستوي عالنار.

لا يبه اقص عليكم  … عاد اذني قامت تحكني لما كتبت هالسالفة 

وشلون تحول الاستخدام عندهم من الطبخ إلى الأكل نفسه؟

يقولون في سببين رئيسيين، اثنينهم يكملون بعض لأن كل سبب بروحه ما اشوفه قوي كفاية:

السبب الأول: تقريباً بعد 500 سنة بعد الميلاد الحضارات الآسيوية زاد فيها عدد السكان بشكل كبير و مروا بفترة فقر حق أغلب الشعوب بالمنطقة، شي طبيعي مع الفقر تقل وجبة الشخص الواحد، واللقمة من الوجبة قامت تصير أصغر وأصغر (مثل السوشي) وينطبخ الأكل مقطع على هالكميات الصغيرة عشان الوجبة تستوي عالنار أسرع من الكمية الكبيرة. حاجة الناس حق السكاكين والأواني المعدنية أو الخشبية صارت شبه معدومة وقاموا ياكلون بنفس الأعواد الرخيصه اللي يطبخون فيها،، اللي وايد يروح مخيمات أو رحلات للشوي يعرف هالاحساس عدل، لما يحط المشاوي أو البرجر بحلجه وهو ماسكها بسكين  صار وياهم نفس الشي بس على مستوى أكبر بسبب الفقر وأكلهم الصغير.

السبب الثاني: بالإضافة حق مشكلة الفقر في سبب ثاني مهم دش مع الموضوع، اللي هو خلال نفس هالفترة الصعبة انتشرت ثقافة وتعليمات كونفوشس اللي تشجع الناس انها تترك أدوات الطعام الحاده.

منو هذا ابو فوشس شنو يبيع؟ 

اسمه كونفوشس، فيلسوف وكاتب وسياسي صيني وايد وايد مهم عند شعوب شرق آسيا. عاش 500 سنة قبل الميلاد بس أفكاره منتشره ويدرسونها لي يومنا وصارت تعليماته وكتاباته شي مثل الدين اللي يتبعه عدد كبير من الناس ويسمون طريقته بإسمه – الكونفوشسيه. أغلب سوالفه وتعليماته تشجع على الأخلاقيات العملية بين الناس.

صاحبنا كونفوشس كان شخص نباتي ما ياكل لحم، ومن إحدى مقولاته:

“The honourable and upright man keeps well away from both the slaughterhouse and the kitchen.  And he allows no knives on his table.”

الترجمة بالعربي (الكويتي):

“الريّال الشريف المستقيم يوخّر عن المسلخ والمطبخ. وما يرضى يشوف سكاكين على طاولته.”

ومن هني قاموا ياكلون باستخدام الأعواد المصنوعه من الخيزران، لأنها من النبات ومحسوبه شي طبيعي نظيف نفسياً وأخلاقياً مقارنة بالسكين والشوكه. وهم لهالسبب صارت الأعواد غير حادة الأطراف عشان تكون مسالمة أكثر وأبعد من السكين والشوكه.

وعشان هالسببين -اللي اهم الفقر وتعليمات كونفوشس- انتشر استخدام الأعواد للأكل شوي شوي بالمنطقة وامتد لليابان، فيتنام، كوريا، أندونيسيا، وبعض مناطق التبت ونيبال.

زين يالحبيب هالكلام كله عن السكين والشوكه، وليش ما كانوا ياكلون بالقفشه؟ القفشه حدها بريئه وكيوت ما تعور الأكل!

القفشه على أيامهم كانت تختلف عن شكلها اليوم، على ايامهم كانت قفشه بس اطرافها حاده وفيها أسنان الشوكه، نفس اللي نشوفهم بالجمعيات يدمجون الشوكه والقفشة يسمونها Spork يعني دامجين اسم Spoon و Fork. يعني ما كانوا يعرفون القفشة بشكلها اللي عندنا اياه اليوم وطلعت من الحسبه.

وبالأخير أختم الموضوع بصورة توضيحية لكيفية استخدام الأعواد حق اللي ما يعرف:

،، صراحه بس حطيتها عشان بنت اخوي تحب الأنيميشن ، هالفيديو أحسن:

مادري في أحد يقرا بالموقع لي الحين ولا قاعد اكلم روحي؟ 

المصادر/

ويكيبيديا – Chopsticks
ويكيبيديا – Confucius
TodayIFoundOut
History.com
Cultural-China.com

, , , ,   | 

63 Responses to “ليش الشعوب الشرق آسيوية تاكل بالأعواد أو الـ(الچوبستيكس)؟”

  1. لا فيه الي يقراء استمر بس موضوعك اليوم مو بلنا
    لبنت اخوك

  2. لا مو قاعد تكلم روحك .. بالعكس استفدت .. شكرا لك ^^

  3. موجودين بس لا تقطع P: , وايد حلو الموضوع .. الله يعطيك العافية ^_^

  4. Missed your articuls

  5. :/
    موجودين

  6. اهلاً اهلاً من طول الغيبة جاب الغنايم موضوع قميل

  7. مشكور يا كُمــيل على الموضوع.

    وحنا موجودين وننطر مواضيعك أول بأول.

    لا تحاتي, ماراح نتركك.

  8. يعطيك العافية

    استمتعت بالقراءة

  9. مشكور على الموضوع والمعلومة ويعطيك الف عافيه
    ولا تحاتي ما تكلم روحك

  10. مو قاعد تكلم روحك ,, استمر ولا تقطع :)

  11. انا لسه موجود و مستمتع

  12. استمتعت بالمقال والمعلومه والانيميشن والكليب لا توقف

  13. موجودييين طال عمرك *^*
    اشتقنا لتدويناتك

  14. وينك ياكُميل طالت الغيبة ، سافرت الصين ولا مشغول؟

  15. أنا مو مصدقة نفسي أخيرًا رجعت تكتب ،،، يا أخي لا تغيب كتير عنا … إستمر الله يرضى عليك و لا تقاطع

  16. العاب اون لاين Reply January 27, 2014 at 1:51 pm

    تسلم ايدك والله على المقالة الرائعة دى

  17. لا تكلم نفسك وبنت اختك ;p
    المهم ان جديدك يغنيك لو قديمك نديمك

  18. اهلااااا وسهلااااا
    موضوع جميل كالعاده شكرا جزيلا واهلا بالعوده اتمنى ما تقطع

  19. من زمان ماقريت مواضيعك المميزه ياليت ما تتأخر علينا بمواضيع احسن واحسن

  20. ياكميل

    الموضوع لبنت اخوك ومن لقافتنا جالسين نقرا
    لكن الحق ينقال استفدنا واليوم بشوف لي عودين نظيفة بغسلهم تمام واجرب اكل بهم عيش

  21. ولكم باك ياهلا بالزين متابعينك لاتقاطع وكثر من هالمواضيع المميزه, وقواك الله على هالمجهود الطيب

  22. من اخر موضوع حطيته و انا كل شهر افوت مرة اشوف اذا في موضوع جديد او لا !!
    من اجمل المدونات و يا ريت تتحفنا بموضوع اسبوعيا على الاقل

  23. أود آن اقدم تحياتي لك ولمواضيعك ومعلوماتك القيمة جدا.
    بحكم التخصص في إدارة المعلومات أجدك شخص مطلع وباحث رائع في مجال البحث عن المعلومة وتوثيقها بالمصادر، هي في الحقيقة جهد متعب خاصة في التقلب بين المواقع والمصادر الآخرى
    نهنئك ونشكرك
    فهد / ماجستير إدارة المعلومات

  24. بالعكس استمممممر ومن قلب بعد ,
    حدها عجيبه المعلومات و أنا كنت أقرا مدونتك للمتعه اللي فيها بس ماتوقعت أني أرجع مرة ثانيه ومو بس للمتعه هالمره عشان بروجكت ناويه أشتغل عليه ومدونتك عباره عن المرجع الاساسي لي
    أحبها هالمدونه احس تقريبا أساس معلوماتي ..
    يعطيك العافيه استاذ كميل ! XD

  25. يعطيك العافية

  26. هلا بالقاطع ،…. ارحب ارحبب

  27. موجودين :)

  28. الله يعطيك العافية كُميل, ما زالنا متابعينك
    استمر :)

  29. صراحه توقعت اني الانسان الوحيد الي يدش البلوق بعد هالقطاعه, بس انصدمت من الكومنتات ما شاءالله, الله يزيدهم.

    ويعطيك العافيه

  30. تو مانورت الشبكة العنكبوتية

  31. Yes we do , keep going and welcome back

  32. ليش ماتحول انستقرام ؟

  33. لااااااااااااااااا
    تقطع ولا تطول وتغيب

  34. وينك من زماااااان :)

  35. welcome back

    لا تعيدها و تغيب :)

  36. موجودين ، استمر بالكاتبة

  37. فعلا الموقع دة متميز للغاية ، وأرغب في المزيد والمزيد من الموضوعات المهمة
    مشكورين على المجهود المتميز ، واتمنى لكم المزيد من التقدم والتألق بأذن الله

  38. رائع الموضوع استفدت منه كتير
    يسلموووووا

  39. لسه لسه في حد بيقرأ..ارجوك استمر :D

  40. مقالة جميلة في انتظار المزيد

  41. where are you? lazy boy

  42. اطمئن لك متابعين كثيرون , استمر فى ابداعاتك

  43. مواضيعك مفيده و جداً حبيتها keep it up

  44. كميل وينك ؟ من زمان مفتقدة المدونه =(
    ان شاء الله تكون بخير ، (f)

  45. عظم الله اجركم في كميل بلس

  46. السلام عليكم
    وينك مختفي؟
    عسى خير

  47. خلاص ماتت المدونة رسميا ؟؟؟

    صارلك سنة و 3 اشهر ما حطيت شي جديد

  48. دخلت عقب فتره طويله ومتوقعه بلاقي مواضيع كثيره واجلس اقرا فيهم بالساعات زي قبل بس تفاجئت بالقطعه ليش كذا ؟!!!! :(

  49. معلومات قيمه ومفيدة يعطيك الف عافية واتحفنا بجديدك دايما
    عساك على القوة

  50. شسالفه …

    سنة و نص لا صورة و لا موضوع جديد ….

  51. معلومة رائعه شكرا اخوي ونتمنى تعود للتدوين

  52. السلام عليكم ..يعطيك العافيه وياليت ترجع للمدونه لان مواضيعك واسلوبك وايد ممتع ومعلوماتك حلوه ومنوعه

Leave a Reply

 
%d bloggers like this: